ქალაქ ოზურგეთის ისტორიულ მუზეუმში ამერიკაში მოღვაწე ქართველი მოჯირითის ალექსი გოგოხიას შვილიშვილი რიჩარდ ჯორდიანი-გოგოხია იმყოფებოდა. მუზეუმში შედგა მისი წიგნის _ "გურულ მოჯირითეთა ქრონიკების" პრეზენტაცია. წიგნი ამ ეტაპზე ინგლისურ ენაზე არის გამოცემული.
"რიჩარდ ჯორდიანი წარმოშობით ქართველია. მისი ბაბუა იყო ალექსი გოგოხია, მოჯირითე. ის გაიქცა ამერიკაში და შეუერთდა გურულ მოჯირითეებს.
რიჩარდი კერძო პირია, რომელიც 2000 წელს ჩამოვიდა გურიაში, რადგან მისი ბაბუის ამბები დეტალურად შეესწავლა. ეს ადამიანი 16 წელი იძიებდა საინტერესო მასალებს და შემდეგ დაწერა წიგნი.
რიჩარდმა მითხრა, რომ 50 წლის იყო, როდესაც ბაბუამისის სურათს მიაგნო და სწორედ, ამის შემდეგ შეუდგა დეტალურად გურულ მოჯირითეებზე ყველა დოკუმენტის შესწავლას. ამ ეტაპზე წიგნი მხოლოდ ინგლისურ ენაზე არის გამოქვეყნებული და იმედი მაქვს ქართულ ენაზეც მალე დაიბეჭდება. ეს წიგნი, მინდა გითხრათ, რომ შეავსებს გურიის ისტორიას და ეს ჩვენთვის მნიშვნელოვანია. უნიკალური ფოტოები და დოკუმენტები არის წიგნში გამოქვეყნებული", _ თქვა ღონისძიებაზე ისტორიული მუზეუმის ფონდის მცველმა მანანა ლომაძემ.
რიჩარდ ჯორდიანიმ შეხვედრაზე აღნიშნა, ახლა ეძებს გამომცემლობას, რომელიც უზრუნველყოფს წიგნის ქართულ ენაზე მომზადებასა და დაბეჭდვას.
მან ისტორიულ მუზეუმს უნიკალური დოკუმენტები და ფოტოები გადასცა საჩუქრად. საჩუქრის გარეშე არც სტუმარი დაუტოვებიათ მასპინძლებს.
მოგვიანებით სტუმრებმა სოფელ დვაბზუში შალვა რადიანის სახელობის მუზეუმში გადაინაცვლეს და გურული ეთნოგრაფიული ექსპონატები დაათვალიერეს. რადიანის სახელობის მუზეუმში სპეციალური ღონისძიება მოეწყო. ადგილობრივებმა გურიის შესახებ საინტერესო ინფორმაციები მიაწოდეს სტუმრებს. ასევე ანახეს, როგორ ხვდებიან ოზურგეთში სტუმრებს, ახალგაზრდებმა კი ქართული ხალხური სიმღერები შეასრულეს.
