_ 24 წლის ქადეიშვილი მამა-შვილი ხურციძეების მკვლელობაში იყო ეჭვმიტანილი. ქადეიშვილის ლიკვიდაცია თავისსავე სოფელში, ოზურგეთის მუნიციპალიტეტის სოფელ შრომაში მოხდა. სოფელ შრომის რწმუნებულის ზურაბ მჟავანაძის თქმით, “ქადეიშვილი 4 იანვარს, დილის საათებში, შრომაში ერთ-ერთ ოჯახში შევარდა და საკუთარი ბიძის ძმისშვილის ცოლი დაჭრა. ქადეიშვილმა დააპირა, რომ ოზურგეთის პოლიციის უფროსისთვის ესროლა, მაგრამ ვერ მოასწრო და ხელში დაიჭრა”. მჟავანაძისვე თქმით, დაჭრილმა მაინც მოახერხა პოლიციელების მისამართით გასროლა, რა დროსაც მას სასიკვდილო ტყვია მოხვდა.
როგორც “გურია ნიუსს” ოზურგეთის სასწრაფო სამედიცინო სამსახურის მორიგე ექიმმა ალექსანდრა ჭანტურიამ უთხრა, შეტყობინება, რომ ქალბატონი დაჭრილი იყო, 4 იანვარს, 11:07 წუთზე მიიღეს: _ გამოძახების ადგილზე მისვლის შემდეგ დაზარალებულ ქალბატონს გაეწია პირველადი დახმარება, შემდეგ კი საავადმყოფოში გადმოვიყვანეთ. მას სასწრაფო ოპერაცია ჩაუტარდა, _ გვითხრა ჭანტურიამ. მოგვიანებით “გურია ნიუსს” რაიონული ცენტრალური საავადმყოფოს მორიგემ ექიმმა ლია გოგოტიშვილმა აცნობა, რომ დაჭრილის მდგომარეობა კრიტიკულია და იგი სასუნთქ აპარატზე იყო მიერთებული. გასული კვირის ხუთშაბათს კი იგი ქუთაისში გადაიყვანეს _ მისი ჯანმრთელობის მდგომარეობა ამ დრომდე მძიმე რჩება.
დაჭრილის მამამთილი ამბობს, რომ ქადეიშვილმა მისი რძალი დაჭრა და მიიმალა. მომხდარიდან, დაახლოებით, ერთი საათის შემდეგ მოვიდა პოლიცია: _ საპირფარეშოსთან მივედით მე და ორი პოლიციელი, ქადეიშვილი გამოვარდა და მითხრა, რომ გვერდზე გავსულიყავი, რის შემდეგაც გაისროლა პოლიციელების მიმართულებით, თუმცა, სამართალდამცავებმა მისი ლიკვიდაცია მოახერხეს, _ ამბობს დაჭრილის მამამთილი.
დაზარალებულის დედამთილი ამტკიცებს, რომ ქადეიშვილმა მათ საცხოვრებელ სახლში 15 ტყვია გაისროლა: _ ახლაც ვერ ვხდები, რატომ დაჭრა ჩემი რძალი, არანაირი ცუდი ურთიერთობა არ გვქონდა მასთან, კარგად არც ვიცნობდით, _ გვითხრა მან.
“გურია ნიუსის” წყაროს ინფორმაციით, დავით ქადეიშვილი სანამ კუტოღლიანის ოჯახში მივიდოდა, მანამ სხვა ოჯახში იმყოფებოდა, სადაც ხელყუმბარა გავარდნია, იარაღიდან რამდენჯერმე გაუსროლია, რის შემდეგაც მისი ნათესავის სახლში მისულა. რატომ ესროლა ახალგაზრდა ქალს ქადეიშვილმა, ან მან ესროლა თუ არა, რას აკეთებდა დაჭრის შემდეგ ისევ იმ ოჯახში ერთი საათის განმავლობაში, სანამ პოლიცია მოვიდოდა, ამ ვერსიებზე, ჯერჯერობით, ახლობლები არ საუბრობენ. ისე, არაოფიციალური ინფორმაციით, სწორედ დაჭრილმა ქალბატონმა მოახერხა პოლიციისთვის ეცნობებინა, თუ რა ხდებოდა მის ოჯახში.
შინაგან საქმეთა სამინისტრომ სპეცოპერაციიდან რამდენიმე საათის შემდეგ განცხადება გაავრცელა, სადაც წერია: “2011 წლის 4 იანვარს, შინაგან საქმეთა სამინისტროს გურიის სამხარეო მთავარ სამმართველოს დაუკავშირდა სოფელ შრომის მკვიდრი, რომელმაც განაცხადა, რომ მასთან სახლში იმყოფებოდა პოლიციის მიერ ძებნილი დავით ქადეიშვილი. მოგვიანებით გაირკვა, რომ დავით ქადეიშვილი იმყოფებოდა მისი ნათესავის, კუტოღლიანი-მიშკინას ბინაში, სადაც ის მივიდა დახმარების თხოვნით, თუმცა, უარის მიღების შემდეგ,მ მას მოუვიდა კონფლიქტი მისსავე ნათესავთან და კუტოღლიანი-მიშკინასი დაჭრა მუცლის არეში ავტომატური ცეცხლსასროლი იარაღიდან გასროლით, რის შემდეგაც ოჯახის წევრებმა მოახერხეს პოლიციასთან დაკავშირება. ადგილზე მისულ პოლიციას დავით ქადეიშვილმა გაუწია შეიარაღებული წინააღმდეგობა, არ დაემორჩილა სამართალდამცველების კანონიერ მოთხოვნას, ჩაბარებოდა პოლიციას და ავტომატური ცეცხლსასროლი იარაღიდან გახსნა ცეცხლი პოლიციის მიმართულებით. ორმხრივი სროლის შედეგად, სამწუხაროდ, დავით ქადეიშვილი გარდაიცვალა, რაც შეეხება დაჭრილ კუტოღლიან-მიშკინას, იგი გადაყვანილია საავადმყოფოში, სადაც მას ჩაუტარდა ქირურგიული ოპერაცია”, _ აღნიშნულია ოფიციალურ განცხადებაში.
