სულეიმან დემირელის სახელობის კოლეჯი და მისი პარტნიორი სკოლები კიდევ ერთ განცხადებას ავრცელებენ, სადაც აღნიშნულია, რომ მათთვის პოლიტიკოსების მიერ გაკეთებული შეფასებები შეურაცხმყოფელია.
"საქართველოში მოქმედი სკოლები: რუსთავის "შოთა რუსთაველის სახელობის სკოლა–ლიცეუმი", მარნეულის "დავით აღმაშენებლის სახელობის სკოლა", ქუთაისის "ნიკო ნიკოლაძის სახელობის სკოლა–ლიცეუმი", თბილისის "ნიკოლოზ წერეთლის სახელობის საერთაშორისო სკოლა",თბილისი სკოლა–ლიცეუმი ,,სხივი" და ბათუმის რ. შაჰინის სახელობის სკოლა–ლიცეუმი "მეგობრობა" ვეხმაურებით გასულ დღეებში მედია საშუალებებით პოლიტიკოსების მიერ გაკეთებულ ბრალდებებს და ვგმობთ მათ მიერ იმიჯისა და რეპუტაციის შემლახველ განცხადებებს.
ზემოთ ჩამოთვლილი სასწავლო დაწესებულებები ცალსახად ვემიჯნებით ნებისმიერ პოლიტიკურ, კანონსაწინააღმდეგო და არასახელმწიფოებრივ საქმიანობას. ასევე ვგმობთ ნებისმიერ მცდელობას გარე და შიდა პოლიტიკურმა ძალებმა გამოიყენონ ჩვენი სკოლები, როგორც პოლიტიკური იარაღი. ჩვენთვის მიუღებელია ჩვენი მოსწავლეებისა და პედაგოგობის სახელის ხსენება ისეთ კონტექსტში როგორიცაა "ტერორიზმი" და "ექსტრემიზმი".
ჩვენს სკოლებში საგანმანათლებლო პროცესი ღია და გამჭვირვალეა. სწავლება მიმდინარეობს საქართველოს განათლების სამინისტროს მიერ დამტკიცებული სასწავლო პროგრამის მიხედვით და სკოლების ფუნქციონირება რეგულირდება საქართველოს კანონმდებლობით. სკოლების მთავარი მიზანი განათლებული, სახელმწიფოებრივად მოაზროვნე, ჯანსაღი და თავისუფალი მოქალაქეების აღზრდაა. შორს ვართ ნებისმიერი არასახელმწიფოებრივი ქმედებისგან და ერთგული შრომით ვემსახურებით ღირსეული მოქალაქეების აღზრდას. ორი ათეული წლის განმავლობაში ჩვენს საგანმანათლებლო სივრცეში გაიზარდნენ საამაყო ქართველები, რომლებიც წარმატებით მოღვაწეობენ, როგორც საქართველოში, ისე მსოფლიოს სხვადასხვა ქვეყანაში: ზაზა ფაჩულია, ზვიად მეტრეველი, ნათია გვენეტაძე, გიორგი კოჭლამაზაშვილი (იაპონია), ირაკლი მარღანია (აშშ), დემეტრე გვარამია (აშშ), გ. კაპანაძე (გერმანია) და სხვა მრავალი. ამ წლების განმავლობაში ჩვენმა კურსდამთავრებულებმა დიდი როლი შეასრულეს ქვეყნის აღმშენებლობაში და დემოკრატიული ფასეულობების დაცვაში. თითოეული მოსწავლე ჩვენი სიამაყეა! ჩვენ ვამაყობთ ჩვენი წვლილით ქვეყნის აღმშენებლობაში!
კიდევ ერთხელ ვემიჯნებით ნებისმიერი ტიპის პოლიტიკურ აქტივობას და გაჟღერებული ბრალდებების ფონზე ვიყენებთ ჩვენს იურიდიულ უფლებას შესაბამისი რეაგირება მოვახდინოთ გაჟღერებულ ცილისწამებაზე", _ აღნიშნულია სასწავლებლების ერთობლივ განცხადებაში.
შეგახსენებთ, რომ რამდენიმე დღის წინ ბათუმის 25-ე არხმა გაავრცელა თურქეთის გენერალური კონსულის, იასინ თემისქანის ინტერვიუ, სადაც ის აღნიშნავდა, რომ რომ ბათუმში შაჰინის სახელობის მეგობრობის ლიცეუმში ტერორისტებს ზრდიან.
კონსულის განმარტებით, სასწავლო დაწესებულებას ტერორისტული დაჯგუფებები მართავენ, რის შესაბამისადაც, იქ ბავშვები მათივე იდეოლოგიის ქვეშ იზრდებიან.
ამავე თემაზე:
არსებობს თუ არა ტერორისტული იდეოლოგიის გავრცელების საფრთხე ბათუმის თურქულ სკოლებში
