„ქართული ოცნების“ ცენტრალურ ოფისში, გუშინ, შუალედური არჩევნების შედეგები განიხილეს _ „გურია ნიუსის“ ინფორმაციით, ოზურგეთის მუნიციპალიტეტის სოფელ ნასაკირალში „ქართული ოცნების“ დამარცხება მწვავე განხილვის თემა იყო.
შეხვედრას პარტიის ოზურგეთის ოფისის წარმომადგენლები _ გურიის გუბერნატორის მოადგილე სოსო ერქომაიშვილი, ოზურგეთის მუნიციპალიტეტის საკრებულოს თავმჯდომარე დავით დარჩია (დარჩია “ქართული ოცნების“ რაიონული ორგანიზაციის თავმჯდომარეა), მუნიციპალიტეტის გამგებელი მერაბ ჭანუყვაძე და ქალაქ ოზურგეთის მერი ბეგლარ სიორიძე ესწრებოდნენ.
შეხვედრაზე, რომელიც რამდენიმე საათი გაგრძელდა, ყველაზე მეტი საყვედური გურიის გუბერნატორის მოადგილეს სოსო ერქომაიშვილს ერგო, რომელსაც „არჩევნები ჰქონდა ჩაბარებული“ და 21 მაისამდე ამტკიცებდა, რომ დიდი უპირატესობით მოიგებდა კიდეც.
აღნიშნულ ინფორმაციას ჩვენთან საუბრისას ერქომაიშვილი ადასტურებს და ამბობს, რომ ეს ჩვეულებრივი პროცესია…
_ ბატონო სოსო, როგორც გვითხრეს, გუშინ, პარტიის ცენტრალურ ოფისში ბევრი საყვედური მიიღეთ…
_ ყველაფერი გცოდნიათ და საინტერესოა, ვინ გაწვდით ამ ინფორმაციას… არაფერი განსაკუთრებული არ მომხდარა _ ადგილობრივი ორგანიზაცია დაიბარეს ცენტრალურ ოფისში. ვიმსჯელეთ პრობლემებზე, გავაანალიზეთ ყველაფერი, ავხსენით, ჩვენი მხრიდან სად იყო შეცდომა დაშვებული და რა პრობლემებია საზოგადოებაში.
_ საზოგადოებას რომ საყვედურობთ, პრობლემას თქვენ მუშაობაში ვერ ხედავთ?
_ არ ვსაყვედურობ. ძალიან მარტივად გეტყვით _ როცა 9 წელიწადი არაფერი გაკეთდება და 2012 წლის შემდეგ ყველაფერი კეთდება, მათ შორის გაზი, გამრიცხველიანება თავისი სადენებით, გზა, წყალი _ მე სხვანაირად ვაკეთებ ანალიზს. ორ ნაწილად ვყოფ პრობლემას _ ერთია ჩვენ მიერ დაშვებული შეცდომები, მეორე მხრივ კი საზოგადოებრივ აზროვნებას ვაკვირდები. ამდენი რამე გააკეთა „ქართულმა ოცნებამ“ და რა ხდება?! რომ ჰქონოდათ „ნაციონალებს“ რაღაც პროექტები გაკეთებული, ჩვენც გაგვეკეთებინა შემდეგ და მაინც „ნაციონალებისთვის“ მიეცათ ხმა, ეს ნორმალური იქნებოდა და ვიფიქრებდით, რომ რაღაც დავაკელით. მაგრამ როცა 9 წლის განმავლობაში ნასაკირალში და მთელ გურიაში „ნაციონალურ მოძრაობას“ ერთი ქვა არ გადაუტრიალებია და ნასაკირალის მოსახლეობა ისევ „ნაციონალებს“ აძლევს ხმას, ესაა დასაფიქრებელი.
_ დასაფიქრებელი ის არ არის, რომ ნასაკირალში, სადაც მაჰმადიანი მოსახლეობა ცხოვრობს, დამოუკიდებელი საქართველოს ისტორიაში ოპოზიციის კანდიდატმა პირველად გაიმარჯვა?
_ ჩვენ დავარწმუნეთ მოსახლეობა, რომ ეს არის წინ გადადგმული ნაბიჯი დემოკრატიული განვითარების თვალსაზრისით _ვგულისხმობ კანდიდატად ქალბატონის დაყენებას.
