ორშაბათი, 27 ივნისი, 2016 წელი
დილით გამიჭირდა მაგრამ, მაინც ადრე ავდექი.
კვირას დედაჩემის გარდაცვალების 39 დღეს მამა მირიანს საფლავი ვაკურთხებინე და პანაშვიდი გადავიხადეთ ჩემს ახლობლებთნ ერთად. ძალიან დიდი ტკივილი მაქვს, დედას ხომ ასაკი არა აქვს, რა დამავიწყებს ჩემი დანახვისას მის სხივჩამდგარ თვალებს. მართალია "…სანამ დედა გყავს, ნუ გეშინია…", გაუფრთხილდით და მოეფერეთ მშობლებს.
დღეს პეტრე-პავლობის მარხვა დაიწყო, მოგეცეთ ძალა, ლოცვითა და მარხვით შეხვდეთ მოწამეობრივი ღვაწლით გამორჩეულ მოციქულთა პეტრესა და პავლეს ხსენების დღეს 12 ივლისს. ახლობლები დილითვე გავისტუმრე და მეც სამსახურში წავედი, ჩემს ოთახში ძალიან ცხელოდა, ყვავილები მოვრწყე და აპარატის უფროსთან- ნინო ძიძიგურთან შევედი, მასთან როგორც ყოველთვის ძალიან გრილა, ფინჯანი ყავის მირთმევაც მოვახერხეთ.
კაბინეტიდან გამოსულს ჩემკენ მომავალი ახალგაზრდა ქალი შემხვდა, სოფელ გულიანიდან დ. ჯ. ბაბუა ეწვა ქუთაისში, კლინიკაში, რეანიმაციულ განყოფილებაში. მისი თქმით: "სოციალური მოგვიხსნეს და საშუალება არ მაქვსო" და დახმარებას ითხოვდა. რადგანაც სოციალურად შეჭირვებულთა სტატუსის მქონე იყო, პოლისითაც სარგებლობდა, გავურკვიე რომ დღემდე პოლისი ვადიანია და კლინიკაშიც თანხა არ ექნება გადასახდელი, ამ ინფორმაციით გახარებულმა, მადლობა გადამიხადა დახმარებისთვის.
მთავარი პრობლემა მოსახლეობის არაინფორმირებულობაა სოციალური დახმარების მოხსნისა და დანიშვნის კრიტერიუმთან დაკავშირებით. ძალიან მტკივნეული თემაა _ ამ სტატუსის მქონე ბენეფიციარს ერთჯერადადაც რომ დაუფიქსირედეს დამატებით ფინანსური შემოსავალი, სოციალური დახმარება შეუწყდება, არადა ჩვენი მოსახლეობა, თურქეთში, ორიოდე გროშისთვის თავს არაადამიანური შრომისთვის იმეტებს.
ხვალისთვის დღის 16.30 საათზე ფრაქციის სხდომა მაქვს დანიშნული. დღის წესრიგის საკითხებზე ვიმუშავე.
სამშაბათი, 28 ივნისი, 2016 წელი
დილით ადრე ტელეფონის ზარმა გამომაღვიძა. ჩემი მეზობელი ცუდად იყო, სასწრაფო დახმარების გამოძახება დაგვჭირდა, ავადმყოფი კლინიკაში გადაიყვანეს.
დილის საქმეს მოვრჩი და სამსახურში წასასვლელად გავემზადე, რომ მოვიდა ლ. გოგიჩაიშვილი, მთხოვა დახმარება, გამერკვია სოციალურად შეჭირვებული ბენეფიციარისთვის დახმარების შეწყვეტის მიზეზი (ამ ადამიანს გზის ფულიც კი არ აქვსო).
ხშირად მეუღლეს მივყავარ. მგზავრებსაც ვიმგზავრებთ, ამით ვცდილობთ, შევეხიდოთ მათ გადაადგილებაში. დღესაც ლესის მიმართულებით 2 ადამიანი დაგვემგზავრა. გურულებმა პოლიტიკაზე არ ისაუბროს იშვითია, ჰოდა შემომჩივლა: რას აკეთებს ხელისუფლება ჩვენთვისო, არც სამუშაო გვაქვს და არც დახმარებაო. მე კი მინდა იმედი ჩავუსახო ასეთ ადამიანებს…
ამ საუბარში ლანჩხუთში შემოვედით. აპარატის თანამშრომლებს მივესალმე, ერთმანეთი მოვიკითხეთ, კაბინეტში პრესა დამხვდა, გადავხედე და ნინო ძიძიგურთან შევედი _ საოცრად პოზიტიური ადამიანია. ფინჯანი ყავაც მივირთვით.
ჩემს კაბინეტში სოციალური კომისიის ჩატარებული სხდომის ოქმს გადავხედე, კომისიის თავმჯდომარესთან, ქალბატონ ი. ჩხაიძესთან მქონდა რამდენიმე საკითხთან დაკავშირებით განსხვავებული აზრი, რომელიც თავმჯდომარის მიერ გათვალისწინებული იქნა.
