პრემიერ-მინისტრი გიორგი კვირიკაშვილი სოფლის მეურნეობის მინისტრს ოთარ დანელიას კონკრეტულ დავალებას აძლევს. პრემიერი ითხოვს დროულად დასრულდეს კახეთში დაზარალებული მოსახლეობის საქმეების გამოძიება, რომლებსაც წინა წლებში ჩაბარებული ყურძნის თანხა ჯერ კიდევ არ აქვთ აღებული.
პრემიერ-მინისტრმა გიორგი კვირიკაშვილმა აღნიშნულ საკითხზე დღეს, მთავრობის სხდომაზე ისაუბრა. პრემიერმა სოფლის მეურნეობის მინისტრს სთხოვა, ეს საკითხი მოიკვლიოს და თუ საჭირო იქნება, შესაბამისი უწყებებიც ჩართონ.
"ჩემამდე მოვიდა ინფორმაცია, რომ საგარეჯოში შარშანდელი ჩანაბარები ყურძნის თანხა მიითვისა რომელიღაც ბიზნესმენმა და თანხა არ არის მისული მევენახემდე. მინდა, სოფლის მეურნეობის მინისტრს ვთხოვო, ეს საკითხი მაქსიმალურად მოიკვლიოთ და თუ საჭირო იქნება ჩავრთოთ შესაბამისი უწყებები. ის, რომ სახელმწიფო საკმაოდ დეფიციტური რესურსის გამონახვას ახერხებს, დავასუბსიდიროთ ყურძნის ჩაბარება, არ უნდა ნიშნავდეს იმას, რომ ვიღაცამ ბოროტად ისარგებლოს ამით. გთხოვთ, მაქსიმალურად მოკლე დროში გამოვიძიოთ ეს საკითხი და თუ საჭირო იქნება სახელმწიფოს მხრიდან ნებისმიერი ჩართულობა არის განხილვადი", _ აღნიშნა პრემიერმა.
სოფლის მეურნეობის მინისტრმა ოთარ დანელიამ კი განაცხადა, რომ ეს პრობლემა ცნობილია, საუბარია რამდენიმე სოფლიდან 50 მევენახეზე და ჯამში 200 ათას ლარზე მეტია დავალიანება.
"50-ზე მეტ მევენახეზეა საუბარი რამდენიმე სოფლიდან, 200 000 ლარზე მეტ თანხას ეხება საქმე. საბოლოო ჯამში იყო გამოძიება, არ გააჩნიათ ის აქტივები იმ კომპანიას, რომელიც დააკმაყოფილებს დაზარალებულ ადამიანებს. თქვენს დავალებას მივიღებთ და ვეცდებით გამოსავალი ვიპოვოთ ისე, რომ მინიმალური იყოს ის ზარალი, რაზეც დღეს არის საუბარი," _ განაცხადა ოთარ დანელიამ.
სოფლის მეურნეობის მინისტრმა აღნიშნულს "სამწუხარო ფაქტი" უწოდა, თუმცა მას პრემიერმა სიტყვა შეაწყვეტინა და უთხრა, რომ "ეს სამწუხარო კი არა, უფრო ამაზრზენი ფაქტია".
"ეს არის იმ ადამიანების ფულის მითვისება, ვინც ამაზეა დამოკიდებული მთელი წელი. მაქსიმალურად შევეცადოთ, რომ მოკლე დროში მოხდეს ამ საკითხის გარკვევა", _ აღნიშნა კვირიკაშვილმა.
შეგახსენებთ, რომ აღნიშნულ საკითხთან დაკავშირებით "გურია ნიუსმა" რამდენიმე მასალა გამოაქვეყნა.
მათ შორის, დიანა ქართლელიშვილის საქმეცაა, რომელზეც ინფორმაცია პრემიერ-მინისტრს გიორგი კვირიკაშვილს დაზარალებულმა თავად მიაწოდა.
მოქალაქე დიანა ქართლელიშვილი პროკურატურას და სასამართლოს უმოქმედობაში ადანაშაულებს და თავისი კუთვნილი 38 ათასი ლარის დაბრუნებას ითხოვს.
საქმე იმაშია, რომ ქართლელიშვილის ოჯახმა 2014 წლის 22 სექტემბერს გურჯაანში მდებარე ღვინის კომპანია "ჰელიოს +"-ში 11-ტონამდე საფერავის ჯიშის ყურძენი ჩააბარა, თუმცა ყურძნის საფასურიდან მხოლოდ 13 ათასი ლარი აქვთ აღებული.
ქარხანას ქართლელიშვილისთვის, 2014 წელს, გადასახდელი კიდევ 27 112 ლარი ჰქონდა, თუმცა, დავალიანებამ ამ დროისთვის თითქმის 40 ათას ლარს მიაღწია.
აღსანიშნავია, რომ ქართლელიშვილი საქმეში დაზარალებულადაც არ არის ცნობილი, თუმცა პროკურატურის მასალების მიხედვით ირკვევა, რომ ყურძენი ნამდვილად მისი საკუთრებაა.
საქმის განხილვა სასამართლოში უკვე ორი წელია მიმდინარეობს, მაგრამ დაზარალებულს მისი დროულად დასრულების იმედი აღარ აქვს.
რა კორუფციულ სქემებზე საუბრობს დაზარალებული, რაში ადანაშაულებს პროკურორებს და მოსამართლეს და ვის ინტერესებში შედის საქმის გაჭიანურება, ამ საკითხებზე "გურია ნიუსი" ქართლელიშვილის ინტერვიუს მოგვიანებით შემოთავაზებთ.
ამავე თემაზე:
"2014 წელს ჩაბარებული ყურძნის საფასურს ამ დრომდე არ მაძლევენ"
ღვინის ქარხანას, პროკურატურასა და სასამართლოს შორის "დაკარგული" 27 ათასი ლარი
