ნოდარ დუმბაძის სახელობის საერთაშორისო თეატრალური ფესტივალი იონას მილტინისის დრამატული თეატრისა და ოზურგეთის ალექსანდრე წუწუნავას სახელობის სახელმწიფო პროფესიული დრამატული თეატრის მსახიობების ერთობლივი მონაწილეობით სპექტაკლით "გამარჯობა, ხალხო" დაიხურა.
"გამარჯობა, ხალხო!" ოზურგეთის თეატრის სამხატვრო ხელმძღვანელის ვასილ ჩიგოგიძის სპექტაკლია, რომელიც ნოდარ დუმბაძის "მე, ბებია, ილიკო და ილარიონი"-ს მიხედვით არის დადგმული. სპექტაკლში თითქმის მთელი დასი მონაწილეობს სამივე თაობიდან. ოზურგეთის თეატრი, ერთგვარად, ცდილობს რეპერტუარში დაამკვიდროს მშობლიური და ახლობელი ნოდარ დუმბაძის ნაწარმოებების სცენური ინტერპრეტაციები, რასაც ორი მიზეზი აქვს: ერთი მხრივ, დუმბაძის გმირების კოლორიტულობა ისეთივე ახლობელია გურული არტისტებისთვის, როგორც იმერლებისთვის კლდიაშვილისა და კაკაბაძის პიესების გმირები. შესაბამისად, არტისტებისთვის კომფორტულია მსგავსი გმირების გაცოცხლება სცენაზე; მეორე მხრივ, თეატრი ცდილობს ქართულ კლასიკად აღიარებული, ყველასთვის საყვარელი პერსონაჟების დამკვიდრებას (დაბრუნებას) მის რეპერტუარში.
ლიტველი და ოზურგეთელი მსახიობების მიერ განსახიერებული ყველასათვის ნაცნობი გმირი მაყურებლების უმეტესობამ დადებითად შეაფასა.
"ეს იყო ერთგვარი პროექტი, რომელიც განხორციელდა ოზურგეთის თეატრის სცენაზე", _ თქვა ვასილ ჩიგოგიძემ.
წლების წინ მან სწორედ ეს სპექტაკლი დადგა ლიტვაში და აქედან გამომდინარე მიიღო გადაწყვეტილება ორი თეატრის მსახიობების მონაწილეობით დაედგა "გამარჯობა, ხალხო"-ს განახლებული ვერსია.
"თერთმეტის დღის განმავლობაში 14 სპექტაკლი გაიმართა. ნოდარ დუმბაძის სახელობის საერთაშორისო ფესტივალი დაიხურა, მაგრამ ჩვენ შევხვდებით 2018 წელს. აუცილებლად იქნება სიახლეები და საინტერესო სტუმრები", _ თქვა სპექტაკლის დასრულების შემდეგ ვასილ ჩიგოგიძემ.
მან სცენაზე უხმო რეჟისორ გიზო ჟორდანიას, რომლის სპექტაკლით "ბოშები", ოზურგეთელი მსახიობების მონაწილეობით, თეატრალური ფესტივალი გაიხსნა.
კულტურის მინისტრის მოადგილე, მანანა ბერიკაშვილი დარწმუნებულია, რომ ოზურგეთის თეატრში არაერთი წარმატებული რეჟისორი ჩამოვა და დადგამს სპექტაკლს.
„მივესალმები ბატონ გიზო ჟორდანიას, რომლის რეჟისორობით დაიდგა "ბოშები და ამით გაიხსნა ნოდარ დუმბაძის სახელობის თეატრალური ფესტივალი. თქვენ საფუძველი ჩაუყარე კარგ საქმეს და თქვენს შემდეგ ჩამოვლენ წარმატებული და ძვირფასი რეჟისორები, თქვენს კვალს დაადგებიან და ამ თეატრის საინტერესო სპექტაკლები დაიდგმება.
"ყველას ვულოცავ დღევანდელ დღეს და ასევე მივესალმები ლიტველ მსახიობებს, რომლებმაც ოზურგეთელ მსახიობებთან ერთად დახურეს ფესტივალი", _ განაცხადა თავისი სიტყვის გამოსვლის დროს მანანა ბერიკაშვილმა.