16.30 საათზე ბიუროს მცირე დარბაზში ფრაქციის სხდომა დროულად დავიწყეთ. დღის წესრიგში შემავალი თითოეული საკითხი ძალიან მნიშვნელოვანია, პეტიციის ფორმის, განცხადების რეგისტრაციის, მოწმობის წესის დამტკიცება თვითმმართველობის განხორციელებაში, მოსახლეობის მეტად ჩართულობას უწყობს ხელს, ეს კი თავის მხრივ თვითმმართველობის განხორციელების ეფექტურობას ზრდის. თუმცა მიღებული წესის დამტკიცება, მხოლოდ ფურცელზე დატანილი აუცილებლობაა.
მოსახლეობამდე ინფორმაციის მიტანას, ხელისუფლება გულგრილად უყურებს. მე ყოველდღიურ რეჟიმში ვცდილობ მოქალაქეების აქტიურ ჩართულობაზე, რათა ხელისუფლება მეტად ანგარიშვალდებული იყოს მათთან. სწორად განსაზღვროს საკეთებელი პრიორიტეტები.
სხდომაზე განვიხილეთ წინა კვირას ფრაქცია "მეტი ქალი პოლიტიკაში" წევრების მიერ ნიგოითის, ქვიანის, ჭყონაგორის, ჩოლობარგის ბიბლიოთეკების დათვლიერება-შესწავლის შედეგი.
მინდა გითხრათ, რომ ბიბლიოთეკები სავალალო მდგომარეობაშია, ძალიან უგულოდ უნდა მოექცე კულტურის კერას, ასეთ მდგომარეობაში რომ ჩავარდეს. ამ პირობებში, ბიბლიოთეკარების მუშობა სამადლობელია. ხელისუფლებას მეტი გულისხმიერება რომ გამოეჩინა, ბიბლიოთეკებს საკუთარი შენობა და პირობა ექნებოდა მკითხველებისათვის. აღარ ვსაუბრობ იმ მწირ წიგნად ფონდზე, რომელიც განახლებას საჭიროებს. ჩვენი ფრაქცია ცდილობს პრობლემების წარმოჩენას, შესაბამისად გვაქვს სურვილი და შესაძლებლობა დავეხმაროთ მათ.
ერთ-ერთი საკითხი, რომელიც აღმსრულებელი ხელისუფლების, იურიდიული სამსახურის მიერ იქნა პროექტის სახით ინიცირებული, ეხებოდა ერთი საშტატო ერთეულის (იურისტის) დამატებას, სასამართლოებში წარმომადგენლის სტატუსით. აღნიშნულ პროექტს არც ფინანსური უზრუნველყოფის დოკუმენტი და სასამართლოში ყოველდღიურობით გამოწვეული აუცილებლობა ჰქონდა. ამიტომაც ფრაქციამ მხარი არ დაუჭირა აღნიშნულ საკითხს. სხდომის დროს საწინააღმდეგო მოსაზრებასაც ვისმენდი, სხდომა დიდხანს გაგრძელდა. 19.00საათისთვის დასრულდა და გავედი შენობიდან ჩემს კოლეგებთან ერთად. სახლში უამრავი ქალის საქმე მელოდება. ღამით მივუჯექი კომპიუტერს, ძალიან გამიტაცა და გვიან დავიძინე.
ოთხშაბათი 29 ივნისი 2016 წელი.
დილიდანვე მოვემზადეთ მე, დ. ბურჭულაძე, მ. კუპატაძე და გავედით აცანის მომართულებით. გზა მართლაც კარგია სამგზავროდ და მალევე მივედით სოფლის ცენტრში.
ლამაზი სანახავია მწვანეში ჩაფლული ეკლესია, ირგვლივ სავაჭრო მაღაზიებია, შესამჩნევი იყო სისუფთავე, ხალხიც ფუსფუსებდა, ყველა სოფელს უმრავლოს ისეთი გულისხმიერი ბიზნესმენები, რომლების აღმშენებლობას შეუწყობს ხელს, რითაც ასე ლამაზია აცანის ცენტრი.
კულტურის ცენტრს მივადექით და დავინახეთ ბიბლიოთეკის აბრა. შემოგვეგება ბიბლიოთეკარი, ქალბატონი თინათინ ონიანი, თავის თანაშემწე მარიამ ჩხაიძესთან ერთად.
რემონტი ახალგაკეთებულია, მაგრამ წიგნადი ფონდის სიმწირეს უჩივიან. 3 ბიბლიოთეკა გაერთიანდა მაგრამ ბევრი საკითხავად უვარგისი წიგნი იყო. საბავშვო ლიტერატურაც ცოტა გვაქვსო და ბოლოს ხელფასიც მცირე აქვთ. ჩვენ თანადგომა გამოვხატეთ, დახმარება აღვუთქვით, დიდი მადლობა ქალური სოლიდარობისთვისო და გამოგვაცილეს.
