"მე იმედი მაქვს ამ საკითხთან დაკავშირებით ბოლოსდაბოლოს გაიმართება კონსულტაციები და პარლამენტი თავის პოზიციას დააფიქსირებს", _ ასე უპასუხა პრეზიდენტმა გიორგი მრგველაშვილმა "აჭარის" ტელევიზიის გადაცემა "ფაქტორში", ჟურნალისტ ლაშა ზარგინავას კითხვას – კვლავ ღიად რჩება, უზენაესი სასამართლოს მოსამართლეობის კანდიდატურების საკითხი? რამდენად მოსალოდნელია, ამ თემასთან დაკავშირებით პოლიტიკური კონსულტაციები გაიმართოს უმრავლესობასთან?
"ოთხი თვის წინ ჩვენ წამოვაყენეთ კანდიდატები, როდესაც მურუსიძემ დატოვა სასამართლო. ჩვენ წამოვაყენეთ ის ადამიანი კანდიდატად, რომელიც ნამდვილად უმნიშვნელოვანესი, პრინციპული მოსამართლეა და ნამდვილად შეცვლიდა იმ პრაქტიკებს, რომელიც იყო სასამართლოში, ეს არის ქალბატონო ანა დოლიძე. მერე კიდევ წამოვაყენეთ მოსამართლეები იმიტომ, რომ სასამართლოს სჭირდება ეს მოსამართლეები უზენაეს სასამართლოში. ოთხი თვე გადის და არ ჩამოყალიბდა არც უმრავლესობა პარლამენტში და არც ოპოზიცია. ოპოზიციაში ვგულისხმობ "ნაცმოძრაობას"; "თავისუფალ დემოკრატებთან" კარგი თანამშრომლობა მიმდინარეობს. ვერ ჩამოყალიბდნენ იმასთან დაკავშირებით სასამართლოს მისცენ და დაახმარონ მოსამართლეები. კრიტიკა ძალიან ხშირად გვესმის, ხშირად გვესმის, რომ არ მოსწონთ გადაწყვეტილებები, ხშირად გვესმის სასამართლოზე ცუდი, მაგრამ ის, რომ შენ როგორც პოლიტიკოსი, პირველ რიგში პარლამენტარი ვალდებული ხარ დაეხმარო სასამართლოს და დანიშნო მოსამართლეები. ამ საკითხთან დაკავშირებით რაღაცნაირი სიჩუმეა, მინდა გულწრფელად ვთქვა ის სისტემა, რომელიც აგებული იქნა "ნაციონალური მოძრაობის" დროს სასამართლოსთან მიმართებაში და სისტემა, რომელიც რეალურად საერთო სასამართლოს არა ფუნქციორებადს ხდიდა, მე ამ სისტემის შეცვლაში დღეს "ქართულ ოცნებას" ვერ ვხედავ მოკავშირედ და ვერც "ნაცმოძრაობას" ვხედავ მოკავშირედ. არცერთი არ გახდა მოკავშირე იმაში, რომ რეალურად შეიცვალოს და უკეთესი, ძლიერი გახდეს სასამართლო. ეს სისტემა ააგეს "ნაციონალური მოძრაობის" წევრებმა და "ქართული ოცნების" წევრები ამ სისტემას ინარჩუნებენ. მათ არ აქვთ ეს განცდა, რომ დროზე არის რაღაცა შესაცვლელი, შესაბამისად მოგახსენებთ, რომ ჯერჯერობით იმ სამი მოსამართლეზე, რომელიც უკვე პარლამენტში განხილულია ვერანაირ გადაწყვეტილებას ვერ ვხედავ. ეს გადაწყვეტილება მე კი არ მჭირდება, ეს გადაწყვეტილება სჭირდება ქართულ სასამართლოს", _ განაცხადა გიორგი მარგველაშვილმა.
