ოზურგეთის #60 საოლქო საარჩევნო კომისიის თავმჯდომარის, ზვიად თენიეშვილის ინფორმაციით, ამ შეხვედრაზე სამოქალაქო რეესტრის წარმომადგენელი უნდა მოსულიყო, მაგრამ მან პირადი პრობლემების გამო, ვერ მოახერხა მოსვლა და აქედან გამომდინარე, გადამისამართებაზე მეტ-ნაკლებად ისაუბრეს.
შეხვედრას, ცენტრალური საარჩევნო კომისიიდან, საარჩევნო ოლქებთან ურთიერთობის განყოფილების მთავარი სპეციალისტი, მანუჩარ გამყრელიძე ესწრებოდა, ხოლო ამომრჩეველთა სიების შესახებ ვრცლად ამომრჩეველთა სიების დაზუსტების უზრუნველყოფის კომისიის კოორდინატორმა, მანანა ინწკირველმა ისაუბრა.
_ ჩვენი კომისიის შემადგენლობა პროცენტულად თანაბრადაა დაკომპლექტებული ყველა პოლიტიკურ პარტიაში შემავალი სუბიექტებით და არასამთავრობო ორგანიზაციების წარმომადგენლებით. ოზურგეთში მუშაობს 95 ჯგუფი, 190 კაცი გახდა რეგისტრატორი. ისინი გვაბარებენ სიებს და ვაგზავნით თბილისში _ დამუშავება ოზურგეთში არ ხდება. 9 000 ფურცლიდან 6 000 გვერდი გაგზავნილია. ერთ კვირაში დავამთავრებთ ამ სამუშაოებს. გაღიაზიანებულია ხალხი, რადგან ყოველთვის გვეკითხებოდნენ, თუ ვისი წარმომადგენლები ვიყავით. არადა, ეს სახელმწიფო კომისიაა, სახელმწიფოს ბიუჯეტი აფინანსებს და არ არის პარტიული.
ჩვენ მიერ დასმულ კითხვაზე, თუ როგორ გადანაწილდა რეგისტრატორები ოზურგეთში, მანანა ინწკირველის გვიპასუხა: _ “ქრისტიან-დემოკრატები”, “ახალი მემარჯვეენები” და “ერთიანი ნაციონალური მოძრაობა” _ 46%-ით, 19%-ით იყო “ედპ” და “მრეწველები”, თორთლაძის პარტიიდან ორი რეგისტრატორია.
ოპოზიციის წარმომადგენლებმა მანანა ინწკირველს ბევრი კითხვა დაუსვეს და საბოლოოდ, ერთ-ერთმა ოპოზიციონერმა თქვა, რომ არ არის გამორიცხული, ამომრჩეველთა სიები კვლავ პრობლემა იყოს.
ზვიად თენიეშვილის თქმით, ამ დღეებში საოლქო საარჩევნო კომისია ვიქტორ დოლიძის #1-ში გადადის, სადაც ადრე პროკურატურის შენობა იყო: _ ამ ეტაპზე დარბაზს არემონტებენ. მომდევნო შეხვედრებს ახალ ოფისში გავმართავთ, _ გვითხრა თენიეშვილმა.