ქვემო აკეთისა და ჭანჭათის ბიბლიოთეკების ნახვისას, ვიგრძენი, რომ ბიბლიოთეკები ყოველდღიურად მასპინძლობს მკითხველს. ჭანჭათში ბიბლიოთეკა მეორე სართულზე, ურემონტო შენობაშია, მაგრამ წიგნები საოცრად მოვლილი და ნალოლიავებია. თუნდაც, იმ ერთი ბიბლიოთეკარისთვისაც ღირს პირობების გაუმჯობესება. შუქის პრობლემის მოგვარება, ვისგანაც საოცარი სულიერება ვიგრძენი.
მამათის ბიბლიოთეკის შესწავლა ვერ მოვახერხეთ _ დაკეტილი დაგვხვდა. ბიბლიოთეკარი ავად არისო, გვითხრეს.
უკან დაბრუნებისას გავიგეთ სულხან მოლაშვილის გარდაცვალების ამბავი, ემოციას ვერ ვმალავ… მერამდენე ადამიანი "მოვკალით" წამებით, ჩვენ ყველა დამნაშავე ვართ მათ წინაშე. განსაკუთრებული პასუხისმგებლობა ამ ნაც-ხროვასთან კოჰაბიტირებულ ხელისუფლებას ეკისრება.
ხუთშაბათი 30 ივნისი 2016 წელი.
09.00 საათზე უკვე სამსახურში ვიყავი. 10.00 საათზე საკრებულოს სხდომა გაიმართა. დღის წესრიგიდან გამგეობის მიერ მომზადებულ პროექტს საშტატო ერთეულის დამატებასთან დაკავშირებით, ჩვენმა ფრაქციამ მხარი არ დაუჭირა,
სხდომის დამთავრების შემდეგ, შესვენების დროს, გავედი ჩემს თანაპარტიელებთან ოფისის გახსნის საკითხთან დაკავშირებით. სამსახურში დაბრუნებულს რამდენიმე ადამიანი დამხვდა, რომელთაც დავეხმარე.
დღის ბოლოს ჯურუყვეთში შევიარე და გვიან დავბრუნდი სახლში.
პარასკევი 01 ივლისი 2016 წელი.
დილიდანვე ცხელოდა. ვიდრე სამსახურში წამოვიდოდი, შრომისუბნის ცენტრში შეკრებილებს მივესალმე. გზის დაგების თაობაზე საუბრობდნენ: "რა გვეშველება, გულიანში რომ დააგეს ასფალტი, ისე თუ გააგრძელესო. მთხოვეს, დაგვეხმარე, რომ სოფლის ცენტრი მთლინად დაიფაროს ასფალტით. ნუ გეშინია, ჩვენი მოთხოვნილი სტადიონი მაინც არ გაგვიკეთესო.
ამ საკითხებზე პასუხისთვის საზედამხედველო სამსახურის უფროსთან მქონდა საუბარი. ვნახოთ…
აპარატის თანამშრომელს ყოველდღიურად შემოაქვს საკრებულოს თავმჯდომარის მიერ რეზოლუციადადებული საკითხები ფრაქციისთვის. საკითხების განხილვას სახლში გავაგრძელებ.
შაბათი, 02 ივლისი, 2016 წელი
არსად წასვლას არ ვაპირებ, ყველაზე მეტად ტყემლის საწებლის შენახვა მადარდებს _ იქნებ დღეს მოვახერხო. ცოტა დრო მეზობლებთან გავატარე. შემატყობინეს, რომ ოზურგეთში ვიყავი შეხვედრაზე ჩასასვლელი 15.00საათზე. ესეც ჩემი საწებელი! იქედან გვიან დავბრუნდი _ რა ვქნა, საარჩევნო კამპანია დაწყებულია, საოჯახო საქმეები მოიცდის...
კვირა, 03 ივლისი, 2016 წელი
დილიდან ოფისის მოწესრიგებას მოვუნდით, მაგრამ დაღლა არ მიგრძვნია.
კმაყოფილი ვარ, სახლში უამრავი საქმე მელოდება, ძალიან გვიან დავასრულე, ცოტა ხანი კომპიუტერს მივუჯექი, ინფორმაციებიც მაინტერესებდა, ხვალიდან დაიწყება ახალი ენერგიით ჩვეული სამუშაო კვირა. ხვალამდეეეე…
მომდევნო კვირის "ბლოგ-პოსტს" გადავცემ ჩემს კოლეგას, ლანჩხუთის მუნიციპალიტეტის სოფელ ლესის მაჟორიტარ-დეპუტატს, ელისო ჭიჭინაძეს.
