23 მაისს, "გურია ნიუსისა" და არასამთავრობო ორგანიზაცია "POST-ალიონის" მოწვევით, პროექტის "მონოლოგიდან – დიალოგამდე" ფარგლებში, "ივლიტას ბიბლიოთეკაში" საქართველოს თავდაცვის მინისტრი თინათინ ხიდაშელი გურიის ოთხივე მუნიციპალიტეტში მცხოვრებ ახალგაზრდებს შეხვდა.
ახალგაზრდებთან შეხვედრას საქართველოს შეიარაღებული ძალების გენერალური შტაბის უფროსის მოადგილე, პოლკოვნიკი ნიკოლოზ აგლაძე და დასავლეთის სარდალი, პოლკოვნიკი შალვა ჯაბახიძე ესწრებოდნენ.
სტუმრებმა ადგილობრივ ახალგაზრდებს ნატო-საქართველოს ურთიერთობებზე, ალიანსში გაწევრიანების პერსპექტივებზე, ევროკავშირსა და შეიარაღებულ ძალებში მიმდინარე პროცესებზე ესაუბრნენ.
შეხვედრაზე, რომელიც 2 საათზე მეტხანს გაგრძელდა, ახალგაზრდებმა გამოთქვეს დიდი სურვილი, რომ ეწვიონ საქართველოს თავდაცვის აკადემიას და მათი უმეტესობა გოგონები არიან, რომლებსაც სურვილი აქვთ, აკადემიის კურსანტები გახდნენ და საქართველოს შიარაღებულ ძალებში იმსახურონ. სპონტანურად დაიგეგმა მომავალი ექსკურსია საქართველოს თავდაცვის აკადემიაში და იქვე შედგა მსურველთა სია, საკონტაქტო ინფორმაციის მითითებით, რომელშიც 56 ახალგაზრდა ჩაეწერა.
ჩვენ სია თავდაცვის სამინისტროს გადავუგზვნეთ. როგორც თავდაცვის სამინისტროს საზოგადოებასთან ურთიერთობის სამსახურიდან გვაცნობეს, თავდაცვის აკადემიაში ახალგაზრდების სტუმრობა სექტემბერში შედგება: " ჩვენთვის სასიამოვნოა, რომ ასეთი დიდი დაინტერესებაა ახალგაზრდების მხრიდან და მათ აუცილებლად ღირსეულად ვუმასპინძლებთ – საქართველოს თავდაცვის აკადემიაში მათი ექსკურსია სექტემბრისთვის დაიგეგმა, რადგან გვინდა, ყველას მიეცეს შესაძლებლობა, გაეცნოს აკადემიის მუშაობას. ახლა, ბევრი მათგანი, ალბათ, დასასვენებლადაა წასული ან წასვლას გეგმავს. ამიტომ, უმჯობესი იქნება ექსკურსია სექტემბერში დაგვეგმოთ, "_ გვითხრეს თავდაცვის სამინისტროს საზოგადოებასთან ურთიერთობის სამსახურში.
