ახალგაზრდების ჯგუფმა ფეისბუქში აქცია წამოიწყო, სახელწოდებით "მშიბზია." ეს აფხაზური სიტყვაა და ქართულად გამარჯობას ნიშნავს. აქციის ორგანიზატორების მიზანია 8 ათასი მისალმება შეაგროვონ, რადგან მათი ინფორმაციით, ზუსტად ამდენი დღეა, რაც აფხაზები და ქართველები ერთმანეთს აღარ მისალმებიან. ახალგაზრდები აცხადებენ, რომ ემიჯნებიან ყველა პოლიტიკურ ჯგუფსა და არასამთავობო ორგანიზაციას და შეეცდებიან, თავად, საკუთარი კონტაქტების საშუალებით მოახერხონ აფხაზ თანატოლებთან კომუნიკაცია.
აქციამ, როგორც მოსალოდნელი იყო, არაერთგვაროვანი რეაქცია გამოიწვია საზოგადოებაში. გამოჩნდნენ როგორც მომხრეები, ისე პესიმისტურად განწყობილი მოწინააღმდეგეები, რომლებიც ამტკიცებენ, რომ ეს ვერ შეცვლის რეალობას.
ახალგაზრდა ინიციატორებმა "ფეისბუქში" გვერდიც შექმნეს, რომელსაც "მშიბზია" ქვია.
"რა არის აფხაზური და რუსული პროპაგანდა? რომ ქართველებს და აფხაზებს ერთად ცხოვრება არ შეგვიძლია, რომ ქართველები ვერ ვიტანთ აფხაზებს და მხოლოდ მათი გადაშენება გვინდა ამ ტერიტორიიდან. ნებისმიერი სკოლის მოსწავლესაც კი ქართველებს აცნობენ, ისე რომ ჩვენი ერთად ცხოვრება მათ გადაშენებას ნიშნავს… და სხვა უფრო მცირე დეტალები: პური გაძვირდა, ქართველების ბრალია, მგელი დარბის სოხუმის გარეუბანში, ქართველების ბრალია და ა.შ. მოკლედ გაჟღენთილი არიან ჩვენზე ნეგატიური ინფრორმაციით. ამას ემატება ყოველ დღიური ნებისმიერი ჩვენი შეხებისას ერთმანეთის ლანძღვა, ნეგატიური კომენტარების დატოვება და რაც მთავარია მუქარა ომით. აფხაზეთში არიან ახალგაზრდები, რომლებმაც არ იციან კარგად, რა ხდება აქეთ ჩვენ მხარეს საქართველოში და შეუძლებელია, არ ინტერესდებოდნენ ჩვენით ისე უბრალო ცნობის მოყვარეობის დასაკმაყოფილებლად მაინც… და ნებისმიერი აგრესია, მუქარა და შეურაცხყოფა დასტური და გაძლიერებაა ამ პროპაგანდის…
რა თქმა უნდა, იქით ბევრია ადამიანი რომელიც შესაძლოა ჩვენი პირდაპირი მტერია, თუმცა უნდა გვახსოვდეს ,რომ მხოლოდ ასე არ არი და ოდესმე მათ უნდა განგვიხილონ, როგორც მათი ყოფის მომავალ ალტერნატივად. არ გვგონია რომ მხოლოდ ერთი პატარა აქციის ან ნებისმიერი ერთი მოქმედებით რამე ძირეულად შეიცვლება, ალბათ ამას ძალიან ბევრი დრო დაჭირდება. თუმცა ეს აუცილებლად მოხდება… ფიქრი იმაზე, რომ ომით ამ პრობლემის მოგვარება შეიძლება, ჩვენი აზრით ძალიან მცდარია, რადგან იმ ტკივილს რომელიც ჯერ არ განელებულა, გავაათმაგებთ და სამუდამოდ დავკარგავთ ამ პრობლემის მოგვარების შანს… მეორე გზა, რომელიც ხშირად ფიქსირდება ხოლმე, რომ დასუსტდება ჩვენი ჩრდილოელი მეზობელი და და შემდეგ ყველაფერი ადვილად მოგვარდება, არარეალურია. ველოდებით უკვე დიდი ხანია და კიდევ თუ ვიცადეთ 20 წელზე ამის იმედით ამ ყოველდღიური პროპაგანდის აღმოფხვრა შეუძლებელი იქნება… ომი ბევრნნაირი არსებობს იარაღით ამ პრობლემას ვერ მოვაგვარებთ."-აღნიშნულია აქციის ორგანიზატორების წერილში.
