აგარაკი კანარის კუნძულებზე და კრედიტებში გადახდილი მილიონები

საქართველოს პარლამენტის უმცირესობის დეპუტატი, ბოლნისის მაჟორიტარი, კობა ნაყოფია სამი ბინის, სამი საცხოვრებელი სახლის, სამი მიწის ნაკვეთის და კანარის კუნძულებზე მდებარე აგარაკის მფლობელია.

ამის შესახებ ნაყოფიას ქონებრივ დეკლარაციაშია აღნიშნული, რომელიც მან 2016 წის 23 ივნისს შეავსო.

დეკლარაციის მიხედვით, კობა ნაყოფია ფლობს ბინას მოსკოვში, კაშერსკოე შოსეზე, რომლის ფართობის 55.00 კვ.მ-ია; 300.00 კვ.მ-ის ფართობის აგარაკს ესპანეთში, კანარის კუნძულებზე, ჩაიოფაში (ნაყოფია აგარაკის 50%-იანი წილი მფლობელია); საცხოვრებელ სახლს გალში (360.00 კვ.მ) და ამავე მისამართზე არსებულ 1200.00 კვ.მ-ი ფართობის მიწის ნაკვეთს; მიწის ნაკვეთს თბილისში, დიღმის სასწავლო საცდელი მეურნეობის ტერიტორიაზე, რომლის ფართობიც 11301.00 კვ.მ-ია, ამავე ტერიტორიაზე 1670.00 კვ.მ-ის ფართობის მშენებარე საცხოვრებელ სახლს; თბილისში, ნინო რამიშვილის ჩიხში მდებარე 198.00 კვ.მ-ის ფართობის ბინას; თბილისში, ილია ჭავჭავაძის გამზირზე არსებულ 223.30 კვ.მ-ის ფართობის ბინას და ამავე მისამართზე 14.00 კვ.მ-ის ფართობის ავტოფარეხს; ხელვაჩაურის მუნიციპალიტეტის სოფელი გონიოში 836.00 კვ.მ-ის ფართობის მიწის ნაკვეთსა და ამავე მისამართზე არსებულ 400.00 კვ.მ-ის ფართობის მშენებარე საცხოვრებელ სახლს, რომელიც ნაყოფიას განვადებით, 200 000 დოლარად გასული წის 23 იანვარს შეუძენია.

კობა ნაყოფიას საკუთრებაშია ასევე, 2010 წელს გამოშვებული მსუბუქი ავტომანქანა Mercedes Benz GL 500, 2008 წელს გამოშვებული Mercedec benz S63AMG; 2011 წელს გამოშვებული ROLLS-ROYCE GHOST და ლადო გუდიაშვილის ორი ფერწერული ტილო.

რაც შეეხება პარლამენტის დეპუტატის ფინანსურ მდგომარეობას, დეკლარაციის შევსების მომენტში კობა ნაყოფიას საბანკო ანგარიშებზე საერთო ჯამში 44 348,62 დოლარი; 7 480 ევრო; 200 000 რუბლი და 1162 უკრაინული გრივნა იყო.

კერძოდ, HSBC BANK -ის მიმდინარე ანგარშზე ნაყოფიას 5000.00 დოლარი ერიცხებოდა; სითი ბანკის მიმდინარე ანგარიშზე – 10000 დოლარი; როს ბანკის მიმდინარე ანგარიშზე -200000 რუბლი; "საქართველოს ბანკის" ოვერდრაფტზე – 25000 დოლარი; ,,თი–ბი–სი ბანკის" ოვერდრაფტზე – 1147.57 დოლარი; საქართველოს ბანკის საბარათე ანგარიშზე – 1561.58 ლარი; ვი–თი–ბი ბანკის ოვერდრაფტზე – 2304.03 დოლარი; საქართველოს ბანკის ამერიკან ექსპრესზე – 7480 ევრო; UKRSIBBANK, BNP PARIBAS GROUP-ის საბარათე ანგარიშზე კი 897.02 დოლარი და 1162 უკრაინული გრივნა.

გარდა ამისა, ნაყოფიას ნაღდი ფულის სახით 10000 ლარი ჰქონდა.

რაც შეეხება პარლამენტის დეპუტატის შემოსავლებს, რომელიც მან გასული ერთი წლის განმავლობაში მიიღო, დეკლარაციის მიხედვით, მხოლოდ საქართველოს პარლამენტის წევრობისთვის მიღებული კობა 55485 ლარია; სხვა შემოსავლების შესახებ დეკლარაციაში არაფერია აღნიშნული.

