აზერბაიჯანის უზენაესი სასამართლოს მიერ, ჟურნალისტის, ხადიჯა ისმაილოვას, ციხიდან გათავისუფლების შესახებ, 25 მაისს, მოულოდნელად მიღებული გადაწყვეტილების შემდეგ, ჟურნალისტმა პირობა დადო, რომ თავის საქმიანობას გააგრძელებს. აღნიშნულ ინფორმაციას THE GUARDIAN ავრცელებს.
ხადიჯა ისმაილოვამ ჟურნალისტებთან საუბრისას ასევე აღნიშნა, რომ აზერბაიჯანის მთავრობა, მისი 18- თვიანი პატიმრობის შემდეგ მიხვდა, რომ მისმა პატიმრობამ სხვა ჟურნალისტებს ხელი ვერ შეუშალა მაღალი დონის კორუფციის შესახებ სიუჟეტები მოემზადებინათ და შესაბამისად,ქვეყნის ხელისუფლებამ გადაწყვიტა ის ციხიდან გაეთავისუფლებინა.
"ვაპირებ, გავაგრძელო გამოძიება, რადგან ქვეყანაში, როგორიც აზერბაიჯანია, სადაც კორუფცია ასეთი ფართომასშტაბიანია, ყოველთვის არსებობს გასაკეთებელი,"_ განაცხადა ისმაილოვამ.
მისივე თქმით, მნიშვნელოვანია, რომ აზერბაიჯანის მოსახლეობამ მიუკერძოებელი ინფორმაცია მიიღოს.
"ძალიან მნიშვნელოვანია, რომ აზერბაიჯანელმა ხალხმა პროფესიული და მიუკერძოებელი ინფორმაცია მიიღოს, ასევე მნიშვნელოვანია, აზერბაიჯანის საზოგადოებისთვის, რომ რადიოს თანამშრომლებმა მუშაობა განაგრძონ,"_ განაცხადა მან.
მაუწყებლის ინფორმაციით, ციხიდან გათავისუფლებიდან 2 დღეში ჟურნალისტს 40 წელის შეუსრულდა და მან დაბადების დღის სურვილად ისურვა, რომ სხვა პოლიტიკური პატიმრების ციხიდან გასათავისუფლებლად ყველაფერი გაკეთდეს.
"ჩემი დაბადების დღის სურვილია, გააკეთედეს რაც შესაძლებელია, რომ სხვა პოლიტიკური პატიმრებიდან ვინმე მაინც გამოუშვან ციხიდან, რაც ძალიან მნიშვნელოვანია,"_განაცხადა ისმაილოვამ.
ჟურნალისტმა ასევე აღნიშნა, რომ ხელისუფლებაზე ზეწოლა წარმატებული აღმოჩნდა.
"მე არ ვიყავი დარწმუნებული, რომ მთავრობა პოლიტიკური პატიმრებისა და სინდისის პატიმრების მიმართ კეთილგანწყობას გამოიჩენდა, მაგრამ, როგორც ჩანს, ხელისუფლებაზე ზეწოლა ჩემს გასათავისუფლებლად, ეფექტური აღმოჩნდა,"_ აღნიშნა ისმაილოვამ.
ამერიკული უფლება დამცველი ორგანიზაცია „WATCHDOG FREEDOM HOUSE“-ის მონაცემებით, აზერბაიჯანში 80-ზე მეტი პოლიტიკური პატიმარია, რომელთაგან 5 ჟურნალისტია, რომლებსაც ხულიგნობა, ნარკოტიკების მოხმარება და რეალიზება ბრალად ედებათ.
როგორც ცნობილია, ხადიჯა ისმაილოვა კორუფციის საქმეებს იძიებდა.
გავრცელებული ინფორმაციით, ის 2014 წლის დეკემბერში გადასახადების გადაუხდელობის, უკანონო სამეწარმეო საქმიანობასა და სამსახურებრივი მდგომარეობის ბოროტად გამოყენების ბრალდებით დააპატიმრეს, ხოლო 2015 წლის სექტემბერში 7,5 წლით თავისუფლების აღკვეთა მიუსაჯეს.
ამავე თემაზე:
ხადიჯა ისმაილოვას სასჯელი შეუცვალეს
„წაყენებული ბრალდებები შეთითხნილია“ – ისმაილოვას საქმე ევროსასამართლოში მიდის
