საქართველოს პარლამენტის უმრავლესობის წევრი გუგული მაღრაძე "ნაციონალურ მოძრაობას" მისი ოჯახის მიმართ აგორებულ კამპანიაში ადანაშაულებს.
"ნაციონალური მოძრაობის" მხრიდან ქართული ოცნების წევრების დისკრედიტაცია ახალ ფორმებს იღებს და წინასაარჩევნო პერიოდში კიდევ უფრო გამძაფრებულია. ნაცმოძრაობა განსაკუთრებით ნერვიულობს მოახლოებული არჩევნების წინ, რადგან კარგად იცის, რომ არჩევნებში გამარჯვების შანსი არ აქვს. შესაბამისად, მეტი არაფერი დარჩენია, თუ არა შავი პიარის აგორება ქართული ოცნების წევრების შესახებ.
დაწყებული ჩემი ინგლისური აქცენტის კრიტიკით, ზამთარში ქურქის ტარების დაგმობით და სხვა უამრავი არაადექვატური თავდასხმით, რასაც ნაციონალური მოძრაობა უნიჭოდ აკეთებს, დამთავრებული ჩემი ოჯახის წევრების შესახებ ცრუ ინფორმაციის გავრცელებით, ყველანაირად ცდილობს ნაციონალური მოძრაობა და მის დაქვემდებარებაში მოღვაწე მასმედიის ზოგიერთი უწყება, რომ რამენაირად დააზიანონ ჩემი და ჩემი ოჯახის რეპუტაცია. ნაცმოძრაობის მიერ კონტროლირებული პრესის წარმომადგენლები კი განსაკუთრებით დაინტერესდნენ ჩემით მას მერე, რაც 2015 წლის მარტში ნიკა გვარამიას ვუჩივლე საქართველოს ჟურნალისტთა ეთიკის ქარტიაში, რომ რუსთავი 2-ის გენერალურმა დირექტორმა (ნიკა გვარამიამ) ჩემს მიმართ დაარღვია საქართველოს ჟურნალისტური ეთიკის ქარტიის დებულებ(ებ)ი, შეურაცხყოფა მომაყენა და ცილი დამწამა პირდაპირ ეთერში.
ჟურნალისტებს, რომლებიც მიკავშირდებით ამ ბოლო პერიოდში ჩემი სიძის წინააღმდეგ აგორებული ყოვლად უსაფუძვლო შავი პიარის თემაზე კომენტარის თხოვნით, ვაცნობებ, რომ ეს შავი პიარი რეალურად ჩემ წინააღმდეგ ააგორა ნაციონალურმა მოძრაობამ. აქვე ინფორმაციისთვის, გაცნობებთ, რომ ჩემი სიძე არის კეთილსინდისიერი და წესიერი ადამიანი, თავისი საქმის პროფესიონალი, 20 წელიწადზე მეტი სამუშაო გამოცდილებით ფინანსებში. მას აქვს უმწიკვლო რეპუტაცია. ბოლო პერიოდის მცდელობები, რომ მისი რეპუტაცია შეილახოს არის ჩვენი ოპონენტების მხრიდან ჩემ მიმართ გამოხატული კიდევ ერთი პოლიტიკური თავდასხმა. პოლიტიკაში უკვე ძალიან დიდი ხანია ვარ და აღარ მიკვირს ქართული ოცნების ლიდერების წინააღმდეგ ნაციონალური მოძრაობის მხრიდან მსგავსი თავდასხმები."- წერს გუგული მაღრაძე.
