დღეს საარჩევნო კამპანია ოფიციალურად დაიწყო. მიუხედავად ამისა, ამ დრომდე უცნობია იმ ადამიანების ვინაობა, რომლებსაც პარტიები რეგიონებში მაჟორიტარებად წარადგენენ. როგორც პოლიტიკური პარტიების წარმომადგენლები გვეუბნებიან, კანდიდატებთან ჯერჯერობით მოლაპარაკებები მიმდინარეობს და დაზუსტებული ინფორმაცია ივლისის ბოლოსთვის გახდება ცნობილი.
რაც შეეხება დამოუკიდებელ კანდიდატებს; ჩოხატაური-ლანჩხუთის დეპუტატობას რკინიგზის ყოფილი შეფი აკაკი ჩხაიძე აპირებს. როგორც თავად ამბობს „გურია ნიუსთან“, დამოუკიდებლად და პარტიების თანადგომის გარეშე.
ჩვენი ინფორმაციით, გიორგი ვაშაძის ახალი პოლიტიკური ძალა ჩოხატაურსა და ლანჩხუთში მაჟორიტარად გურამ ჩალაგაშვილის კანდიდატურას განიხილავს, რომელსაც ჩალაგაშვილი არ უარყოფს. რაც შეეხება ოზურგეთს, ჩვენი ინფორმაციით, ვაშაძე ოზურგეთში წარსადგენად გურიის გუბერნატორის ყოფილ მოადგილეს პაატა მანჯგალაძეს ამზადებს, რომელიც ჩვენს სატელეფონო ზარებს არ პასუხობს.
„ნაციონალური მოძრაობა“ ჩოხატაურისა და ლანჩხუთის ოლქში ჯერ ჩამოყალიბებული არ არის: _ ამ ეტაპზე მიმდინარეობს მოლაპარაკებები რამდენიმე კარგ კანდიდატთან და ჯერჯერობით ჩამოყალიბებულები არ ვართ. მე პირადად არ ვაპირებ კენჭისყრას და ამის შესახებ გავრცელებული ინფორმაცია არ არის სწორი. რომ დამეყენებინა კანდიდატურა, უარს არ მეტყოდნენ, თუმცა, ვფიქრობ, რომ ამას ვერ გავქაჩავ, _ აღნიშნა ჩვენთან საუბრისას „ნაციონალური მოძრაობის“ ლანჩხუთის ორგანიზაციის ერთ-ერთმა ლიდერმა კახა ასკურავამ.
ლანჩხუთისა და ჩოხატაურისგან განსხვავებით, „ნაციონალები“ ოზურგეთში წარსადგენ კანდიდატურაზე უკვე ჩამოყალიბებულნი არიან:
_ ჯერჯერობით, ოფიციალურად არ გამოცხადებულა ჩემი კანდიდატურის შესახებ, თუმცა, ჩავთვალოთ, რომ გადაწყვეტილია და კენჭს მე ვიყრი, _ გვითხრა პარტიის ოზურგეთის რაიონული ორგანიზაციის ხელმძღვანელმა დავით მჟავანაძემ.
ჩოხატაურისა და ლანჩხუთის გაერთიანებულ საარჩევნო ოლქში წარსადგენი კანდიდატი ჯერ არ შეურჩევიათ „თავისუფალ დემოკრატებს“. ოზურგეთში კი, როგორც გვითხრეს თემურ სალუქვაძის წარდგენას აპირებენ. აღნიშნულ ინფორმაციას სალუქვაძე არც უარყოფს და არც ადასტურებს და ამბობს, რომ პარტიის ლიდერი კანდიდატებს უახლოეს ხანში წარადგენს.
რაც შეეხება პაატა ბურჭულაძის პოლიტიკურ ძალას, გავრცელებულ ინფორმაციას, რომ პარტიის ლიდერი კენჭისყრას გურიაში, კონკრეტულად კი ჩოხატაურსა და ლანჩხუთში აპირებს, არ ადასტურებენ ბურჭულაძის თანაგუნდელები:
_ ჯერ საერთოდ არ განგვიხილავს პაატა იყრის თუ არა მაჟორიტარად კენჭს, _ აღნიშნა ჩვენთან საუბრისას პოლიტიკური მოძრაობის „პაატა ბურჭულაძე _ სახელმწიფო ხალხისთვის“ ერთ-ერთმა ლიდერმა ხათუნა ლაგაზიძემ.
კანდიდატებზე ჯერ ვერ ჩამოყალიბდნენ „ქართულ ოცნებაში“, სადაც აღნიშნავენ, რომ საბოლოო, დაზუსტებული ინფორმაცია აგვისტოში გახდება ცნობილი:
_ ჯერ არც ერთ კანდიდატურაზე გადაწყვეტილება მიღებული არ არის, _ ამბობს „ქართული ოცნების“ პრესსამსახურის ხელმძღვანელი ანა გოჩაშვილი.
აღსანიშნავია, რომ ამ დრომდე ოზურგეთში წარსადგენ კანდიდატად „ქართული ოცნებიდან“ შინაგან საქმეთა მინისტრის მოადგილეს არჩილ თალაკვაძეს ასახელებდნენ და ამ ინფორმაციას ჩვენთან პირად საუბარში კარგად ინფორმირებული წყაროც ადასტურებს, თუმცა, როგორც თალაკვაძე „გურია ნიუსთან“ საუბრისას ამბობს, ამაზე საუბარი არ ყოფილა:
_ ჩემთვის ადამიანობა და სიმართლეზე დაფუძნებული ურთიერთობა ყველაზე ძვირფასია. ამიტომ, თქვენს შეკითხვაზე გიპასუხებთ, რომ საარჩევნო სიის შესახებ კონსულტაციებში მე არ ვყოფილვარ ჩართული და არანაირი შემოთავაზება არ მქონია მონაწილეობაზე. ვმუშაობ ჩემს პოზიციაზე შინაგან საქმეთა სამინისტროში და თუ ეს საკითხი წამოიჭრება, მინისტრისა და ჩემი კოლეგების გარეშე გადაწყვეტილებას არ მივიღებ. რასაც ზოგიერთი მედიასაშუალება წერს გადაუმოწმებლად, არის მხოლოდ ვარაუდი, _ გვითხრა თალაკვაძემ.
რაც შეეხება დანარჩენ პარტიებს _ მათ კანდიდატებზე საუბარი ჯერ არ სურთ და ამბობენ, რომ მათ ვინაობას საზოგადოება მალე გაიგებს.
