“რუსთავი2“-ის კორესპონდენტს ლადო მენაბდეს, რომელიც ურეკის პოლიციაში 5 საათის განმავლობაში იკითხებოდა და ბრალი ადმინისტრაციული სამართლის 173-ე მუხლით წაუყენეს, რაც პოლიციისადმი დაუმორჩილებლობას გულისხმობს.
“შემოგვივიდა ინფორმაცია, რომ ადგილობრივი დეპუტატი სცემეს ურეკში და ამასთან დაკავშირებით ჩამოვედით. ასევე ფეისბუქზე აიტვირთა სტატუსები, რომ კურორტის დაწყების წინ გზის სარებილიტაციო სამუშაოები დაიწყო, რაც მნიშვნელოვნად დააზარალებს საკურორტო სეზონს. ამ თემაზე მუშაობა დავასრულეთ და ვბრუნდებოდით ოზურგეთში. ვიდრე ურეკს დავტოვებდით დამატებით კადრები გადაიღო ოპერატორმა, რომლის დროსაც თავს დაგვესხა პიროვნება, ის მუქარით მოვიდა ჩვენთან და სიტყვიერი შეურაცხყოფა მოგვაყენა.
მას პრეტენზია ჰქონდა რუსთავი 2-ის მისამართით, რომ ჩვენ არასწორად ვაშუქებთ სიუჟეტებს. ამ ადამიანმა ოპერატორს არ მისცა უფლება გადაეღო კადრები. ეს პიროვნება გაგვეცნო ზური ოთხმეზურიად, მაგრამ შემდეგ გავარკვიე, რომ ის იყო ბიძინა ივანიშვილის ოჯახის ახლობელი, გვარად ქიმუცაძე.
სამართალდამცავები მოვიდნენ, მაგრამ ჩვენ არ გვიცავდნენ. ეს ადამიანი აგრძელებდა ჩვენი მისამართით სიტყვიერ შეურაცხყოფებს, თუმცა, პოლიციელებს ამაზე არანაირი რეაქცია არ ჰქონდა. ერთ-ერთმა პოლიციელმა, ამირან ჩეთკურიშვილმა, რომელიც მე გამეცნო ურეკის პოლიციის უფროსად, ადგილიდან გააპარა ეს ქიმუცაძე.“ -_ აღნიშნა მედიის წარმომადგენლებთან საუბრისას მენაბდემ.
ლადო მენაბდე ამბობს, რომ პოლიციელებთან და მოსახლეობასთან მას არანაირი შეხლა-შემოხლა არ ქონია.
“სამართალდამცავმა უბრალოდ სცადა მეხსიერების ბარათის წართმევა და ამ დროს მან ჩაამტვრია მანქანის სარკე. პირიქით, მე სამართალდამცავებს მოვუწოდებდი და ვთხოვდი, რომ გავეშვი.“ – გვითხრა ლადო მენაბდემ.
თვითმხილველების თქმით, ჟურნალისტს მხოლოდ ის უთხრეს, რომ სარემონტო სამუშაოების მიმდინარეობა გადეღო:
_ არაფერი ისეთი არ მომხდარა. ქიმუშაძემ უბრალოდ უთხრა ის კადრები გადაიღეთ სადაც მუშაობა მიმდინარეობსო _ ამას მოჰყვა დაპირისპირება და შემდეგ მოვიდნენ სამართალდამცავები, _ აღნიშნა ერთ-ერთმა თვითმხილველმა, რომელიც პოლიციის შეობის წინ იმყოფებოდა.
ურეკის პოლიციაში ქიმუშაძეც დაკითხეს, თუმცა დაკითხვიდან გამოსულს მედიისთვის კომენტარები არ გაუკეთებია. მისი მეუღლის მტკიცებით კი, ჟურნალისტი პოლიციელს ხელით შეეხო, რასაც კატეგორიულად უარყოფს ლადო მენაბდე.
