ჯერ კიდევ 3 ივნისს, საზოგადოებრივი მაუწყებლის ეთერში უნდა გახმაურებულიყო ელიტლიგაში გუნდების გაზრდის შესაძლებლობა. წინასწარი ინფორმაციით, საქმე აქეთკენ მიდიოდა, მაგრამ, როგორც ჩანს, ბოლო მომენტში სიტუაცია შეიცვალა.
გადაცემის დაწყებისთანავე, ქართული ფეხბურთის მესაჭემ ზვიად სიჭინავამ შეკრებილებს გადაჭრით უთხრა, გუნდების გაზრდა გამორიცხულიაო. გუნდების წარმომადგენლებმაც, თითქოს შეთანხმებულები იყვნენ, ან მინიმუმ, ფედერაციის თავკაცის განაწყენება არ ისურვეს, აღნიშნეს _ 16-გუნდიანი პირველობა კარგია, მაგრამ ამის საშუალება ახლა არ არის და 12-გუნდიანი საუკეთესო ვარიანტიაო.
თუმცა, იყვნენ გამონაკლისებიც: ბოლნისის “სიონის” წარმომადგენელმა, ლევან ბაჯელიძემ თქვა, ახლავე გავზარდოთ 16 გუნდამდეო და “გურიაც” ახსენა _ ეს კლუბი უმაღლესს იმსახურებსო. უფრო რადიკალური გახლდათ “ჩიხურას” მთავარი მწვრთნელი სოსო ფრუიძე: “ახლავე უნდა გადავიდეთ 16 გუნდზე. ეს ყველანაირად კარგია _ ჩვენთვისაც, რადგან დახვეწილი ჩემპიონატი გვექნება, ამასთან გეოგრაფიულად გაიზრდება ქართული ფეხბურთი. ლანჩხუთში თამაშზე 5 ათასი კაცი მოდის და ეს გუნდი უმაღლესში უნდა იყოს!”
მართალია, ზვიად სიჭინავამ აღიარა, რომ “გურია” ბრენდია და მისი უმაღლესლიგელობა გაუხარდებოდა, მაგრამ სხვა 3 გუნდი არ გვყავს, რომ დავამატოთო. სფფ-ის გენმდივანმა, რევაზ არველაძემ კი “გურია” სულაც ყველაზე დიდ გუნდად წარმოადგინა. მაქსიმუმი ის იყო, რომ სფფ მინდვრის გაკეთებით გვიმადლიერებს. მას სულაც არ აინტერესებს “გურიას” ათასობით ქომაგი, როცა სხვა სტადიონებზე ნაკლებად დადის, ზოგ გუნდს კი 200-მდე ქომაგი თუ გულშემატკივრობს. მათთვის მთავარი პიარია და იმ დავალების შესრულება, რასაც “ზემოდან” დაავალებენ.
ამის შემდეგ, რა თქმა უნდა, არც არავინ ელოდა, რომ ფეხბურთის ფედერაციის აღმასკომზე სფფ თავის “იაღლიშს” აღიარებდა, როცა მოქმედი დებულებით უმაღლესი ლიგის საგზური “გურიას” ეკუთვნის და არა “ვიტ ჯორჯიას”.
ბოლო იმედი, სფფ-ის ყრილობა გახლდათ, სადაც სიტყვით ლანჩხუთის გამგებელი გიორგი გოგუაძეც გამოვიდა. იგი დებულების იმ პუნქტის ამოქმედებას ითხოვს “გურიასთან” მიმართებაში, რომლითაც “ზესტაფონი” იმავე ფედერაციამ ჩემპიონად გამოაცხადა, სხვათა შორის, სამართლიანადაც. ამით იმდენად კმაყოფილი დარჩა იმერელთა პრეზიდენტი ილია კოკაია, რომ მან “გურიას” საწინააღმდეგო მოსაზრება გამოთქვა. კაცი, რომელიც სკანდალებში თავისივე ნათქვამის გამო არაერთხელ გაეხვია, იმ აზრზე ყოფილა _ ლანჩხუთს უმაღლესში რა უნდა, სტადიონი არ აქვსო. თითქოს, ქართული მოედნების საფარი ყველას “ევგრაფი შევარდნაძეზე” უკეთესი ჰქონდეს.
სამწუხაროდ, შედეგი არც ყრილობამ მოგვცა. დებულებასთან დაკავშირებით, წერილობითი მიმართვა მოითხოვეს, რაზეც ასევე წერილობით პასუხს გასცემენ. თუმცა, რა აქვს საპასუხო ფედერაციას, საკითხავია, როცა სულელური დებულებით ჩაატარეს პირველობა. რა თქმა უნდა, ლანჩხუთის ფეხბურთის მესვეურები ამ შანსის გამოყენებასაც შეეცდებიან და სფფ-ს წერილობითაც მიმართავენ.
