საქართველოს საგუნდო საზოგადოების მიერ, ქვეყნის მასშტაბით, ჩატარდა საქართველოს ბავშვთა და ახალგაზრდული საგუნდო კოლექტივების მეორე ეროვნული ფესტივალი, რომელიც მოიცავდა ორ ეტაპს. გურიის რეგიონულ ტურს ლანჩხუთმა უმასპინძლა.
კონკურსის პირველი ეტაპის გადალახვა ლანჩხუთიდან, აკადემიური საგუნდო სიმღერის კატეგორიაში, კულტურის ცენტრთან არსებულმა საესტრადო ვოკალურმა ჯგუფმა (ხელმძღვანელი ნინო ჭელიძე), ხოლო ქართული ხალხური სიმღერისა და ქართული გალობის კატეგორიაში _ ხუხუნაიშვილების სახელობის საეკლესიო გალობისა და ხალხური სიმღერის სკოლის გუნდმა შეძლეს.
კონკურსის დასკვნით ეტაპზე აკადემიური საგუნდო სიმღერის კატეგორიაში მონაწილე ჯგუფებს კონსერვატორიის მცირე დარბაზის სცენამ უმასპინძლა, სადაც ლანჩხუთიდან წარგზავნილმა ვოკალურმა ჯგუფმა მესამე საპრიზო ადგილი დაიკავა.
სალოტბარო სკოლის მოსწავლეები, დასკვნით ეტაპზე, საპატრიარქო ტელევიზიის "ერთსულოვნების" სცენაზე გამოდიოდნენ. აქ ხუხუნაიშვილების სკოლის აღსაზრდელთა წარმატება საკმაოდ შთამბეჭდავი იყო _ მათ ქართული ხალხური სიმღერის კატეგორიაში ფესტივალის ოქროს მედალი და ფულადი ჯილდო _ 600 ლარი მიაკუთვნეს, ხოლო ბრინჯაოს მედალი და 200 ლარი ერგოთ ქართული გალობის კატეგორიაში.
აღსანიშნავია, რომ ხუხუნაიშვილების სახელობის სკოლა 2010 წელს ჩამოყალიბდა თანაქალაქელის, დავით ცინცაძის თაოსნობით. თუმცა, გარკვეული ტრადიციები ამ კუთხით ჩვენს რაიონს მანამდეც ჰქონდა. ქალბატონი ნანული ჩავლეიშვილის ხელმძღვანელობით, წლების განმავლობაში არსებობდა ბავშვთა ანსამბლი "იმედი", რომელმაც არსებობა ქალბატონი ნანულის გარდაცვალების შემდეგ შეწყვიტა. სწორედ ამ ანსამბლის ნიადაგზე აღორძინდა ხუხუნაიშვილების სახელობის სკოლა.
ლანჩხუთის სალოტბარო სკოლის პირველი ხელმძღვანელი გახლდათ ჩოხატაურის მკვიდრი ავთანდილ მახარაძე. მახარაძემ შემდეგ თავისი საქმე უმცროს კოლეგას, მერაბ თურქიას გადაულოცა. ამჟამად კი ხუხუნაიშვილების სახელობის სკოლას გიორგი მთაწმინდელის სახელობის გალობის უმაღლესი სკოლის აღზრდილი, ანზორ ერქომაიშვილის ერთ-ერთი საუკეთესო მოსწავლე, ავთანდილ თურქია ხელმძღვანელობს.
"წელს, კონკურსის მეორე ეტაპზე ლანჩხუთელებმა იმდენად დიდი მოწონება დაიმსახურეს, რომ თავშეკავებულმა ჟიურიმაც კი ტაში დაუკრა. საზეიმო კონცერტზეც მიგვიწვიეს, კონსერვატორიის სცენაზე იმღერეს ჩვენმა ახალგაზრდებმა. აქვე გადასცეს ანსამბლის წევრებს ოქროს მედლები სიმღერისთვის, ხოლო ბრინჯაო _ გალობისთვის. ქალბატონი ნანულის შემდეგ მსგავსი რამ არ მომხდარა, მანამდე "იმედი" სამგზის ოქროსმედალოსანი იყო", _ გვითხრა სკოლის პედაგოგმა მერაბ თურქიამ.