"მედია დღეს უმნიშვნელოვანეს როლს ასრულებს ქართულ პოლიტიკურ და საზოგადოებრივ ცხოვრებაში",_ განაცხადა გადაცემა "ფაქტორში" საქართველოს პრეზიდენტმა, გიორგი მარგველაშვილმა.
ჟურნალისტის კითხვაზე – დემოკრატიული ინსტიტუტების არსებობისა და ზოგადად ქვეყნის დემოკრატიული განვითარების ქვაკუთხედს წარმოადგენს, თავისუფალი მედია. რა გამოწვევებს და მიღწევებს ხედავს ამ კუთხით პრეზიდენტი, დღეს არსებული რეალობიდან გამომდინარე? – გიორგი მარგველაშვილმა შემდეგი სახის კომენტარი გააკეთა:
"ჩვენ შეგვიძლია ნამდვილად ვთქვათ, რომ თავისუფლების 25 წელმა რეალურად გააძლიერა და შექმნა მომუშავე მთელი ფენა ჟურნალისტების, რომელიც სხვადასხვა არხებზე რეალურად ქმნიან საზოგადოებრივ აზრს და ინფორმაციას აწვდიან საზოგადოებას. არის საკითხები, რომელიც გარკვეულ წილად დასაფიქრებელია. შარშან გაუშვეს ერთ-ერთი ყველაზე ძლიერი ჟურნალისტი, ინგა გრიგოლია და დაუხურეს გადაცემა, მერე იყო ქალბატონო ეკა მიშველაძის საქმე, წელს ასევე რამდენიმე ჟურნალისტი გაუშვეს სამსახურიდან, მიმდინარეობს გარკვეული დავები მედიის თაობაზე. ჩვენ ყველამ უნდა გავიაზროთ ერთი რამე კი მედია არის ბიზნესი, მედია არის საქმიანობა, მაგრამ ჟურნალისტი და ჟურნალისტური საქმიანობა არ ეკუთვნის მხოლოდ კომპანიას და ჟურნალისტიც არ ეკუთვნის რეალურად თავის თავს, ის ეკუთვნის საზოგადოებას", _ აცხადებს პრეზიდენტი.
მისივე თქმით, ჟურნალისტი და ჟურნალისტური საქმიანობა ეს არის შემადგენელი ნაწილი სახელმწიფოს დემოკრატიული ფუნქციონირების.
"ჟურნალისტური საქმიანობა ქმნის დემოკრატიულ საზოგადოებას აქედან გამომდინარე ამ საკითხებზე გაურკვეველი პოზიციები, რაღაც კულისებს მიღმა მიმდებარე თემები მიუღებელია ჩემთვისაც და ქართული საზოგადოებისთვისაც. ამიტომ ვკითხულობთ, როდესაც ინგა გრიგოლიას უხურავ გადაცემას, ასეთ წარმატებულ ჟურნალისტს, კითხვა ჩნდება – რატომ? როდესაც ეკა მიშველაძეს უშვებ საზოგადოებრივი მაუწყებლიდან კითხვა ჩნდება – რატომ? როდესაც რაღაცა დაგეშვა მიმდინარეობს პოლიტიკოსების მიერ, რაც შარშან ჩვენ დავინახეთ მობილიზებური მთელი პოლიტიკური სპექტრი "რუსთავი2"-ს წინააღმდეგ. როდესაც ასეთი დაგეშვა მიმდინარეობს "რუსთავი2"-ს წინაღმდეგ, რომელიც არის ყველაზე კრიტიკულიც, მაგრამ ამავე დროს ყველაზე ყურებადი, კითხვის ნიშნები რჩება. და მე მოვუწოდებ ყველა პოლიტიკოსს, მაღალი თანამდებობის პირს, ყველა სახელმწიფო მოხელეს, რომ გაიაზრონ მნიშვნელობა იმისა, რომ მედიასთან ურთიერთობა არის საჭირო ძალიან ფრთხილად თავის გადაწყვეტილებებში, თავის კომენტარებში და თავის შეხედულებებში", _ განაცხადა პრეზიდენტმა.
