ოზურგეთის მუნიციპალიტეტის სოფელ ქაქუთში (ჭანიეთს თემი) დათვი გამოჩნდა, რომელმაც დააზიანა დათო კვირკველიას და სოსო ჩახვაძის თხილის პლანტაციები.
"დათვი ყოველ წელს ჩამოდის ხოლმე მთიდან. ახლა სახლთან ახლოს, უკან ეზოში ერთიანად გაგვინადგურა თხილის პლანტაცია. დამტვრეულია ტოტები, ნაყოფი კი შეჭმული ან დაგლეჯილია და მიწაზე ყრია. წელს ისედაც ძალიან ცოტა ასხია თხილს, ახლა დათვიც გამოჩნდა და დაგვაზარალა. რა უნდა ვქნათ, კაცები ჩაუსაფრდნენ, თუმცა ასეთ დროს არ მოდის. ისიც საკითხავია, რომ მოვკლათ, არ დაგვაჯარიმებენ? ერთი-ორჯერ კიდე თუ ჩამოვიდა, სათხილეში აღარაფერი დარჩება, თვით ხეებიც, ნაყოფს ვინ ჩივა, ისე გლეჯს ყველაფერს,"_ ამბობს დაზარალებული ირინა კვირკველია.
"გურია ნიუსი" დაუკავშირდა გურიის გარემოს დაცვითი სწრაფი რეაგირების განყოფილების უფროსს ემზარ ვაშალომიძეს და აღნიშნული პრობლემის შესახებ ესაუბრა.
" დაზარალებული მოსახლეობის წარმომადგენლებმა , სოფლის გამგებელთან ერთად, უნდა მიმართონ მუნიციპალიტეტის გამგეობას, სადაც მოამზადებენ წერილობით მიმართვას გარემოს დაცვის სამინისტროსადმი. ამის შემდეგ გამოიყოფა სამონადირეო ჯგუფი, რომელიც დაეხმარება სოფელს ნადირის მოგერიებაში," _ გვიხრა ვაშალომიძემ.
