საოკუპაციო ზოლზე მცხოვრები ადამიანების დახმარების მიზნით, გერმანული საერთაშორისო ორგანიზაცია "საქართველოს არბაითერ-სამარიტერ-ბუნდი"(ASB), საქველმოქმედო ჰუმანიტარული ცენტრი "აფხაზეთის" ორგანიზებით და ამერიკის სახელმწიფო დეპარტამენტის ფინანსური ხელშეწყობით, შიდა ქართლში პროექტ "სოციალური საწარმოები იძულებით გადაადგილებულ პირთათვის საქართველოში" ახორციელებს.
როგორც ცნობილია, პროექტის ფარგლებში დაარსდა: სოციალური საწარმო "სახლი საზღვრების გარეშე," სოციალური საწარმო "ბერბუკის საბავშვო ბაგა-ბაღი,"ტყვიავის თემში დაარსებული საკვირაო სკოლა, სოციალურ საწარმო "ლიახველი ოსტატები," სოციალურ საწარმო "ერგნეთის რძის პროდუქტები"და მოძრავი ავტო სახელოსნო "მეჯუდა-2015."
"გურია ნიუსმა" საქველმოქმედო ჰუმანიტარული ცენტრი "აფხაზეთის" ორგანიზებით მოწყობილი მედიატურის ფარგლებში სოციალური საწარმო "ერგნეთის რძის პროდუქტები"და მოძრავი ავტო სახელოსნო "მეჯუდა-2015 მოინახულა.
როგორც ცნობილია, სოციალურ საწარმოში "ერგნეთის რძის პროდუქტები" ხუთი ადგილობრივი მაცხოვრებელია დასაქმებული. პროექტი ტრადიციული მეურნეობის აღორძინებას (მეცხოველეობას, რძის პროდუქტების წარმოებას) ღარიბი მოსახლეობის დახმარებასა და სოფლის შენარჩუნების პროცესის მხარდაჭერას ისახავს მიზნად.
აღნიშნული საწარმო გიორგი კასრაძემ, არასამთავრობო ორაგანიზაცია "დარსის" და "წითელი ჯვრის", ასევე ადგილობრივი მაცხოვრებლების დახმარებით, 5 თვის წინ დააფუძნა და ჯერ კიდევ მშენებლობის პროცესშია.
გიორგი კასრაძის თქმით, წარმოებული რძის პროდუქტის რეალიზებას გორის ბაზარზე ახდენენ, რადგან ერგნეთის ბაზრობის ადგილას 2008 წლის ომის შემდგომ სამხედრო ბაზაა განთავსებული.
"მშენებლობის პროცესში ადგილობრივი მაცხოვრებლები ფიზიკური შრომით დაგვეხმარნენ, არც გამგეობას და არც არავის თანადგომა არ გაუწევიათ. ამ ეტაპზე 60-70 ლიტრი რძის მოპოვებასა და დამუშავებას ვახერხებთ, ხოლო წელიწადნახევარში, ორ წელში ვგეგმავთ, რომ წარმოება გავაორმაგოთ. გვყავს 20-სულამდე საქონელი, მათ შორის სამი ხბო და ღორების მომრავლებასაც ვგეგმავთ, წარმოებული პროდუქტის რეალიზებას გორის ბაზარზე ვახდენთ,"_ ამბობს გიორგი კასრაძე.
მისივე თქმით, სოფელში საზღვარი გაღობილია, რის გამოც, სხვა საოკუპაციო ზოლთან მდებარე სოფლების განსხვავებით ადამიანებს მესაზღვრეები არ იჭერენ.
"სოფლის საზღვარი გამაგრებულია და აქ ადამიანების გატაცება ოსების მიერ სხვა სასაზღვრო სოფლების მსგავსად არ ხდება, "_აღნიშნავს კასრაძე.
როგორც ცნობილია, ერგნეთი რამდენიმე დღის წინ დაისეტყვა, თუმცა გიორგი კასრაძის თქმით, ზარალის აღწერა არ მომხდარა.
