"გურია ნიუსის" მიერ მოპოვებული ინფორმაციით, შსს ოზურგეთის რაიონულმა პოლიციამ 70 წლის პენსიონერი ნაირა ტყეშელაშვილი, 21 ლარად შეფასებული, ძველი, დამტვრეული ტუმბურის ქურდობისთვის დააკავა.
აღნიშნული ფაქტი რამდენიმე დღის წინ მოხდა _ ქალაქ ოზურგეთში, ყოფილ ძველ საავადმყოფოს შენობაში შესახლებულმა მარტოხელა მოხუცმა ნაირა ტყეშელაშვილმა, იქვე მდებარე დანგრეული შენობიდან აიღო ეს ნივთი და თავის ოთახში დადგა. პოლიცია მოხუც პენსიონერს ქურდობის ფაქტის დროს დაადგა თავზე, რის შემდეგადაც საქმეც აღიძრა და ერთ საათში "გაიხსნა".
ამ ფაქტზე სასამართლო პროცესი 3 ივნისს გაიმართა.
"გურია ნიუსმა" გაარკვია, რომ მსგავსი ფაქტების გამო, ძველ საავადმყოფოში შესახლებულებულმა, დაახლოებით, 50 პირმა მოიხადა სასჯელი: "ზოგს 5-ლარიანი ნივთის გამო, ზოგს 10 და მაქსიმუმ, 21 ლარად შეფასებული დამპალი, ძველი ნივთების, კედლიდან ჩამოყრილი პლასტიკატისა და დამტვრეული "ტუმბოჩკის" გამო მიუსაჯეს პირობითი სასჯელები. მათი უმრავლესობა სოციალურად დაუცველთა ფენას მიეკუთვნება", _ ამბობენ "გურია ნიუსთან" საუბარში ყოფილი საავადმყოფოს ბინადარნი.
ქალაქ ოზურგეთში, უამრავი სოციალურად დაუცველი ადამიანი ცხოვრობს, მაგრამ ყოფილ საავადმყოფოში, ათობით უკიდურესად გაჭირვებული ადამიანის ყოველდღიური ყოფა მეტად მძიმეა _ აქ შესახლებული რამდენიმე ოჯახი შიმშილის ზღვარზეა.
ნაირა ტყეშელაშვილის მეზობელი ნანა სასანია "გურია ნიუსთან" 70 წლის მოხუც პენსიონერზე საუბრობს:
"მოაკითხა პოლიციამ და წაიყვანა, დამპალი "ტუმბოჩკა" და პატარა, ძველი კომოდი აიღო… ვინმესთვის კი არ მოუპარავს _ ეგდო ღია, ჩამონგრეულ შენობაში. დადგა ოთახში და პოლიცია თავზე დაადგა. უპატრონო ქალია, მუშაობა არ შეუძლია. თვითონაც არ იცის, ვინ უჩივლა. თითქმის 2 წელია, გვერდიგვერდ ვცხოვრობთ და მაგის ქურდობა არ გამიგია, მისი კაი ქალობის მეტი არაფერი ვიცი", _ ამბობს ნანა სასანია.
"გურია ნიუსი" ნაირა ტყეშელაშვილის ადვოკატს ესაუბრა _ მანუჩარ გოგრაჭაძე ამბობს, რომ 3 ივნისს, ოზურგეთის რაიონულ სასამართლოში მსგავსი ფაქტის გამო, სამი პირის სასამართლო პროცესი გაიმართა. აქედან, ერთი, 70 წლის ნაირა ტყეშელაშვილია, მეორე _ შორენა სიხარულიძე, რომელსაც მსგავსი "ქურდობისთვის" პირობითი სასჯელი აქვს მისჯილი და ასევე, თემურ ჟორდანია: "რეალურად დანაშაული იკვეთება, რაც სასჯელსაც ითვალისწინებს, პროკურორებიც ითვალისწინებენ დამნაშავეების მდგომარეობას და რასაც ისინი ითხოვენ, იმას უსჯიან_ ეს იქნება პირობითი სასჯელი თუ ფულადი ჯარიმა. იმის გამო, რომ ეს ადამაინები გაჭირვებულები არიან, პროკურატურა ვერ აპატიებს დანაშაულს, თუმცა, შეგვიძლია სხვა მხრიდან შევხედოთ საქმეს _ ეს უფრო სახელმწიფოს პრობლემაა, უნდა ჩამოწერონ ეს უფასო, არაღიარებული ქონება", _ ამბობს გოგრაჭაძე.
იურისტს მიაჩნია, რომ ნივთები, რომელიც უსარგებლოა სახელმწიფოსთვის, უნდა გადაეყარათ: "ხომ შეიძლება ამ ადამიანების მიმართ გავრცელდეს განრიდება, ან გაფრთხილება, ან გამოყარონ გარეთ ეს უსარგებლო ნივთები, წაიღებენ ეს ადამიანები და ქურდობად აღარ ჩაეთვლებათ?! ბევრ მათგანს ქურდობის ბრალი ედებათ სხვა შენობაში შეღწევის მიზნით. შეღწევა ნიშნავს, იმას, რომ შედიხარ დაცულ ობიექტში, საცავში, ბინაში, რომელიც უნდა იყოს აუცილებლად ჩაკეტილ მდგომარეობაში. ეს ყველაფერი მოხდა დანგრეულ შენობაში, რომელსაც არც კარი აქვს და არც _ ფანჯარა. შედის ყველა ჩვეულებრივად. მაშინ გაუკეთე კარი _ მიხვდეს ადამიანი, რომ იქ შესვლა არ შეიძლება. უამრავი ნიუანსია, რომ ამ ადამიანების მიმართ არ დამდგარიყო გამამტყუნებელი განაჩენი. ასეთი ფაქტების გამო, უკვე 50 პირი გასამართლდა. აქედან ბევრია ისეთი, ვინც წერა-კითხვაც არ იცის, ბევრიც _ ღატაკი და უპატრონოა _ ხელისუფლება ასეთი ადამიანების მიმართ უფრო ლიბერალური უნდა იყოს," _ ამბობს ადვოკატი და პოლიციის მიერ "გახსნილ" დანაშაულებზე საუბრობს: "პოლიციასაც უნდა, ბევრი ასეთი ფაქტი მოხდეს _ უცებ გახსნიან და სტატისტიკის კუთხითაც "აწყობთ". პოლიცია ჩასაფრებულია და ელოდება, როდის განმეორდება მსგავსი ქურდობა _ ფაქტობრივად, იქ ზის, ფაქტთან და ვინმეს ჩივილი საჭირო აღარაა".
