საქართველოს საგარეო პოლიტიკის ერთ-ერთ პრიორიტეტს ნატო-ს წევრობა წარმოადგენს.
რამდენად აქვს საქართველოს შესაძლებლობა ნატო-ს სხვა ასპირანტი ქვეყნებისგან განსხვავებით, პირველი გაწევრიანდეს ჩრდილო ატლანტიკურ ალიანსში. ამ საკითხთან დაკავშირებით "გურია ნიუსს" ნატო-ში საქართველოს მისიის ყოფილი ხელმძღვანელი, საქართველოს უსაფრთხოებისა და განვითარების ცენტრის დირექტორი, ლევან დოლიძე ესაუბრა.
"საქართველოს ნატო-ს სხვა ასპირანტ ქვეყნებს შორის აქვს პოტენციალი პირველი შევიდეს ნატო-ში, თუმცა ჩვენ ძალიან სწორედ უნდა ვიმოქმედოთ და ვმართოთ ჩვენი მოლოდინები,"_აღნიშნავს დოლიძე.
მისი თქმით, უსაფუძვლოდ არ უნდა მოხდეს მოლოდინების ამაღლება.
"უსაფუძვლოდ არ უნდა მოვახდინოთ მოლოდინების ამაღლება და უსაფუძვლო განწყობის შექმნა, რადგან ასეთ განწყობებს ხშირად იმედის გაცრუება მოჰყვება,"_ ამბობს დოლიძე.
როგორც დოლიძემ "გურია ნიუსთან" საუბრისას აღნიშნა, საქართველოსთვის ალიანსში გასაწევრიანებლად ძირითადი ნაბიჯების გადადგმა გეოპოლიტიკურ ფაქტორებზეა დამოკიდებული.
"ძალიან ფრთხილად უნდა ვიყოთ, როდესაც, ალიანსში გაწევრიანებასთან დაკავშირებით ვსაუბრობთ, რაც დამოკიდებულია გეოპოლიტიკურ ფაქტორებზე, რომელმაც უნდა გახსნას შესაძლებლობების ის ფანჯარა, რაც საქართველოს მისცემს გადამწყვეტი ნაბიჯების გაკეთების საშუალებას,"_აღნიშნავს დოლიძე.
როგორც ცნობილია, რამდენიმე დღის წინ, ვარშავაში ნატო-ს სამიტი ჩატარდა, სადაც ალიანსის დღის წესრიგში საქართველოს საკითხი აქტუალურად იდგა.
"სამიტის ფარგლებში ნატო-საქართველოს კომისიის სხდომა საგარეო საქმეთა მინისტრების დონეზე პირველად შედგა, რის შემდეგაც, ერთობლივი განცხადება გამოიცა, რაც საქართველოს ნატო-ში გასაწევრიანებლად დადებით გზავნილს წარმოადგენს,"_ამბობს დოლიძე.