"სეტყვის შედეგად მოსავლის 70% განადგურდა, მაგრამ ზარალის აღწერა არ მომხდარა. ადგილობრივი ხელისუფლება დაზარალებულებს ჰექტარზე 100 ლარით დახმარებას დაპირდა,"_ გვითხრა მან.
მისივე თქმით, სოფელში კომუნიკაცია, ამბულატორია, სკოლა არის, მაგრამ საბავშვო ბაღი არ აქვთ, რის გამოც მოსახლეობის ნაწილს ქალაქში უწევს წასვლა.
"გურია ნიუსი" ადგილობრივ მაცხოვრებელსა და საწარმოს ერთ-ერთ თანამშრომელს გაესაუბრა, რომლის თქმითაც, სოფელს ძალიან ბევრი პრობლემები აქვს, მაგრამ ხელისუფლებას მხოლოდ წინასაარჩევნო პერიოდში თუ ახსენდება მათი არსებობა.
"პრობლემები ძალიან ბევრია, მაგრამ ხელისუფლებას მხოლოდ წინა საარჩევნო პერიოდში ვახსენდებით, თუმცა გაცემულ დაპირებებს აღარ ასრულებენ. ჩემი ორივე შვილს მკურნალობა ესაჭიროება, განსაკუთრებული კვება სჭირდებათ, თბილისში თვეში ორჯერ დამყავს ექიმთან, პროგრამაში არიან და ექიმთან ვიზიტი უფასოა, მაგრამ გზაშიც საკმაო თანხა გვეხარჯება,"_ თქვა მან.
რაც შეეხება მოძრავ ავტოსახელოსნო "მეჯუდა-2015"-ს, მისი მიზანი დევნილთა დასახლებების; ბუფერული ზონის სოფლების მოსახლეობისათვის სასოფლო-სამეურნეო საქმიანობაში მხარდაჭერა და მათთვის დაზიანებული ტექნიკის შეკეთებაა.
გარდა ამისა, მოძრავი ავტოსახელონო იგოეთი-ხაშურის ჩქაროსნულ გზატკეცილზე და მის მიმდებარე ტერიტორიაზე მძღოლებს ადგილზე მისვლით სთავაზობს ავტომობილის შეკეთების სერვისს.
როგორც ცნობილია, ავტოსახელოსნოში, რომელიც ქარელის რაიონის სოფელ ახალსოფელში, დევნილთა დასახლებაში მდებარეობს, 6 ადამიანია დასაქმებული.
"გურია ნიუსი" ახალსოფელში მცხოვრებ ერთ-ერთ მოსახლესაც გაესაუბრა.
მისი თქმით, მოსახლეობას ელექტრო ენერგია და გაზი მიეწოდება, თუმცა ზამთარში შეშით თბებიან. სოფელს ახალი ავტობანიდან მისასვლელი გზა ფაქტიურად არ აქვს, უფრო მეტიც, ავტობანიდან სოფლისკენ გადასახვევ გზაზე სოფლის აღმნიშვნელი აბრაც კი არ დგას.
"ელექტრო ენერგია და ბუნებრივი აირი მოგვეწოდება, თუმცა გვინდა გაზის გამათბობელები დაგვიყენონ. ჩემი ინფორმაციით, ერთ-ერთ მსგავს დასახლებაში, სადაც დევნილები ცხოვრობენ, არასამთავრობო ორგანიზაციამ საჩუქრად "კარმები" გადასცა. ნეტა, ჩვენც გადმოგვცენ, ზოგიერთ ოჯახს კი აქვს, მაგრამ ზამთარში რამდენი შეშის მოჭრის უფლებას მოგვცემენ, ეგეც ხომ კონტროლს ექვემდებარება,"_თქვა ახალსოფლის მკვიდრმა, რომელმაც ჩვენთან ვინაობის გამხელისგან თავი შეიკავა.