ერთი დადებითი ის არის, რომ “გურიის” სტადიონის რეკონსტრუქცია იგეგმება. თუმცა, ფედერაცია მხოლოდ მინდორს აგებს, სტადიონის გაკეთება კი გურიის განვითარების ფონდის სახსრებით ხორციელდება და მას ტყუილად “იკერებს” დომენტი სიჭინავა, რომლის უწყებასაც თამაშების ჩატარება ცარიელი ტრიბუნების წინ ურჩევნია საკუთარი უსუსურობის აღიარებას.
ჩვენი მკითხველი რომ ზუსტად იყოს ინფორმირებული, დეტალურად აგიხსნით, რაც ხდება: საფეხბურთო კლუბი ლანჩხუთის “გურია” მონაწილეობას იღებდა 2011/12 წლების საფეხბურთო ჩემპიონატში. პირველ ეტაპზე კლუბი ასპარეზობდა პირველ ლიგაში, სადაც დაიკავა მეორე ადგილი და უფლება მოიპოვა მეორე ეტაპზე უმაღლეს ლიგის ქვედა ზონაში (9-16 ადგილებისთვის, ე.წ. პლეი აუტი) მიეღო მონაწილეობა, საიდანაც პირველი 4 გუნდი უმაღლესი ლიგის საგზურს იპოვებდა.
XXIII ეროვნული ჩემპიონატის დასრულების შემდეგ, “გურიამ” და თბილისის “ვიტ ჯორჯიამ” დააგროვეს ქულების ერთნაირი (23-23) რაოდენობა. საქართველოს 2011-12 წწ. XXIII ეროვნული ჩემპიონატის დებულების 4.4 მუხლის შესაბამისად, უმაღლეს, პირველ და დუბლების ჩემპიონატში თანაბარი ქულების დაგროვების შემთხვევაში, ადგილები გაირკვევა შემდეგი პრიორიტეტული პრინციპით: 4.4.1. ჩემპიონატში მოგებათა მეტი რაოდენობა; და ა. შ.
გამომდინარე იქიდან, რომ XXIII ჩემპიონატი დაიწყო 2011 წლის აგვისტოში და დასრულდა 2012 წლის მაისში, ამ პერიოდში კი “გურიამ” დააგროვა 18 მოგება, ხოლო “ვიტ ჯორჯიამ” _ 13 მოგება, პლეი აუტში უპირატესობა, ანუ მე-5 ადგილი უნდა მინიჭებოდა “გურიას”.
ის არგუმენტი (დათვლილი იქნა მხოლოდ პლეი აუტის მოგებები), რომლითაც ფეხბურთის ფედერაციამ გამოავლინა თუ ვის მინიჭებოდა უპირატესობა, სამართლებრივ საფუძველს მოკლებულია, რადგან: დებულებაში არსადაა მინიშნებული, რომ უპირატესობა ენიჭება რომელიმე ეტაპზე მოგებათა რაოდენობას _ 4.4.1 მუხლში საუბარია “ჩემპიონატში მოგებათა რაოდენობაზე”. პლეი აუტი კი, სადაც “ვიტ ჯორჯიას” 1 მოგებით მეტი აქვს, ვიდრე “გურიას”, არის არა “ჩემპიონატი”, არამედ მისი ერთ-ერთი ეტაპი.
ამასთან, არსებობს პრეცედენტი, როცა ანალოგიურ შემთხვევაში უპირატესობა მიენიჭა “ზესტაფონს” “მეტალურგთან” მიმართებაში _ სწორედ დებულების 4.4.1-ის საფუძველზე გამოცხადდა “ზესტაფონი” ჩემპიონად.
სამწუხაროდ, ადგილი აქვს დებულების აღნიშნული მუხლის სხვადასხვანიარად გამოყენებას _ არგუმენტს, რომ “ზესტაფონი”-“მეტალურგი” შემთხვევაში ეს იყო უმაღლეს ლიგა, ხოლო “გურია” პირველ ეტაპზე პირველ ლიგაში ასპარეზობდა, ხოლო “ვიტ ჯორჯია” _ უმაღლესში და საკითხი სხვადასხვანაირად უნდა გადაწყდეს, სამართლებრივი საფუძველი არ გააჩნია _ ეს არის დებულების კონკრეტული მუხლის ინტერპრეტაცია.
