კიდევ ერთხელ გაყიდული სამშობიარო, სასწრაფო დახმარების ადმინისტრაციის გათავისუფლებული თანამშრომლები, მორიგი გათავისუფლების მოლოდინის ქვეშ მყოფი სხვა თანამშრომლები და ქობულეთის სამედიცინო ცენტრის ახალი მფლობელი, კომპანია “ალდაგი ბისიაი”, _ ასეთია ქობულეთელი ექიმების ერთი კვირის სამედიცინო ისტორია.
ქობულეთის სამედიცინო ცენტრის შენობის დათვალიერების შემდეგ, ზურაბ ჭიაბერაშვილმა ექიმებთან შეხვედრა ისურვა და ისინი მთავარი მენეჯერის, ნანა ვერულიძის კაბინეტში მიიწვია. ამ ყველაფერს, “გურია ნიუსის” გარდა, კიდევ ერთი ვიდეოკამერა აფიქსირებდა. როგორც მოგვიანებით გავარკვიეთ, ეს ჯანდაცვის სამინისტროს გადამღები ჯგუფი იყო. ექიმებთან დიალოგის დაწყებამდე, მოვლენები ასე განვითარდა:
_ უკაცრავად თქვენ ვინ ბრძანდებით?
_ “გურია ნიუსის” ჟურნალისტი.
_ გაბრძანდით, თუ შეიძლება აქედან და ნუღარ იწერთ.
_ რატომ, ეს ხომ საჯარო შეხვედრაა ექიმებთან?
_ გაბრძანდით თუ შეიძლება, საჭირო რომ ყოფილიყო, აქ იქნებოდა “რუსთავი 2”, იმედი და სხვა ტელევიზიები, ეს შეხვედრა დახურულია.
_ თქვენ ვინ ბრძანდებით?
_ მე ჯანდაცვის სამინისტროს პრესსამსახურის წარმომადგენელი ვარ.
_ თქვას მინისტრმა თავად, რომ დახურული შეხვედრაა, მას ეს არ უთქვამს.
_ გაბრძანდით, თუ შეიძლება, გეყოფათ ეხლა…
_ რატომ გავიდე, მეც მაინტერესებს ჯანდაცვის საკითხები და ახალი საავადმყოფოების მშენებლობის თემა…
ამ ჩურჩულმა და გადი-არ გავალ-ს ძახილმა მინისტრის ყურამდეც მიაღწია და გვეშველა…
“იყოს “გურია ნიუსი”, ნუ უშლით აქ ყოფნას. ჩოხატაურშიც დამყვებოდნენ ეგენი და მერე “კარგი” სათაურიც გაუკეთეს მასალას, მაგრამ მე ყოფილი ჟურნალისტი ვარ და კარგად მესმის ჟურნალისტების საქმიანობის სპეციფიკა. ასე რომ, ხელს ნუ შეუშლით მუშაობაში. არაფერს არ ვლაპარაკობ ისეთს, დასამალი რომ იყოს” _ განუცხადა მინისტრმა თავისი პრესსამსახურის წარმომადგენელს და შეხვედრაც დაიწყო.
თუმცა, სანამ შეხვედრის დეტალებზე გადავალთ, თავს უფლებას მივცემთ და გეტყვით, რომ ქობულეთში მინისტრის ვიზიტის შესახებ ინფორმაცია იმ დღესვე გავიდა ტელეკომპანია “რუსთავი 2”-ის საინფორმაციო გამოშვებაში, რომლებიც ნამდვილად არ ესწრებოდნენ ამ შეხვედრას. და რადგან, “გურია ნიუსს” სამინისტროების პრესსამსახურებისგან ნამდვილად არ აქვს იმის ფუფუნება, გამზადებული მასალები მოგვაწოდონ, უმორჩილესად ვთხოვთ, ხელს მაინც ნუ შეგვიშლიან მუშაობაში.
რაც შეეხება იმ შეხვედრის დეტალებს, რომელზეც ყოფნის უფლება მინისტრმა დაგვრთო, “გურია ნიუსისთვის” ნამდვილად საინტერესო აღმოჩნდა.
“ვანის საავადმყოფოში ნამდვილად საგანგაშო სიტუაცია დაგვხვდა, მაგრამ მინდა გითხრათ, რომ ყველგან, სადაც მივდივართ, ვაშენებთ ახალ საავადმყოფოებს და
პირველი, რასაც ვეუბნებით კომპანიას, რომელიც საავადმყოფოს იბარებს, ის არის, რომ არცერთი კვალიფიციური პერსონალი არ უნდა დაიკარგოს, _ განაცხადა ზურაბ ჭიაბერაშვილმა და პირველი კითხვაც დასვა:
_ როდესაც იმედი ელის ხელში იყავით, მაშინ მოხდა ვინმეს გათავისუფლება?
_ დიახ, _ უპასუხეს ექიმებმა ერთხმად.