თეატრალური ფესტივალის დახურვის ცერემონიაზე ნოდარ დუმბაძის სახელობის პრიზი გადაეცათ იონას მილტინისის დრამატული თეატრს და ოზურგეთის ალექსანდრე წუწუნავას სახელობის სახელმწიფო პროფესიული დრამატული თეატრის დასს.
მსგავსი პრიზი ყველა თეატრის წარმომადგენლებს გადასცეს, რომლებმაც ფესტივალში მონაწილეობა მიიღეს.
საქართველოს სატირისა და იუმორის საერთაშორისო ასოციაციის თავმჯდომარემ, დავით თოთიბაძემ ფესტივალში აქტიურად მონაწილეობისთვის, ლიტვის თეატრისა და კინოს ბრწყინვალე მსახიობს ლიგიტა კონდროტაიტეს (ოლღა ბებიას როლის შემსრულებელს), ნოდარ დუმბაძის სახელობის პრემია გადასცა, ხოლო ცნობილ ქართველ მსახიობს, დამსახურებულ არტისტს, ამირან ქადეიშვილს იპოლიტე ხვიჩიას სახელობის პრემია მისცა.
ოზურგეთის თეატრის დირექტორმა, ზაზა ჯინჭარაძემ ორიგინალური საჩუქარი, დამბაჩები გადასცა ილიკოს როლის შემსრულებელს, ლიტველ მსახიობს ალბინას კელერისის.
ქალაქ ოზურგეთის მერმა, ბეგლარ სიორიძემ დამსწრე საზოგადოებას მადლობა გადაუხადა ყველა იმ პირს ვინც ფესტივალში აქტიურად მიიღო მონაწილეობა.
"გულახდილად გეუბნებით, რომ ძალიან ამაყი ვარ, როგორც ქალაქის მერი, რადგან ამ ფესტივალის ერთ-ერთი დამფუძნებელი ვარ", _ თქვა ქალაქ ოზურგეთის მერმა, ბეგლარ სიორიძემ.
სიტყვით ასევე გამოვიდნენ გურიის გუბერნატორი, გია სალუქვაძე, საქართველოს პარლამენტის წევრი, ზვიად კვაჭანტირაძე და ნოდარ დუმბაძის ქალიშვილი, ქეთევან დუმბაძე.
"მადლობა ყველას ასეთი საინტერესო და მნიშვნელოვანი ფესტივალის ჩატარებისთვის. ასევე თქვენი ნებართვით განსაკუთრებით მინდა, რომ მივესალმო ლიტველ სტუმრებს. პატარა ამბავი არ არის რამდენიმე ათასი კილომეტრი გადმოლახო პატარა, ქართულ პროვინციულ ქალაქში ჩამოხვიდე, რომელსაც დიდი პრენტენზიები აქვს და აბსოლუტურად სამართლიანად. წარმატებული აღმოჩნდა თქვენი მონაწილეობა ფესტივალში", _თქვა ზვიად კვაჭანტირაძემ.
ქეთევან დუმბაძემ ფესტივალი დადებითად შეაფასა: "არაჩვეულებრივი ფესტივალი იყო და 11 დღის განმავლობაში ამ ფესტივალით ცოცხლობდა საზოგადოება. ერთი განცდა მაქვს ამ წუთას, მე მგონი მთელი ქვეყანა ჩვენ ვართ."
მსახიობ ნინელი ჭანკვეტაძის თქმით, ნოდარ დუმბაძე სიტყვის ოსტატი და მისი ნაწარმოებები არის კლასიკა.
"ძალიან მნიშვნელობა აქვს რეგიონებში ფესტივალების აღორძინებას და დაარსებას. სასიხარულოა ის ფაქტი გურიაში დაარსდა ნოდარ დუმბაძის სახელობის თეატრალური ფესტივალი. მთელ საქართველოს ვულოცავ ამ ფესტივალის დაარსებას. ეს ფესტივალი არ უნდა იყოს ერთჯერადი და ველოდები 2018 წელს", _ გვითხრა ნინელი ჭანკვეტაძემ.
ფესტივალის მიმდინარეობისას ქალაქს არაერთი ცნობილი მსახიობი, ხელოვნებათმცოდნე და გამოჩენილი ადამიანი სტუმრობდა.
ფესტივალის დახურვის ცერემონია ნოდარ დუმბაძის და გიგა ლორთქიფანიძის სიმღერის აუდიო ჩანაწერის მოსმენით დასრულდა.
