"საქართველოსა და რუსეთს შორის არსებული ვითარება მოლაპარაკებების გზით უნდა მოგვარდეს,"_ აღნიშნული განცხადება "გურია ნიუსთან" საუბრისას SNGP TEAM-ის დირექტორის მოადგილემ, ჯეიმს ჰოლბრუკმა გააკეთა.
ჰოლბრუკის განცხადებით, ალიანსი მზადაა რუსეთთან დიალოგისთვის, მაგრამ მისი აგრესიული ქმედებებიდან გამომდინარე შეთანხმების მიღწევა რთულია.
"რუსეთის აგრესიული ქმედებებიდან გამოწვეული დაძაბულობა მოლაპარაკებების გზით უნდა მოგვარდეს. ალიანსი მზადაა რუსეთთან დიალოგისთვის, თუმცა მისი აგრესიული ქმედებებიდან გამომდინარე შეთანხმების მიღწევა რთულია. იგივე შემიძლია ვთქვა საქართველოსა და რუსეთს შორის არსებულ უთანხმოებაზე,"_ ამბობს ჰოლბრუკი.
მან კიდევ ერთხელ აღნიშნა, რომ ალიანსი მხარს უჭერს საქართველოს სუვერენიტეტსა და ტერიტორიულ მთლიანობას.
"ალიანსი მხარს უჭერს საქართველოს სუვერენიტეტსა და ტერიტორიულ მთლიანობას, მაგრამ რუსეთი და საქართველო გეოგრაფიულად მეზობელი ქვეყნები არიან, სწორედ ამიტომ, ამ ორ ქვეყანას შორის, რაც შეიძლება ბევრი მოლაპარაკებაა საჭირო და ურთიერთგაგება მიზნის მისაღწევად,"_ აღნიშნავს ჰოლბრუკი.
ცნობისთვის, რამდენიმე დღის წინ, არასამთავრობო ორგანიზაციამ "ინტეგრაცია-გზა ნატოსა და ევროკავშირისკენ" ქართული მედიის წარმომადგენლებისთვის ნატო-ს შესახებ 2 დღიანი სემინარი გამართა, სადაც ნატო-საქართველოს ურთიერთობების შესახებ ქართველმა და უცხოელმა ექსპერტებმა დაწვრილებით ისაუბრეს.
სემინარს ნატო-ს სამეკავშირეო ოფისისა და სახალხო დიპლომატიის წარმომადგენლები, ქართველი და უცხოელი სპეციალისტები, მათ შორის საქართველოში ნატო-ს სამეკავშირეო ოფისის ხელმძღვანელი უილიამ ლაჰიუ, რუმინეთის ელჩის მოადგილე,ნატო-ს საკონტაქტო საელჩოს წარმომადგენელი რადუ გორინციოი, საქართველოს ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრის პირველი მოადგილე არჩილ ყარაულაშვილი, შეიარაღებული ძალების შტაბის უფროსი, გენერალ-მაიორი ვახტანგ კაპანაძე, საქართველოში ნატოს სამეკავშირეო ოფისის დირექტორის მოადგილე ქრისტინა ბელეშიტე და სხვები უძღვებოდნენ.
ამავე თემაზე:
რას აცხადებს ნატო-ს სამეკავშირეო ოფისის ხელმძღვანელი ნატო-რუსეთის ურთიერთობაზე