_ თუმცა ამ ქალბატონის მეუღლე პოლიციელია, რომლის მიმართაც ნასაკირალში ბევრი შეკითხვა არსებობს…
_ გუშინ ქათამაძის (ნასაკირალის მაჟორიტარი დეპუტატი ბესო ქათამაძეა ავტ.)კომენტარი წავიკითხე, რომ „ქართული ოცნება“ ვიღაცეებს აშინებს…
_ კითხვებზე არ მპასუხობთ, ბატონო სოსო…
_ ეს პასუხია. პასუხია იმის, რომ არავინ არავის აშინებს და პირიქით, ამ ბიჭმა დაიწყო საარჩევნო კამპანია ტყუილით და დღემდე აგრძელებს ტყუილებს.
_ ბესო ქათამაძემ რომ არჩევნები საკმაოდ დიდი უპირატესობით მოიგო, ამას რატომ არ აღიარებთ?
_ რა თქმა უნდა, ფაქტი დამდგარია და ამის ა აღიარება არის არაგონივრულობა, მაგრამ არსებობს დეტალები _ ამ ბიჭმა ტყუილებით დაიწყო. ამბობდა, რომ გამრიცხველიანების საკითხი მან დააყენა, რომ წყალი მისი დაძალებით გაკეთდა და ალბათ, გულუბრყვილო ამომრჩეველმა დაუჯერა.
_ როგორ ფიქრობთ, თქვენ რატომ არ დაგიჯერათ? იგივეს ხომ თქვენც ამბობდით შეხვედრების დროს…
_ ეს არ ვიცი. მე რატომ არ დამიჯერა, ეს ჰკითხეთ მოსახლეობას. ქათამაძემ კარგად იცის, როგორი ტყუილებით გაბერა ნასაკირალი. 9 წელი არაფერი გაკეთებულა და 2012 წლის შემდეგ ყველაფერი გაკეთდა. ნუთუ ამას არ უნდა დავუკვირდეთ? ეს ხომ ანომალიაა?!
_ რა არის ანომალია?
_ ჩვენ, დემოკრატიულობის პრინციპით, კანდიდატად ქალბატონი წარვადგინეთ და ეს მისაღებია.
_ ეს რა შუაშია იმასთან, როცა თქვენ ამომრჩეველს შეურაცხყოფას აყენებთ?
_ მე არ ვაყენებ შეურაცხყოფას _ მე მოსახლეობას მივუთითებ სწორი და ობიექტური აზროვნებისკენ.
_ რას ნიშნავს სწორი აზროვნებისკენ მითითება? არასწორად აზროვნებენ გურიაში მცხოვრები ამომრჩევლები?
_ 9 წელი არაფერი გაკეთებულა და ჩვენ გავაკეთეთ _ ეს ფაქტებია. დეტალური ინფორმაცია მაქვს, რომ 9 წელი არაფერი გაკეთებულა.
_ 2012 წლამდე თქვენ გურიაში არ ყოფილხართ, არც მას შემდეგ.. ორი წლის წინ დაინიშნეთ თანამდებობაზე და რა ინფორმაცია გაქვთ გურიაში განვითარებულ მოვლენებზე?
_ მე ყველა ის ინფორმაცია მაქვს, რაც არის საჭირო.
_ თქვენს მიმართ ბევრი შეკითხვა არსებობს _ როგორც წყარომ გვითხრა, არჩევნები მიზანმიმართულად წააგეთ იმიტომ, რომ გამხდარიყავით პარტიის რაიონული ორგანიზაციის თავმჯდომარე და შემდეგ დეპუტატობის კანდიდატობისთვის გებრძოლათ.
_ თითქოს მე მინდა პარტიის თავმჯდომარეობა ან დეპუტატობა, ძველმოდური, გაცვეთილი ვარაუდები და მექანიზმია. ამას ადრე სჩადიოდნენ და შეიძლება, დღესაც სურს ვინმეს იგივეს გაკეთება. ეს ჭორები ქართული ანდაზას მაგონებს _ „მელას რაც ესიზმრებოდა, ის ელანდებოდაო“.
მაგას სოსო ერქომაიშვილი „ნიტო შტო“ არ გააკეთებს, არც იკადრებს იმიტომ, რომ არ სჭირდება. მე ვარ იმ თაობის ადამიანი, რომელსაც მსგავსი ტიპის მექანიზმებთან არასდროს ჰქონია შეხება. ეს ჩემს ფსიქოლოგიაში არ ზის და თუ ვინმე ცდილობს, რომ ასე შემოატრიალოს, არ გამოუვა. ეს საკითხი, იმდენად გამჭირვალეა, რომ დამერწმუნეთ, ხალხი დაიხოცება სიცილით.
