სვანეთში, ნენსკრა ჰესის მშენებლობის წინააღმდეგ მოსახლეობა საპროტესტო აქციას გამართავს.
ამის შესახებ "გურია ნიუსს" ჭუბერის თემიდან აცნობეს.
მათი ინფორმაციით, ჭუბერის თემის ინიციატივით, საპროტესტო აქცია ჭუბერში ნენსკრა ჰესის მიმდინარე მშენებლობის წინააღმდეგ 3 ივლისს,13:00 საათზე გაიმართება.
გავრცელებული ინფორმაციით, აქციას ჭუბერის თემის მოსახლეობის გარდა ზემო სვანეთის17-ვე თემის წარმომადგენლებიც დაესწრებიან.
"აქციის ფარგლებში ჭუბერის თემი გეგმავს მიმართვის გაკეთებას პროექტის დაფინანსების მსურველი ბანკებისათვის, საქართველოს პრეზიდენტის, კათალიკოს პატრიარქისთვის, საქართველოშიმოქმედი პარტიებისთვისა და სახალხო დამცველისათვის. ამას გარდა გაიმართება მსჯელობა ლალხორის შექმნის აუცილებლობის თაობაზეც.
ჭუბერის თემის სახელით აქციაში მონაწილეობის მისაღებად ვიწვევთ აღნიშნული საკითხით დაინტერესებულ ყველას, ვისთვისაც სვანეთი ბედი არ არის სულერთი", _ აღნიშნულია ჩვენთვის მოწოდებულ ინფორმაციაში.
აქციას "მწვანე მუშტი" და ყაზბეგის მოსახლეობის ნაწილი შეუერთდება.
შეგახსენებთ, რომ ჭუბერის მოსახლეობამ "ნენსკრა ჰესის" პროექტის მონიტორინგის ჯგუფი 2016 წლის მაისში შექმნა.
ადგილობრივი მოსახლეობის ნდობით აღჭურვილი სამუშაო ჯგუფი პროექტის განხორციელების პროცესს გააკონტროლებს.
ინვესტორისა და საპარტნიორო ფონდის წარმომადგენლებთან შეხვედრა, მოსახლეობის მოთხოვნით, ჭუბერში გაიმართა. მათ ადგილობრივ მოსახლეობას კიდევ ერთხელ წარუდგინეს სამოქმედო გეგმა.
ადგილობრივების გარკვეული ნაწილი "ნენსკრა ჰესის" პროექტის განხორციელებას ეწინააღმდეგებოდა და პროექტის შესახებ დამატებით ინფორმაციასა და უსაფრთხოების გარანტიებს ითხოვდა.
