"რუსთავი 2"-ის გენერალური დირექტორი ნიკა გვარამია მოსამართლე ნათია გუჯაბიძეს თაღლითობაში ადანაშაულებს. ამის შესახებ გვარამიამ რამდენიმე წუთის წინ საგანგებო ბრიფინგზე ისაუბრა.
"ჩვენთვის რამდენიმე საათის წინ ძალიან მნიშვნელოვანი გარემოება გახდა ცნობილი. ერთ-ერთი მოსამართლე, ნათია გუჯაბიძე იდევნება თაღლითობისთვის საქართველოს პროკურატურის მიერ, საქმე იმაშია, რომ 2014 წელს მას გამოეყო სახელმწიფოსგან სახსრები, იმ მოტივით, რომ მას არ ჰქონდა ბინა თბილისში საქმიანობის შესასრულებლად, რაც მიღებული პრაქტიკაა. აღმოჩნდა, რომ მას ეს სახლი ჰქონდა და ბინას ქირაობდა საკუთარი დედისგან, შესაბამისად, იგი ითვისებდა ამ თანხებს უკანონოდ.
ეს ცნობილი გახდა იუსტიციის საბჭოსთვის, შესაბამისად, დაიწყო იუსტიციის საბჭომ აღნიშნულ საკითხზე მოკვლევა. მაშინდელმა იუსტიციის საბჭოს ხელმძღვანელმა და უზენაესი საბჭოს მაშინდელმა თავმჯდომარემ, კუბლაშვილმა, ჩვენი ინფორმაციით, რომელიც კონფიდენციალურ წყაროს ემყარება, მოითხოვა საქმის პროკურატურაში გადაცემა,
თუმცა იუსტიციის საბჭოს ახალმა წევრებმა, ამას მხარი არ დაუჭირეს, რადგან გუჯაბიძე ყოველთვის ასოცირდებოდა წულიკიანის გუნდთან და ძაღლმა ძაღლის ტყავი არ დახია, უფრო მეტიც, არათუ პროკურატურაში გადაგზავნაზე ეთქვათ უარი, არამედ სადისციპლინო დევნის ნაწილშიც უარი ითქვა და გუჯაბიძეს აკმარეს მხოლოდ სარეკომენდაციო ბარათი, რითიც ვლინდება, რომ გუჯაბიძე ცრუობდა და სამართლებრივად თუ ვიტყვით თაღლითობდა, ფლანგავდა სახელმწიფოს ქონებას. ჩვენი ინფორმაციით, საქართველოს პროკურატურა ფლობს ამ ინფორმაციას და ამ ინფორმაციით მიმდინარეობს ზეწოლა გუჯაბიძეზე. მოვუწოდებ, იუსტიციის უმაღლეს საბჭოს გაასაჯაროოს ამ წარმოების ყველა მასალა, რადგან საზოგადოებრივი ინტერესი არის ძალიან მაღალი, „რუსთავი 2“ წინააღმდეგია მისი ძალიან მნიშვნელოვანი საქმე განიხილოს თაღლითობაში ბრალდებულმა მოსამართლემ, იმიტომ, რომ ის განსაკუთრებულად მოწყვლადიც არის საქართველოს პროკურატურის მიმართ, ისევე როგორც ურთმიელიძე,"_ განაცხადა გვარამიამ.
"რუსთავი 2'-ის გენერალურმა დირექტორმა იუსტიციის უმაღლეს საბჭოს მოუწოდა საზოგადოების მაღალი ინტერესებიდან გამომდინარე გასაჯაროვდეს მოსამართლე გუჯაბიძისთვის მიცემული სარეკომენდაციო წერილის შინაარსი და იმ პირების ვინაობა ვინ უჭერდა ან არ უჭერდა მხარს მოსამართლეს საქმის პროკურატურისთვის გადაცემას ან სადისციპლინო საქმის აღძვრას.
"ჩვენ, გვსურს გასაჯაროვდეს ყველა ის პროცედურები, ვინ რა საკითხი დააყენა, ვინ დაუჭირა მხარი პროკურატურაში საქმის გადაცემას და ვინ არ დაუჭირა, ვინ დაუჭირა მხარი და ვინ არ დაუჭირა სადისციპლინო საქმის აღძვრას და გასაჯაროვდეს ასევე სარეკომენდაციო წერილის შინაარსიც, რომელიც მიიღო გუჯაბიძემ, თუ ამას კონფიდენციალობის მიზნით არ გააკეთებს იუსტიციის უმაღლესი საბჭო, კეთილი ინებოს გუჯაბიძემ და თვითონ მისცეს საზოგადოებას ახსნა-განმარტება, რაზე მიიღო სარეკომენდაციო წერილი და წაგვიკითხოს ბარათის შინაარსი. ვიმეორებ, მინიმუმ გუჯაბიძე არის შემჩნეული თაღლითობაში და სახელმწიფო სახსრების მითვისებაში, მაქსიმუმ, მის წინააღმდეგ მიმდინარეობს დევნა და პროკურატურას ის ყავს მიბმული, როგორც ყავდა ურთმელიძე. საჯაროდ ვაცხადებთ, ჩვენ არ ვენდობით, გუჯაბიძეს, არ ვენდობით სასამართლო საქმიანობაში იყოს ადამიანი, რომელიც შემჩნეულია ასეთ თაღლითობაში,"_განაცხადა გვარამიამ.
"გურია ნიუსი" სააპელაციო სასამართლოს პრესსამსახურს დაუკავშირდა, სადაც აღნიშნავენ, რომ თუ ნათია გუჯაბიძე მედიასთან კომენტარის გაკეთებას ისურვებს, შეგვატყობინებენ.
ანალოგიური პასუხი გაგვცეს იუსტიციის უმაღლეს საბჭოშიც. როგორც საბჭოს პრესსამსახურში "გური ნიუსს" უთხრეს, აღნიშნულთან დაკავშირებით ინფორმაციას არ ფლობენ. რაც შეეხება განცხადების გაკეთებას, საბჭოს გადაწყვეტილება ამის შესახებაც უცნობია.
