როგორც აქაურები და, მათ შორის, ქვედა ბახვის საჯარო სკოლის დირექტორი, დოდო გოთუა “გურია ნიუსთან” საუბარში აღნიშნავენ, გარემონტებული სპორტდარბაზი სოფლის ახალგაზრდებისთვის და ბავშვებისთვისაა განკუთვნილი, თუმცა, როგორც ამავე სოფლიდან გვაცნობეს, ევრორემონტიან სპორტულ დარბაზს, ერთი თვის წინ, ნასვამ მდგომარეობაში მყოფი პოლიციის თანამშრომლები სტუმრობდნენ და დარბაზი ისეთ მდგომარეობაში დატოვეს, ორი დღის განმავლობაში ალაგებდნენ.
ინფორმაციას პოლიციელების სკოლაში მოსვლის შესახებ, სკოლის დირექტორი ადასტურებს, თუმცა, მათ ნასვამ მდგომარეობაში ყოფნას უარყოფს.
“გურია ნიუსი” ამ ფაქტის გადასამოწმებლად ქვედა ბახვის საჯარო სკოლაში მივიდა.
_ ეს იყო რამდენიმე დღის წინ. ამოსული იყო, დაახლოებით, პოლიციის 20 პიკაპი. სოფელში პოლიციელები რომ დაინახეს, ჯერ ეგონათ, ვიღაცას იჭერდნენ ან სპეცოპერაციას ატარებდნენ. მოსულან მთვრალები, ყოფილა ღრეობა, დაუსვრიათ იქაურობა, რის შემდეგ, ორი დღე რეცხავდნენ კედლებს და ალაგებდნენ. არც არავინ მისულა ახლოს. ხალხს შეეშინდა, მიხვდნენ რომ მთვრალები იყვნენ. ვერც გეტყვით, ვერავინ ღიად ვერაფერს, _ გვითხრა სოფლის ერთ-ერთმა მკვიდრმა.
ოზურგეთის მუნიციპალიტეტის ქვედა ბახვის საჯარო სკოლის დირექტორი, დოდო გოთუა:
_ საერთოდ, როცა საგაზეთო მასალას ამზადებდით, წინასწარ უნდა მცოდნოდა, მოვემზადებოდი. არ არის კონფიდენციალური ეს ინფორმაცია, მაგრამ საერთოდ ასე ხდება.
სპორტდარბაზს რემონტი გაუკეთეს სამი-ოთხი წლის წინ, რამდენიმე ათასი ლარით გამგეობა დაგვეხმარა. შევარემონტეთ, თუმცა, კაპიტალური რემონტს მაინც ვერ გავაკეთებდით იმიტომ, რომ ძალიან ძვირი ჯდებოდა. გამოჩნდა ღვთისნიერი ადამიანი ნუგზარ ნაკაიძე, რომლის შვილები ცხოვრობენ ამერიკაში. მას სტუმრად ჰყავდა ამერიკელები და ისინი სკოლაში გვესტუმრნენ. ნაკაიძემ გადმოგვირიცხა 8 ათასი დოლარი, ერთი თვის წინ დამთავრდა რემონტი.
_ ვინ ვარჯიშობს ამ დარბაზში?
_ სპორტის სხვადასხვა სახეობით დაკავებული ბავშვები. დარბაზი სოფლისთვის გაკეთდა. აქ ჩატარდა ტურნირი მინი-ფეხბურთში. ოზურგეთიდან იყვნენ ამოსულები და ივარჯიშეს. ჩატარდება სასკოლო ღონისძიებები, ბავშვებისთვისაა ეს გაკეთებული.
_ ქალბატონო დოდო, ბახვიდან გვაცნობეს, რომ აქ რამდენიმე დღის წინ ამოვიდნენ მთვრალი პოლიციელები პიკაპებით, დაანაგვიანეს იქაურობა და დარბაზს მერე ორი დღე ალაგებდით.
_ ასეთი რამ არ მომხდარა. აქ იყო შეჯიბრება კალათბურთში.
_ ვის ჰქონდა ეს შეჯიბრი?
_ არ ვიცი, ალბათ, მაგათ.
_ ვის, პოლიციელებს?
_ არა, ბავშვებს.
_ ღამით?
_ ჩვენთან ღამეც დადიან ბავშვები. რა პრობლემაა? დადიან და ვარჯიშობენ.
_ ანუ პოლიციელების ამ დარბაზში ნასვამ მდგომარეობაში ყოფნას არ ადასტურებთ?
_ არ იყვნენ მთვრალები. არც ღამე იყო, როცა ისინი იყვნენ.
_ ჩვენ დაგვირეკეს სოფელ ბახვიდან და გვაცნობეს, რომ პოლიციელები ნასვამ მდგომარეობაში იყვნენ და მათი ხმაური მთელმა სოფელმა გაიგო.
_ ეს არის დეზინფორმაცია. არ არის სიმართლე.
_ დაახლოებით, 20 მანქანა იქნებოდაო.
_ არა, არ არის სიმართლე. ორი მანქანა იყო. რატომ მოდის ასეთი ინფორმაციები, მიკვირს. ჩვენთან სოფელში კარგის მეტი არაფერი არ ხდება.
_ იქნებ, გვითხრათ, ვინ იყო ამოსული პოლიციიდან _ ხელმძღვანელობა?
_ არ ვიცი, სახელი და გვარები. არ ვიცი, ვინაა ხელმძღვანელობა, საერთოდ. მე თვითონ გავუღე კარი პოლიციელებს. იყო შეჯიბრება, მთვრალები არ ყოფილან. ვინ ავრცელებს ასეთ ტყუილ ინფორმაციებს ნამდვილად არ ვიცი. _ გვითხრა გოთუამ.
