ევროპარლამენტში საქართველოსთან უვიზო მიმოსვლაზე გადაწყვეტილება ვერც ამჯერად მიიღეს

"COREPER II-მა საქართველოსთან უვიზო მიმოსვლაზე გადაწყვეტილება ვერც ამჯერად მიიღო. საკითხს მიენიჭა ე.წ. "B სტატუსი" და მას 10 ივნისს ევროკავშირის წევრი ქვეყნების შინაგან საქმეთა მინისტრები განიხილავენ. საბოლოო განაჩენიც მაშინ დადგება", _ ამის შესახებ ინფორმაციას ფონდ "ღია საზოგადოება – საქართველოს" ევროინტეგრაციის მიმართულების მენეჯერი ივანე ჩხიკვაძე აქვეყნებს.

რამდენიმე დღის წინ ჩხიკვაძემ "გურია ნიუსთან" საუბრისას აღნიშნა, თუ საქართველოს ვიზალიბერალიზაციის საკითხი 9-10 ივნისს ჩანიშნულ შეხვედრაზე ვერ განიხილეს, უვზო მიმოსვლის საკითხი ოქტომბრამდე გადაიწევს.

ამასთანავე ჩხიკვაძემ განმარტა ვიზალიბერალიზაციის პროცესისი ძირითადი მიმართულება და აღნიშნა, რომ "9-10 ივნისს იმართება იუსტიციის და შინაგან საქმეთა მინისტრების საბჭო, რომელმაც უნდა მიიღოს პოლიტიკური გადაწყვეტილება. მანამდე ჩანიშნულია ევროკავშირის მუდმივი წარმომადგენლობების ხელმძღვანელების/ელჩების (COREPER II) ორი შეხვედრა (არსებობს COREPER I ელჩების მოადგილეების დონეზე, მაგრამ ის შინაგან საქმეთა და იუსტიციის საკითხებს არ განიხილავს)".

"იმ შემთხვევაში, თუ COREPER II-ზე კონსენსუსი არ შედგა ნებისმიერ ქვეყანას, ვინც მონაწილეობს საკითხის განხილვაში შეუძლია მოითხოვოს დამატებითი დებატები საბჭოში. ასეთ დროს საკითხს ენიჭება ე.წ. "B სტატუსი" შეიძლება დაუბრუნდეს უკან "ვიზის სამუშაო ჯგუფს" ან დისკუსიისთვის გავიდეს იუსტიციის და შინაგან საქმეთა მინისტრების საბჭოზე. ანუ საბოლოო გადაწყვეტილება მიიღონ მინისტრებმა დებატების შემდეგ. გამომდინარე იქიდან, რომ მინისტრთა საბჭოს დღის წესრიგში უკვე არის შეტანილი საკითხი ეს ნიშნავს, რომ თემა ე.წ. "ვიზის ჯგუფში" აღარ დაბრუნდება და გავა შეხვედრაზე ან "A" ან "B" სტატუსით.

ცნობისთვის, COREPER II-ის შემდეგი სხდომა დაგეგმილია 15 ივნისს. ანუ მას შემდეგ რაც ჩატარდება 9-10 ივნისს დაგეგმილი შსს და იუსტიციის მინისტრთა საბჭო. ხოლო მომდევნო შინაგან საქმეთა და იუსტიციის საბჭოს შეხვედრა კი დაგეგმილია 13-14 ოქტომბერს", _ ამბობს ჩხიკვაძე.