"ერთიანი ნაციონალური მოძრაობის“ წარმომადგენელ ოთარ კახიძის თქმით, ახმედ ჩატაევის გათავისუფლებაზე პასუხისმგებლობა მაშინდელ მთავარ პროკურორს, იუსტიციის მინისტრ თეა წულუკიანს ეკისრება.
"საქართველოს იუსტიციის მინისტრმა გუშინ გააკეთა განცხადება, რომ "ქართული ოცნების" ხელისუფლებამ შეცდომა დაუშვა, როდესაც ტერორიზმში ეჭვმიტანელი ახმედ ჩატაევი გაათავისუფლა. მინდა საზოგადოებას ვუთხრა, რომ 2013 წლის 30 მაისის მდგომარეობით, საქართველოს პროკურატურას თეა წულუკიანი ხელმძღვანელობდა. შესაბამისად, მას ჰქონდა საშუალება გაეუქმებინა ქვემდგომი პროკურორის ის გადაწყვეტილები, რომელსაც არ ეთანხმებოდა. ასევე, შეეცვალა ეს გადაწყვეტილება.
ახმედ ჩატაევის გათავისუფლება ვითომდა მტკიცებულებების არ არსებობის გამო საქართველოს პროკურატურის შუამდგომლობით მოხდა, რის შემდეგაც მის მიმართ სისხლის სამართლის დევნა შეწყდა. აღნიშნულზე პირდაპირი პასუხისმგებლობა საქართველოს პროკურატურის მაშინდელ პირველ პირს, იუსტიციის მინსიტრ თეა წულუკიანს აქვს."-განაცხადა კახიძემ "ნაციონალური მოძრაობის" ოფისში გამართულ ბრიფინგზე.
საქართველოს იუსტიციის მინისტრმა თეა წულუკიანმა გუშინ გააკეთა განცხადება და ჩატაევის გათავისუფლების გამო სინანული გამოთქვა.
"ჯერ კიდევ მაშინ მე, როგორც საქართველოს იუსტიციის მინისტრი, წინააღმდეგი ვიყავი აჰმედ ჩატაევის ციხიდან გამოშვების და ვემხრობოდი იმას, რომ ასეთი პატიმრების გათავისუფლებისას, პროკურატურას უფრო მეტი ყურადღება გამოეჩინა. იმ დროს პროკურატურა ახალი გათავისუფლებული იყო ადეიშვილის პოლიტიკისა და წნეხისგან და ბატონი არჩილ კბილაშვილის მმართველობის ქვეშაა ეს მომხდარი. ასეა თუ ისე, ესაა წარსული. ახლა უნდა ვიმუშაოთ ყველამ ერთად, მათ შორის თურქეთის სახელმწიფოსთან, უფრო აქტიურად, რადგან, როგორც ჩანს, ტერორისტები არიან იმ გეგმების შემუშავების პროცესში, რომელიც ყველაზე დაუცველ მსხვერპლს იღებს მიზანში. ესენი გახლავთ სამოქალაქო პირები, მგზავრები, ტურისტები".-განაცხადა წულუკიანმა.