_ მხოლოდ მედდების _ დააკონკრეტა ქობულეთის ცენტრალური საავადმყოფოს მთავარმა მენეჯერმა ნანა ვერულიძემ, რომელსაც მინისტრმა დაუყოვნებლივ განუმარტა,
_ მედდებიც არანაკლებ საჭირო პერსონალიაო.
და როცა ჯერი ხელფასებზე მიდგა, მაშინ ციფრებმა ყოველგვარ მოლოდინს. გადააჭარბა. აღმოჩნდა, რომ ქობულეთელი ექიმების საშუალო ხელფასი საარსებო მინიმუმზე დაბალია.
საქსტატის 2012 წლის აპრილის თვის მონაცემებით, საშუალო მომხმარებლის საარსებო მინიმუმი 136,5 ლარით განისაზღვრა. ქობულეთელი ექიმების საშუალო ხელფასი კი 100-იდან 120 ლარამდე მერყეობს. ამის შესახებ მინისტრს თავად ექიმებმა განუცხადეს.
ზურაბ ჭიაბერაშვილმა კითხვაზე, _ დაახლოებით რამდენია თქვენი საშუალო ხელფასი, _ ექიმებისგან ასეთი პასუხი მიიღო _ 120 ლარი!
როგორც ჩანს, პასუხი იმდენად დამაბნეველი აღმოჩნდა მისთვის, რომ გადაწყვიტა ერთი ნათელი წერტილი მაინც ეპოვნა ამ ამბავში და ხელმეორედ იკითხა, _ ექიმს გამომუშავებით, დამატებით არა აქვს რამე? როცა ამაზეც უარყოფითი პასუხი მიიღო, მესამე, საკონტროლო კითხვა დასვა, _ ეს “იმედი ელის” დროინდელი ხელფასებია?
_ დიახ, ნოემბრის თვიდან ასეა, _ უპასუხეს ექიმებმა.
მდგომარეობის გამოსწორება მთავარმა მენეჯერმა ნანა ვერულიძემ სცადა: “ეს თვითონ ეკონომიკის სამინისტრომ დაგვავალა ჩვენ, რომ 18 თვის საშუალო ხელფასი გაგვეკეთებინა, მაგრამ მაისის თვეში ისინი აპირებდნენ, რომ სახელფასო სისტემა შეეცვალათ. ეხლა “ალდაგმა” გვითხრა, რომ მოაგვარებენ ამ საკითხს და გვაცნობებენ, როგორი იქნება სახელფასო სისტემა…”
ექიმების კითხვაზე, _ ახალ კლინიკაში გადასვლამდე მოხდება თუ არა შემცირებები, ზურაბ ჭიაბერაშვილმა მაინცდამაინც სანუგეშო პასუხი ვერ გასცა, _ შემცირებები იქნება თუ არა, ამას ვერ გეტყვით, _ განაცხადა მან.
ჯანდაცვის მინისტრი ექიმების კორპორაციული დაზღვევითაც დაინტერესდა და კიდევ ერთი აბსურდული ფაქტის წინაშეც აღმოჩნდა.
როგორც აღმოჩნდა, კორპორაციული დაზღვევის ფასი 25-დან 50 ლარამდე მერყეობდა საოჯახო დაზღვევის ფასი კი 105 ლარი იყო. ეს კი იმას ნიშნავდა, რომ საოჯახო დაზღვევის სურვილის შემთხვევაში, ექიმებს ერთი თვის ხელფასი უნდა გადაეხადათ და ზედ 5 ლარიც დაემატებინათ.
ამ შეხვედრას პირველივე წუთებიდან და ბოლომდე ესწრებოდა “ალდაგის” წარმომადგენელი, “ჩემი ოჯახის კლინიკის” საოპერაციო დეპარტამენტის დირექტორი,…… გიგა ნემსაძე, რომელსაც არც ხელფასებზე გაუკეთებია რამე კომენტარი, არც დაზღვევაზე და არც უკეთეს პერსპექტივაზე.
“მოდით, ასე შევთანხმდეთ, რომ რამდენიმე ხნის შემდეგ მე აქ კიდევ ჩამოვალ და ვნახოთ, როგორ შეძლებს “ალდაგი” სიტუაციის დარეგულირებას ხელფასებთან დაკავშირებით”, _ ასე დაემშვიდობა მინისტრი ექიმებს.
P.S. რაც შეეხება “ალდაგის” იმედზე ყოფნას, “გურია ნიუსი” მინისტრს ურჩევს, რომ ცოტა მეტი ყურადღებით მოეკიდოს ამ იმედს.
ინტერვიუს ზურაბ ჭიაბერაშვილთან და ასევე იმას, თუ როგორ გააცურა ის “ალდაგის” წარმომადგენელმა “გურია ნიუსის” თვალწინ, უახლოეს საათებში შემოგთავაზებთ.
