საფრანგეთში მიმდინარე ფეხბურთელთა ევროპის პირველობაზე რუსეთის ნაკრებმა სუსტად იასპარეზა და ჯგუფური ეტაპის დასრულების შემდეგ სამშობლოში დაბრუნება მოუწია.
რამდენიმე დღის წინ რუსთა გუნდის მთავარი მწვრთნელი ლეონიდ სლუცკი თანამდებობიდან გადადგა.
დღეს დილით რუსულ სპორტულ მასმედიაში გავრცელდა ცნობა რომ ამ ქვეყნის ნაკრებს ყურბან ბერდიევი ჩაიბარებს. ეს უკანასკნელი წლების განმავლობაში ყაზანის „რუბინის“ თავკაცი გახლდათ. მისი ხელმძღვანელობით არაერთ ქართველ ფეხბურთელს უთამაშია.
გასულ წელს ბერდიევი რუსული საზომებით მოკრძალებული კლუბი „როსტოვის“ მთავარ მწვრთნელად დაინიშნა. რუსეთის პირველობაზე „როსტოვი“ საპატიო მეორე ადგილზე გავიდა და ევროპის ჩემპიონთა ლიგის მომავალ საკვალიფიკაციო სტადიაზე ასპარეზობის უფლება მიიღო.
ბერდიევის სახელს მოსკოვის „სპარტაკთან“ აკავშირებდნენ, მაგრამ ფეხბურთის ეს სპეციალისტი ალბათ სანაკრებო დონეზე მუშაობას შეუდგება.
საინტერესოა რომ რუსეთის ნაკრების მთავარი მწვრთნელის თანამდებობას ვეტერან მოთამაშე სტანისლავ ჩერჩესოვსა და ცნობილ ჰოლანდიელ მწვრთნელ გუუს ჰიდინკს უწინასწარმეტყველებდნენ.
მომავალ კვირაში ყურბან ბერდიევი რუსეთის ფეხბურთის კავშირის ხელმძღვანელობასთან საბოლოო მოლაპარაკებებს წარმართავს და დიდი ალბათობით ახალ სამსახურსაც იშოვის.
