"კალა კაპიტალ ლიმიტედის" დირექტორების განცხადებით, კომპანიის მიერ 2016 წლის განმავლობაში არანაირი გადარიცხვა არ განხორციელებულა. ამის შესახებ ნათქვამია "კალა კაპიტალ ლიმიტედის" დირექტორების განცხადებაში, რომლითაც ისინი "ნაციონალური მოძრაობის" მიერ დღეს გავრცელებულ ინფორმაციას ეხმაურებიან.
"ჩვენ, "კალა კაპიტალ ლიმიტედის" დირექტორები – ჯორჯ ათანასი და სუზან კალოგრეიდსი ვაცხადებთ, რომ კომპანიას შექმნის დღიდან არასდროს საოპერაციო-საბანკო ანგარიში კვიპროსში ან სხვა რომელიმე ქვეყანაში არ ჰქონია, შესაბამისად, არანაირი გადარიცხვა კომპანიის მიერ 2016 წლის განმავლობაში არ განხორციელებულა. აგრეთვე, არ გაცემულა მესამე პირებზე უფლებამოსილება საბანკო ანგარიშის გახსნასთან დაკავშირებით", _აღნიშნულია განცხადებაში.
ცნობისთვის, "ალფა-ბანკის" სათაო ოფისშიც აცხადებენ, რომ "ნაციონალური მოძრაობის" მიერ გავრცელებული დოკუმენტი გაყალბებულია.
2030-ის ინფორმაციით, დოკუმენტი, რომელიც "ნაციონალური მოძრაობის" მიერ გავრცელდა, ტელევიზიამ ნამდვილობის დადასტურების მიზნით, "ალფა-ბანკის" სათაო ოფისში გადააგზავნა, საიდანაც შემდეგი შინაარსის ოფიციალური პასუხი მიიღო.
"თქვენს მიერ ბანკის პრესსამსახურისადმი მიწოდებული დოკუმენტი არის გაყალბებული, ყალბია ასევე ბანკის თანამშრომლის ხელმოწერა. გვსურს ასევე აღვნიშნოთ, რომ დოკუმენტში დაშვებულია უხეში შეცდომები, რომლებიც ბანკის მუშაობის სპეციფიკას ეხება, კერძოდ ანგარიშების გახსნას", _ ნათქვამია "ალფა-ბანკის" პრესსამსახურის განცხადებაში.
"ერთიანი ნაციონალური მოძრაობის" ინფორმაციით, "ალფა ბანკში" გახსნილ ანგარიშებზე კორცხელის ინციდენტში მონაწილე სპორტსმენების – ვლადიმერ გეგეშიძისა და გიორგი გიგაურის სახელზე "კალა კაპიტალ ლიმიტედისგან" (კვიპროსი) და რუსეთში მცხოვრები დავით ქარსელაძისგან, იგივე "კალატოზასგან", გარკვეული თანხა გადაირიცხა.
ამავე თემაზე:
"ნაციონალური მოძრაობის" მიერ დღეს გავრცელებული დოკუმენტი გაყალბებულია – "ალფა ბანკი"
რა თანხები გადაურიცხეს კორცხელის ინციდენტში მონაწილეებს "კალა კაპიტალმა" და "კალატოზამ"
