თბილისის საქალაქო სასამართლოს ყოფილი თავმჯდომარე მამუკა ახვლედიანი "გურია ნიუსთან" ინტერვიუში ამბობს, რომ თანამდებობიდან გათავისუფლების შემდეგ მან სასამართლოს მიმართა, თუმცა, მისი სარჩელი წარმოებაში არ მიიღეს, რითაც მოსამართლემ კანონი დაარღვია.
"ჩემი სარჩელი წარმოებაში არ მიიღეს. უარი თქვა სასამართლომ ისე, რომ პროცესი არ ჩაატარა. ერთ მშვენიერ დღეს მივიღე წერილი, რომ თქვენ ინტერესი აღარ გაქვთ, რადგან მოსამართლეობიდან წახვედით და სასამართლოს თავმჯდომარე ვერ გახდებითო. გასაჩივრებული მაქვს აპელაციაში, მაგრამ, ალბათ, თვეები იქნება შემოდებული თაროზე. მე თუ არ მაქვს ინტერესი, აბა, ვის აქვს? იქნებ ხელფასი მინდა? სასამართლოს თავმჯდომარეს ხომ აქვს განსხვავებული ხელფასი, იქნებ ამაზე ვდაობ? ხომ უნდა იკითხოს მოსამართლემ ამაზე, თუ ის დავალებას არ ასრულებს?! თუ ზუსტად მახსოვს, დავით წერეთელს უნდა განეხილა ეს საქმე…
არასამთავრობო ორგანიზაციებს მივეცი საქმე, ის რომ ვინმეს არ ეთქვა პირად ურთიერთობებს იყენებსო, ამიტომაც ვთხოვე არასამთავრობო ორგანიზაციებს, არ ჩავერთვები არცერთ პროცესში, თქვენ დაარეგულირეთ ეს საკითხები-მეთქი. ჩემი წარმომადგენელიც კი არ მყავს ამ საკითხში, მიუხედავად იმისა, რომ არასამთავრობო შევქმენი თვითონაც. მირჩევნია სხვამ გააკეთოს, ისე რომ არ გამოვიდეს, თითქოს დაინტერესებული ვარ. ჩემს სარჩელზე უარის თქმა შეიძლებოდა? ეს ყველანაირი პროცედურის დარღვევაა. ხომ უნდა მკითხო იქნებ რა ინტერესი მაქვს, შენ რომ ჩათვალე, რომ ინტერესი არ მაქვს. შეიძლება ვერ დავწერე, ან ვერ გაიგე, ხომ უნდა მკითხო, პროცესი ხომ უნდა ჩაატარო?! ზუსტად ვიცი, ის მოსამართლე თვალებში ვერ შემხედავდა. იცოდა რას აკეთებდა. ახლაც შეხვედრებზე რომ მივდივარ, თვალებში შეხედვას ვერ გაბედავს, იცის რა აქვს დაშავებული და ვინ არის მართალი. რაც არ უნდა შუბლის ძარღვი არ ჰქონდეს ადამიანს, შინაგანად მაინც გრძნობს რა აქვს გაკეთებული და ვინ არის. ამ სიტუაციაში ხვდებიან, რომ მართლაც ძალიან ცუდად იქცევიან",_ აღნიშნავს ახვლედიანი.
ვინ არიან სასამართლო სისტემის "გენერლები" და "პოლკოვნიკები", ვინ მართავს დღეს მოსამართლეებს, რა როლი აქვს მართვაში ნინო გვენეტაძეს, როგორ აპირებს არასამთავრობო სექტორიდან სისტემაში მიმდინარე მოვლენების კონტროლს და აქვს თუ არა პოლიტიკური შემოთავაზებები_ ამ საკითხებზე "გურია ნიუსი" თბილისის საქალაქო სასამართლოს ყოფილ თავმჯდომარესთან, მამუკა ახვლედიანთან ინტერვიუს მოგვიანებით შემოგთავაზებთ.
ამავე თემაზე:
მათი მიზანია თავიანთი კანდიდატები დანიშნონ სასამართლო სისტემაში – მამუკა ახვლედიანი