_ გურიაში „ნაციონალურმა მოძრაობამ“ არჩევნები ჯერ კიდევ 2007 წელს წააგო. 2012 წელს საკმაოდ დიდი უპირატესობით გაიმარჯვა „ქართულმა ოცნებამ“ და რა მოხდა 2016 წელს, როცა თქვენ დაგავალეს საარჩევნო კამპანიის წარმართვა? ადამიანს, რომელიც სულ ორი წელია, რაც პოლიტიკურ ასპარეზზე გამოჩნდა… ყოველ შემთხვევაში, საზოგადოებას სხვა ინფორმაცია არ აქვს…
_ ვსწავლობდი მანამდე.
_ სად?
_ სასწავლებელში _ ადგილობრივი თვითმმართველობის მაგისტრი ვარ, _ გვითხრა ერქომაიშვილმა.
გუბერნატორის მოადგილე ამბობს, რომ თუ პარტიას დასჭირდება, მზად არის თანამდებობაც დატოვოს.
_ მე, როგორც გუნდური მოთამაშე, ვიღებ პასუხისმგებლობას, მაგრამ იქ კიდევ არის ჩაშლა _ ყველამ კარგად იცის, რა მოხდა, როგორ მოხდა და რანაირად მოხდა.
_ პარტიის ოფისში მერაბ ჭანუყვაძის და დავით დარჩიას დანაშაული ხომ არ გამოიკვეთა?
_ ეს მერაბს და დავითს ჰკითხეთ. კიდევ ერთხელ ვიმეორებ, რომ „ქართულმა ოცნებამ“ გააკეთა ყველაფერი და ნასაკირალში არჩევნები მჟავანაძემ და ქათამაძემ მოიგეს ტყუილებით.
_შეუსრულებელი დაპირებები არც „ქართულ ოცნებას“ აკლია…
_ მე ჩამოვთვალე შესრულებული დაპირებები. სოფელში რაც უნდა გაკეთებულიყო, გაკეთდა _ წყალი, გზა, შუქი, გამრიცხველიანება. ბრმები ვართ თუ რა ხდება?
_ ნასაკირალის გამრიცხველიანების პროექტი 2012 არსებობდა და ეს უნდა გცოდნოდათ, თუმცა, ეს საუბრის სხვა თემაა. ბატონო სოსო, რა იქნება მომავალში _ რჩებით პარტიაში და გუშინ წასვლისკენ მიგითითეს?
_ არსებობს პრობლემები, მათ შორის მოქალაქეთა მიდგომები ჩანს ზოგადად არასწორად _ ჩემი ლოგიკიდან გამომდინარე, აქ არის კითხვები. ალბათ, სამუშაოა ჩასატარებელი, ხალხისთვის უფრო მეტი ინფორმაციის მიწოდებაა საჭირო და ჩვენის მხრიდან სამოქალაქო საზოგადოების განვითარებისკენ მიქცევა, რომ მსგავსი ტიპის შეცდომა არ დაუშვან.
_ პარტიაში არ არის სამუშაო ჩასატარებელი?
_ ჩვენ განვიხილეთ პრობლემები, მათი იდენტიფიცირება მოვახდინეთ და გამოვასწორებთ. თუ ვინ და როგორ, ამას მომავალი გვიჩვენებს.
_ ჩვენ გვაქვს ინფორმაცია რომ ეს ადამიანი თქვენ არ იქნებით…
_ თუ საჭირო გახდა და თუ პარტია მიიჩნევს, რომ სოსო ერქომაიშვილი უნდა გაერიდოს პროცესებს გურიაში, აქედან გამომდინარე, დატოვოს თანამდებობა, როგორც პოლიტიკურ პარტიაში, ასევე, გუბერნიაში და ეს გამოადგება პარტიას განვითარებისთვის, რა თქმა უნდა, სახელმწიფოებრივი მიდგომებიდან გამომდინარე, გადავდგამ სწორ ნაბიჯებს, _ გვითხრა ერქომაიშვილმა.
ჩვენ შევეცადეთ გუშინდელი შეხვედრის შესახებ კომენტარები სხვა პირებისგანაც მოგვეპოვებინა. თუმცა, არც დავით დარჩიამ, არც მებარ ჭანუყვაძემ და არც ბეგი სიორიძემ ამ თემაზე საუბარი არ ისურვეს.