ქონებრივ დეკლარაციაში აღნიშნულია, რომ კობა ნაყოფია Bioneli limited LTD-ის (ბრიტანეთი, ვირჯინიის კუნძულები, ტორტოლა, როუდ თაუნ, საფოსტო ყუთი #3321) მფლობელია, თუმცა, კომპანია მართვის უფლებით, მინდობილობით, ამჟამად გადაცემულია მის შვილზე, ნიკოლოზ ნაყოფიაზე; ისევე, როგორც შპს "გოლდინვესტი" (საქართველო, თბილისი, ყაზბეგის ქ. 3/5).

დეკლარაციის მიხედვით, ნაყოფიას სამეწარმეო საქმიანობიდან გასულ წელს შემოსავალი მიღებული არ აქვს.

აღსანიშნავია, რომ კობა ნაყოფიას სახელზე 22 იპოთეკური, კომერციული და საკრედიტო სესხია. რომელთა ჯამური ოდენობა 9 532 900 დოლარს და 64 884 ევროს შეადგენს.

პარლამენტარმა სესხების პროცენტების დასაფარად გასულ წელს 2 370 484 დოლარი და 28981 ევრო გადაიხადა.

გარდა ამისა, ნაყოფიას დეკლარაციაში აღნიშნულია, რომ მას ქუთაისში ბინის ქირავნობისთვის 10 005 ლარი აქვს გადახდილი; 2 470.17 დოლარი -ავტოდაზღვევისთვის, ხოლო 810 დოლარი _ქონების დაზღვევისთვის.

აქვე უნდა აღინიშნოს, რომ კობა ნაყოფიას 2016 წელს შევსებულ დეკლარაციაში ოჯახის წევრები, მეუღლე – ელგა სოფია და შვილები – ნიკოლოზ და ნატალია ნაყოფიები აღარ არის მითითებული. ნაყოფიას მეუღლე, ელგა სოფია კანარის კუნძულებზე მდებარე ვილის თანამესაკუთრეა და 50%-იან წილს ფლობს.

2016 წლის დეკლარაციაში აღარ არის ასევე მითითებული ელგა სოფიას საკუთრებაში არსებული ქონება. რომელიც 2015 წლის ქონებრივი დეკლარაციის თანახმად ასე გამოიყურება:

ბინა მოსკოვში (ფართობი – 167.00 კვ.მ), თბილისში, ამბროლაურის ქუჩაზე მდებარე 31.00 კვ.მ-ისა და 83.00 კვ.მ ფართობის ბინები; თბილისში ილია ჭავჭავაძის გამზირზე მდებარე 231.60 კვ.მ-ისა და ამავე მისამართზე არსებული 173.60 კვ.მ ფართობის ბინები. ასევე, ჭავჭავაძის გამზირზე მდებარე სამი ავტოფარეხი (სამივეს ფათობი ჯამში 42 კვ.მ.); ბათუმში, ფარნავაზ მეფის გამზირზე მდებარე 80.33 კვ.მ-ის ფართობის ბინა; თბილისში, უნივერსიტეტის ქუჩაზე მდებარე 11.80 კვ.მ-ის ფართობის მიწის ნაკვეთი. 2011 წელს გამოშვებული მსუბუქი ავტომანქანა Mercedes Benz SLK 350 და 2008 წელს გამოშვებული Land Rover Discovery 3;

ასევე, კობა ნაყოფიას დეკლარაციაში აღარ არის მითითებული შვილის- ნიკოლოზ ნაყოფიას ქონებაც, რომელიც 2015 წლის დეკლარაციის მიხედვით თბილისში, ილია ჭავჭავაძის გამზირზე მდებარე 204.80 კვ.მ-ის ფართობის ბინასა და ამავე მისამართზე არსებულ 14 კვ.მ-ის ფართობის ავტოფარეხს ფლობს.

დეკლარაციაში ასევე აღარ წერია ნიკოლოზ ნაყოფიას საკუთრებაში არსებული 2008 წელს გამოშვებული მსუბუქი ავტომანქანა Mercedes Benz C 6.3 AMG და 2008 წელს გამოშვებული Mercedes Benz C 350.

აქვე უნდა აღინიშნოს, რომ კობა ნაყოფიას სახელი და გვარი (Cuento Portfoilio Corp. (POA) ე.წ. პანამის დოკუმენტებშიც ფიგურირებს, რომელიც გამომძიებელ ჟურნალისტთა საერთაშორისო კონსორციუმმა გამოაქვეყნა და 2016 წლის სკანდალად შეიძლება ჩაითვალოს. პანამის დოკუმენტებში აღნიშნული ბიზნესმენები, მკვლევარების ინფორმაციით, ოფშორულ კომპანიებში დარეგისტრირებულ კომპანიებს ფლობენ. ეს კი, მათივე თქმით, იმიტომ ხდება, რომ "დამალონ გადასახადები, ან სხვადასხვა ფინანსური აქტივობები განახორციელონ ისე, რომ ეს ვერ აკონტროლოს ამა თუ იმ ხელისუფლებამ".