ასევე ოფიციალური ინფორმაციით, დავით ქადეიშვილი შემდეგი დანაშაულის ჩადენისთვის იძებნებოდა: 2008 წლის აგვისტოში, ოზურგეთის რაიონის სოფელ შრომაში მცხოვრებ მალხაზ მჟავანაძის საცხოვრებელი სახლის ავტომატური ცეცხლსასროლი იარაღით დაყაჩაღება; 2008 წლის აგვისტოს თვეში ოზურგეთის რაიონის სოფელ შრომაში მცხოვრებ ავთანდილ გელაშვილის მკვლელობის მცდელობა; 2009 წლის 29 დეკემბერს ოზურგეთის რაიონის დაბა ურეკის ტერიტორიაზე ბენზინგასამართი სადგურ “ვისოლის” დაყაჩაღება; იმავე დღეს, ოზურგეთის რაიონის სოფელ შრომაში მცხოვრებ ავთანდილ კუგასიანისაგან ავტომატური ცეცხლსასროლი იარაღით ფულის გამოძალვა და ავტომანქანის გატაცება; 2010 წლის 7 იანვარს ოზურგეთის რაიონის სოფელ შრომაში მცხოვრებ მიხეილ მჟავანაძის საცხოვრებელი სახლის ავტომატური ცეცხლსასროლი იარაღით დაცხრილვა; ამავე სოფლის საჯარო სკოლისა და სკოლის ავტობუსის ავტომატური ცეცხლსასროლი იარაღით დაცხრილვა; ყაჩაღობის მიზნით ამავე სოფელში მდებარე მაღაზიის ავტომატური ცეცხლსასროლი იარაღით დაცხრილვა; სოფელ შრომაში მცხოვრებ სიმონ კუგასიანის საცხოვრებელი სახლის ავტომატური ცეცხლსასროლი იარაღით დაყაჩაღება; ამავე სოფელში მცხოვრებ ზურაბ მჟავანაძის ოჯახზე ყაჩაღური თავდასხმა და მისი კუთვნილი ავტომანქანა “ნივას” გატაცება; 2010 წლის 15 დეკემბერს, ავტომატური ცეცხლსასროლი იარაღით შეიარაღებული, თავს დაესხა ოზურგეთის მუნიციპალიტეტის სოფელ თხინვალში მცხოვრებ თედორე გიორგის ძე ხურციძის ოჯახს და შურისძიების მოტივით ავტომატიდან გასროლით მოკლა მამა-შვილი _ 1957 წელს დაბადებული თედორე და 1980 წელს დაბადებული ირაკლი ხურციძეები, ასევე დაჭრა ირაკლი ხურციძის მეუღლე _ 1985 წელს დაბადებული ქეთინო აშუბა და შვილი _ 10 თვის გიორგი ხურციძე.
შინაგან საქმეთა სამინისტრომ ქადეიშვილზე ძებნა და მისი ადგილსამყოფელის შეტყობინების სანაცვლოდ ჯილდო _ 10 000 ლარი 2010 წლის 15 დეკემბერს ოზურგეთის მუნიციპალიტეტის სოფელ თხინვალში მომხდარი მკვლელობის შემდეგ გამოაცხადა. თუმცა, ვინ მიიღებს სამინისტროს მიერ დაწესებულ ჯილდოს, ამ ეტაპზე უცნობია.
“გურია ნიუსისთვის” ასევე ცნობილი ხდება, რომ მოკლულ დავით ქადეიშვილს გულის ჯიბეში თან ჰქონდა ლოცვანის წიგნი და საქართველოს კათალიკოს-პატრიარქის ილია მეორეს მიერ დაწერილი ლექსი.
სოფელში ამბობენ, რომ მსგავსი ტრაგედიის მომსწრენი არასოდეს ყოფილან. რამდენიმე ადამიანის თქმით, მსგავსი ფიზიკური მონაცემების მქონე ახალგაზრდა, როგორიც დავით ქადეიშვილი იყო, იშვიათია.
ლიკვიდირებულ ქადეიშვილს ოჯახი ხვალ დაკრძალავს. რაც შეეხება მის მამას და ძმას, ისინი კვლავ პატიმრობაში რჩებიან. მოკლულის დედა ითხოვს, რომ შეიწყალონ მისი ქმარ-შვილი _ მისი თქმით, ისინი არანაირ კავშირში არ არიან დავით ქადეიშვილის დანაშაულებებთან.
მკითხველი დაგვეთანხმება, რომ გავრცელებული ოფიციალური ვერსია ბევრ კითხვებს ბადებს. ამიტომ ამ თემას ისევ დავუბრუნდებით.
