სოციალურ ქსელში ორი დღეა არ ცხრება ვნებები რადიო "თავისუფლების" ჟურნალისტის სალომე ასათიანის ინტერვიუს გამო, რომელიც მან ბიძინა ივანიშვილთან ჩაწერა. იმდენი ითქვა და დაიწერა, რომ ამის განხილვით მკითხველს თავს აღარ შევაწყენთ. საზოგადოების ერთი ნაწილი ჟურნალისტს მოუმზადებლობაში და არაპროფესიონალიზმში ადანაშაულებს. სხვა ჯგუფმა ბიძინა ივანიშვილი ჩიხში შესული და ამის გამო გაბრაზებული აღმოაჩინა.
საერთაშორისო ურთიერთობათა ექსპერტი, პოლიტოლოგი დავით ჩხეიძე მიიჩნევს, რომ გუშინდელი ინტერვიუს შემდეგ დამარცხდა არა ჟურნალისტი ან მისი რესპონდენტი, არამედ ქართული საზოგადოების დასავლურად განწყობილი ნაწილი.
"რადიო "თავისუფლების" ინტერვიუ ბატონ ბიძინა ივანიშვილთან ერთმნიშვნელოვნად იყო მარცხი და არა მხოლოდ კერძო ჟურნალისტის, არამედ საქართველოს ე.წ "დასავლურად განწყობილი ნაწილის". არ აქვს მნიშვნელობა ქალბატონი სალომე ასათიანი როგორი ჟურნალისტია, რამდენად მზად იყო და ჰქონდა ამისი უნარები "ქართული Hardtalk"-ის წასაყვანად… ჩვენ ძალიან დიდი ფულის და შესაძლებლობების მქონე ერთ ადამიანს, რომლის მიზნებიც დღემდე ჩვენთვის ბოლომდე გამოუცნობია, ეკონომიკურად გამოშიგნულ ქვეყანაში ვერ ვუპირისპირებთ სამოქალაქო საზოგადოებას, რომელიც იქნება ერთდროულად პოლიტიკურად მიუკერძოებელი, მართალი და შეძლებს საკუთარი მამხილებელი შეკითხვების თუ შეტევების დასაბუთებას.
ცხადია, რომ წრე რომელშიც მიღებულია ქალბატონი სალომე ასათიანი თუნდაც იმიტომ რომ რადიო "თავისუფლების" ჟურნალისტია, შეეცდება დაიცვას, გაამართლოს და შეაქოს ის, მაგრამ მარტო მეგობრობის ან კოლეგიალურობის გამო, არამედ ამითი იმ მარცხის დასაფარად, რომელიც მოუვიდა არა ერთ ჟურნალისტს, არამედ მოსდის მთელ სამოქალაქო საზოგადოებას საქართველოში, სწორედ მისი ჩაკეტილობის და მიკერძოებულობის გამო.
ერთი ან რამდენიმე წრე, რომელიც მიიჩნევა დასავლურად, არ ცდილობს აიღოს პასუხისმგებლობა იმაზე, რომ საკუთარი კუდაბზიკობით – რასაც დღეს დასავლურობა ჰქვია – გამოიკეტა საკუთარ თავში, დაშორდა ქართული საზოგადოების უდიდეს ნაწილს, რომელსაც სინამდვილეში უნდა ემსახურებოდეს, რომელშიც უნდა ზრდიდეს და აყალიბებდეს სამოქალაქო თვითშეგნებას… და დღეს ქვეყანაში ერთი პიროვნება პირდაპირ თუ ირიბად ფლობს ყველა პოლიტიკურ და ეკონომიკურ ბერკეტს… და ყველაზე მეტად ბატონი ბიძინა ივანიშვილის ძალაუფლებაზე პასუხისმგებლობა სწორედ საზოგადოების ამ ნაწილს ეკისრება.
გუშინ "სალომე ასათიანმა" კი არ გამოკეტა საკუთარ თავში ყველაზე გავლენიანი ადამიანი ქვეყანაში, არამედ აჩვენა რამდენად საკუთარ თავში, საკუთარ ბრალდებებშია გამოკეტილი და რამდენად უსუსურია ამ ადამიანის წინაშე საქართველოში "სამოქალაქო საზოგადოება". ვერ მოხერხდა არათუ ბატონი ბიძინა ივანიშვილის ნამდვილი მიზნების გაცხადება (ვერც ერთის!) ვერ მოხერხდა მისი მწობრიდან გამოყვანა (და ამისი დანახება საზოგადოებისთვის) და რაც ამ პიროვნებისთვის დამახასიათებელია პირად საუბრებში.
შედეგიც სახეზეა, ქვეყანას დაუფლებულია ყოვლისშემძლე ერთმმართველი, ხოლო საზოგადოების ჯგუფი, რომელიც დასავლეთთან, თანამედროვეობასთან, მომავალთან აიგივებს საკუთარ თავს ემიჯნება "ბნელ საზოგადოებას" – მართლმადიდებელ მრევლს, ჰომოფობ ახალგაზრდობას, რუსეთუმე საქმოსნებს, "ჩარჩენილ ეროვნულებს", "რუსეთის მონებს"…
თქვენ, საქართველოს გულისთვის, ქართული საზოგადოების დასახმარებლად, გასათანამედროვებლად, გასახსნელად გაძლევენ გრანტებს, გამზადებენ, ხელს გიწყობენ და თქვენ თქვენი "სვეცკაობით", "პრადვინუტობით", უცხოეთში წასვლა-ჩამოსვლით, თავის მოწონებით საზოგადოება ერთი ადამიანის ხელებში შემყურედ აქციეთ! ყველა ნაკლი, რომელსაც უწუნებთ საზოგადოებას, პირველ რიგში თქვენი ბრალია. გუშინდელი გადაცემაც იყო – ერთ-ერთი ასეთი – სამოქალაქო საზოგადეობის სრული მარცხი:
დაუსაბუთებელი!
არათანმიმდევრული!
ერთხელაც ვერ შეიყვანა ჟურნალისტმა რესპოდენტი ლოგიკურ ჩიხში, არა კითხვების შინაარსი იყო ჩიხური, არამედ საუბრის ფორმა. შედეგად, ერთადერთი, ყოვლისშემძლე ადამიანი ქვეყანაში, რომელიც უნდა დასუსტებულიყო, კიდევ უფრო გაძლიერდა!"-წერს დავით ჩხეიძე.
