გუშინ გრიგოლეთის საწვრთნელ ბაზაზე პირველი სპარინგ-მატჩი ჩაატარა რამდენიმე დღის შეკრებილმა ლანჩხუთის "გურიამ". ამჯერზე ლანჩხუთელთა მეტოქე ქუთაისის "ტორპედო" იყო.
ჩვენებურთა თავკაცმა, თემურ მახარაძემ სასტარტო შემადგენლობაში რატი იმერლიშვილთან, ზურა გელაშვილთან, ლუკა ნოზაძესთან, გიორგი ჩადუნელსა და გიორგი ალავერდაშვილთან ერთად 6 ახალწვეული დაუპირისპირა მეტოქეს, აქედან ორი ლეგიონერი- კოტდიუარელი სიდიბეი და ბრაზილიელი დენისი.
ახალწვეულთა შორის იყო 21 წლის ნიკა დიასამიძე, რომელიც ბათუმის "დინამოს" აღზრდილია, უთამაშია თბილისის "დინამოშიც“. 23 წლის თორნიკე სტეფნიაშვილი კი წლების მანძილზე მოლდოვას ჩემპიონატში ასპარეზობდა. ხოლო 23 წლის ირაკლი ხუჭუა, წარსულში ბოლნისის „სიონსა“ და ქობულეთის „შუქურაში“ თამაშობდა.
სასტარტო შემადგენლობაში იყო ასევე გუნდში დაბრუნებული ადგილობრივი კადრი ლევან ინგოროყვას სახით, რომელიც ჩავლილ სეზონში ქობულეთის "შუქურასა" და ოზურგეთის "მერცხალში" გამოდიოდა.
შეხვედრის მეორე ტაიმში "გურია" განახლებული შემადგენლობით გამოვიდა, თემურ მახარაძემ სარბიელზე ერთდროულად 10 ახალწვეული შეიყვანა, აქედან გიგა ჭეიშვილი, დათო მეგრელიშვილი და ბიძინა ცინცაძე უკვე თამაშობდნენ ლანჩხუთში. მათ გარდა ახალწვეულთა შორის იყო: 20 წლის ცოტნე მესხი (თამაშობდა "სიონსა" და "შუქურაში), 20 წლის ჭიაბერ ჭეჭელაშვილი (თბილისის"დინამო-2", "ცხინვალი", "დილა"), 24 წლის ირაკლი ქობალია (გამოდიოდა "ზუგდიდსა" და "ზესტაფონში", ერთი მატჩი ეროვნულ ნაკრებშიც აქვს ნათამაში), 21 წლის ზურა თევზაძე (ფოთის "კოლხეთი"), 27 წლის გიორგი ჭედია (უთამაშია თბილისის "დინამოში", რუსთავის "მეტალურგში", ბოლნისის "სიონში", ქუთაისის "ტორპედოსა" და რამდენიმე უცხოურ კლუბში).
ასევე მეორე ტაიმში საკუთარი შესაძლებლობები აჩვენა "გურიას" გულშემატკივრებს კიდევ ორმა ბრაზილიელმა ლეგიონერმა- ფილიპემ და იურიმ. ლანჩხუთელთა კარს კი ბოლომდე რატი იმერლიშვილი იცავდა, რომელსაც თამაშის განმავლობაში დიდი გარჯა არც დასჭირვებია.
მატჩის ერთადერთი გოლი, ეფექტური დარტყმით, თამაშის 28-ე წუთზე მასპინძელმა გიორგი ალავერდაშვილმა გაიტანა. ჩვენებურებმა კიდევ რამდენიმე სახიფათო მომენტი შექმნეს მეტოქის კართან, თუმცა, ჯეროვნად ვერ გამოიყენეს.
სტუმართაგან საუკეთო შანსი კი "ტორპედოს" ლანჩხუთელ წევრს, ვანო წილოსანს მიეცა, მაგრამ აქტიურად მოთამაშე შემტევმა მშობლიური გუნდის კარი ვერ დალაშქრა.
საბოლოოდ, "გურიამ" 1:0 მოიგო…
ამჯერზე ჩვენმა გუნდმა კარგი შთაბეჭდილება დატოვა, მით უფრო, რომ გუნდი ახალი შეკრებილია. იმედია, ახალ სეზონ "გურია" სრულ მზადყოფნაში შეხვდება.
მომდევნო ამხანაგური თამაში "გურიას" ცხრა ივლისისთვის აქვს ჩანიშნული.
