ქალაქ ოზურგეთში ნოდარ დუმბაძის სახელობის თეატრალური ფესტივალი გაიხსნა. ფესტივალს გახსნას კულტურის მინისტრი, მიხეილ გიორგაძე ესწრება.
"ოზურგეთში პირველად დაიწყო ნოდარ დუმბაძის საერთაშორისო თეატრალური ფესტივალი. არაერთი ქართული პროფესიული დასი ჩამოვა ოზურგეთში, ასევე სტუმრის სტატუსით ფესტივალს დახურავენ ლიტვის თეატრის მსახიობები.
დარწმუნებული ვარ ის ადამიანები, რომლებიც დაესწრებიან სპექტაკლებს, სცენაზე მათთვის ძალიან კარგად ნაცნობ და საყვარელ ნოდარ დუმბაძის პერსონაჟებს აღმოაჩენენ და თავიდან შეხვდებიან." – თქვა მიხეილ გიორგაძემ.
მისივე თქმით, ოზურგეთის თეატრის სამხატვრო ხელმძღვანელმა ვასილ ჩიგოგიძემ ის პირადად დაარწმუნა, რომ ფესტივალი აუცილებლად უნდა ჩატარებულიყო გურიაში.
"ახლაც მახსოვს მისი სახე. დიდი რამეა კულტურა და არასდროს ფული არ გვაქვს, მაგრამ იმ მომენტში მივხვდი ყველაფერი უნდა გამეკეთებინა იმისთვის, რომ ამ ინიციატივისთვის მხარი დაგვეჭირა.
ძალიან დიდი იმედი მაქვს ეს ფესტივალი იქნება ტრადიციული და ყოველ წელს ახალი სტუმრები გვეყოლება სხვადასხვა ქვეყნიდან."– თქვა ფესტივალის გახსნის დროს მიხეილ გიორგაძემ.
"ყველანაირი გადაჭარბების გარეშე შემიძლია გითხრათ, რომ ქალაქის მერი დღეს არის ამაყი, რადგან ქალაქ ოზურგეთი მასპინძლობს ნოდარ დუმბაძის სახელობის ფესტივალს. 10 დღის მანძილზე ოზურგეთში რაც მოხდება, იტყვით, რომ მსგავსი რამ თეატრის სცენაზე არ გინახავთ." – უთხრა დამსწრე საზოგადოებას ქალაქ ოზურგეთის მერმა, ბეგლარ სიორიძემ.
სპექტაკლის დაწყებამდე მაყურებელს ასევე სიტყვით მიმართა ალექსანდრე წუწუნავას სახელობის დრამატული თეატრის სამხატვრო ხელმძღვანელმა, ვასილ ჩიგოგიძემ.
მისი თქმით, 10 დღის განმავლობაში ოზურგეთში თეატრის მოყვარულებს არაერთი სიურპრიზი ელოდებათ.
თეატრალური ფესტივალი "ბოშებით" გაიხსნა, რომლის რეჟისორი გიზო ჟორდანიაა. ცნობილმა რეჟისორმა ეს სპექტაკლი ოზურგეთელ მსახიობებთან ერთად დადგა.
სპექტაკლის პრემიერას ადგილობრივი ხელისუფლების, საზოგადოების და მედიის წარმომადგენლები დაესწრნენ.
