ოზურგეთის მუნიციპალიტეტის სოფელ გაღმა დვაბზუს მოსახლეობა ხელისუფლებას უყურადღებობაში ადანაშაულებს. აქაურები "გურია ნიუსთან" ამბობენ, რომ ხელისუფლებამ 2-კილომეტრიანი გზის 900-მეტრიანი მონაკვეთზე დააგო ასფალტი, დანარჩენი კი მიატოვა.
"ასეთი ცუდი გზა არც ერთ სოფელში არ იქნება, ან რას ნიშნავს დასაწყისის დაგება და მერე მიტოვება? რახან ცენტრი არაა, ადამიანებად არ გვთვლიან? რა დავაშავეთ ასეთი, რომ არც ერთმა ხელისუფლებამ გზა არ დაგვიგო?! როგორც ჩვენ მოგვაქციეს ყურადღება, ისევე გადავუხდით არჩევნებზე", _ ამბობენ "გურია ნიუსთან" გაღმა დვაბზუს მცხოვრებლები.
ჰამლეტ გობრონიძე: "როგორც ვიცით, არ ეყოთ თანხები. დაფინანსება იყო იმდენი, რომ აქამდე მოეყვანათ, დანარჩენი 2017 წელს გაგრძელდებაო. მოსახლეობა ითხოვს, მაგრამ რა აზრი აქვს?! გვეუბნებიან, დაფინანსება რომ იქნება, მაშინ გავაგრძელებთო."
დოდო კალანდაძე: "წვიმის დროს ეზოებში ნიაღვარი ჩამოგვდის, გზაზე კი ვერ გაივლი. გაატარებენ გრეიდერს, ამოყრიან ქვებს და მერე გვახრჩობენ მტვერში. ამ კუთხის არც ერთი მცხოვრები არჩევნებზე არ მივა და მაგათ ხმას არ მისცემს. სადაა ჩვენი დეპუტატი, რომ გვპირდებოდა, ყველაფერს გაგიკეთებთო? ერთხელ თუ მაინც მოვიდა და გვკითხა რა გვაწუხებდა?"
იამზე ჩხაიძე: "გზაზე მანქანა რომ გავლის, ბავშვებს ქუჩაში ვერ გაუშვებ, ისეთი მტვერია. არც ფეხსაცმელი გვიძლებს და აღარც მანქანა. დაიწყეს დაგება და მიატოვეს. არც ღამის განათებაა, არც ის ვიცით, სოფლის პროექტებით რა გაკეთდა. ყოველ შემთხვევაში, ჩვენთან არაფერი არ გაკეთებულა!"
რატომ შეწყდა გზის დაგება და რა გაკეთდა სოფლის მხარდამჭერი პროგრამით გაღმა დვაბზუში, ამის შესახებ ოზურგეთის მუნიციპალიტეტის გამგებლის წარმომადგენელს სოფელ დვაბზუში ვასილ ღლონტს ვესაუბრეთ:
"გზის დაგება არ შეწყვეტილა. პროექტი მომზადებულია 2 კილომეტრი და ასი მეტრი მონაკვეთის გაკეთებაზე. ეს გზა მეორე სოფელს, ბახვის უერთდება. გარდამავალი პროექტია, რომელიც ორ ეტაპად უნდა გახორციელდეს. წელს დაგეგმილი იყო მხოლოდ 900 მეტრის დაგება და დანარჩენი, კილომეტრი და 200 მეტრი მომავალ წელს დაიგება. გზის რეაბილიტაცია აუცილებლად გაგრძელდება", _ ამბობს ვასილ ღლონტი.
ის მიიჩნევს, რომ მოსახლეობის პრეტენზია უსაფუძვლოა და ეს აჟიოტაჟი ვიღაცას "აწყობს’ წინასაარჩევნოდ:
"არჩევნები მოდის და ხალხი ყველაფერს იტყვის ახლა! ვის უნდა ჰქონოდა მაგის ეჭვი, რომ გზის დაგება შეწყდა?! თემურ ჯახვა აგებს გზას და, სხვათა შორის, ხარისხიანად. ალბათ, ვინმემ შეგნებულად, გამიზნულად, წინასაარჩევნოდ ატეხა აჟიოტაჟი, თორემ მოსახლეობა უკმაყოფილო ნამდვილად არაა", _ ამბობს რწმუნებული.
მისივე თქმით, სოფლის მხარდამჭერი პროგრამით გაღმა დვაბზუში ბევრი რამ გაკეთდა:
_ გაღმა დვაბზუში ჩვენ ძალიან ბევრი რამ გავაკეთეთ სოფლის მხარდამჭერი პროგრამით. საბავშვო ბაღს გამწოვი გავუკეთეთ, ასევე, იატაკი იყო ჩატეხილი და ცემენტის დავაგეთ, ცხელი წყალი გავაკეთეთ და გაზი შევიყვანეთ, სამზარეულოში ნახევარ კედელზე კაფელი ავუკარით, სველ წერტილს გაუკეთდა ფანჯარა. ყოფილ კოლმეურნეობის შენობას და ბიბლიოთეკას გაუკეთდა რემონტი.
_ ბატონო ვასილ, მოსახლეობის მიერ გამოთქმული პრეტენზიები უსაფუძვლოა?
_ გამგებელი ვარ და დამიჯერეთ, ვინ რას ამბობს, არ ვიცი, თუმცა, ამდენი რამ არც ერთი ხელისუფლების დროს არ გაკეთებულა. ვიღაც "ნაციონალს" უნდა, ახლა თქვას, რომ არ გაკეთებულა.
_ გზის დაგება რომ შეწყვეტილია, ეს ტყუილია?
_ ერთ დღეში მოსკოვიც არ აშენებულა, არა? პირველი ეტაპი სრულდება, ასფალტი დაგებულია, მიდის სამუშაოები, არხები იწმინდება.
