დილით, “გურია ნიუსი” ოზურგეთის მუნიციპალიტეტის გამგებლის მოვალეობის შემსრულებელს ილია ვაშაყმაძეს დაუკავშირდა, რომელმაც განაცხადა, რომ ამ კითხვაზე პასუხი საკრებულოს თავმჯდომარეს ალეკო მამეშვილს უნდა გაეცა.
მთელი დღის განმავლობაში ვცდილობდით ოზურგეტის მუნიციპალიტეტის საკრებულოს თავმჯდომარესთან დაკავშირებას, რომელმაც ჩვენს სატელეფონო ზარებს არ უპასუხა.
ჩვენ ასევე დავუკავშირდით ოზურგეთის მუნიციპალიტეტის საკრებულოს საზოგადოებასთან ურთიერთობის სამსახურის უფროსს ნანა თავდუმაძეს, რომელმაც გვითხრა, რომ კითხვები ოფიციალურად გადაგვეგზავნა. მას შემდეგ, რაც განვუმარტეთ, რომ მხოლოდ ერთი კითხვა გვქონდა, გვიპასუხა:
_ საკრებულოს თავმჯდომარე ახლა ადგილზე არ იმყოფება, როცა მოვა, გადავცემ.
ამის შემდეგ ჩვენ დავუკავშირდით ოზურგეთის მუნიციპალიტეტის საკრებულოს თავმჯდომარის მოადგილეს, ავთანდილ მექვაბიშვილს, რომელმაც “გურია ნიუსთან” საუბარში ამ საკითხთან დაკავშირებით ასეთი კომენტარი გააკეთა:
“მე არ შემხებია ეს განცხადება, მიმართეს ბატონ ალეკო მამეშვილს. “ქართულ ოცნებას”, როგორც კანონი ითხოვს, ალბათ, გამოუყოფენ ადგილს აქციის ჩასატარებლად. მე მგონი, გამოუყოფენ, არ ვიცი… საქმის კურსში არ ვარ, სიმართლე რომ გითხრათ.
_ ანუ თქვენ არაფერი იცით ამის შესახებ?
_ ეს ეცოდინება იმას, ვინც უნდა მიიღოს ეს გადაწყვეტილება.
მოგვიანებით, კვლავ დავუკავშირდით ნანა თავდუმაძეს, რომელმაც ჩვენს სატელეფონო ზარებს აღარ უპასუხა. საკრებულოს მედიასთან ურთიერთობის მთავარმა სპეციალისტმა გვითხრა, რომ მთელი დღის განმავლობაში შეხვედრაზე იმყოფებოდა და ალეკო მამეშვილთან დაკავშირებას ვერ მოახერხებდა.
ამ პასუხის შემდეგ, “გურია ნიუსი” ოზურგეთის მუნიციპალიტეტის საკრებულოს აპარატის უფროსს, პაატა ბურჭულაძეს დაუკავშირდა: “ქართული ოცნების” წერილი ფართის გამოყოფის შესახებ დღეს დილით შემოვიდა ჩვენთან და სიტყვიერი შეთანხმება მხოლოდ იმასთან დაკავშირებით მოხდა, რომ შესაძლოა, ფართი თეატრალურ მოედანზე გამოეყოთ. თუმცა, ჩვენ მათთვის ოფიციალური პასუხი ჯერ კიდევ არ გაგვიცია. კონკრეტულად არაფერია გადაწყვეტილი და პასუხი დაახლოებით ერთ საათში იქნება,” _ თქვა პაატა ბურჭულაძემ “გურია ნიუსთან” საუბრისას.
ერთი საათის შემდეგ კვლავ დავუკავშირდით პაატა ბურჭულაძეს, რომელმაც ჩვენს სატელეფონო ზარებს აღარ უპასუხა.
ინფორმაციის გადასამოწმებლად “ქართული ოცნების” ოზურგეთის შტაბის ხელმძღვანელს კოტე შარაშენიძეს ვესაუბრეთ, რომელმაც განაცხადა, რომ ამ დროისათვის ჯერ ისევ არ მისვლია ოფიციალური პასუხი ადგილის გამოყოფასთან დაკავშირებით.
ნახევარი საათის წინ, ოზურგეთის მუნიციპალიტეტის საკრებულოს საზოგადოებასთან ურთიერთობის სამსახურის უფროსმა ნანა თავდუმაძემ “გურია ნიუსთან” განაცხადა: “როგორც ჩემთვის არის ცნობილი, კონკრეტული პასუხი ამასთან დაკავშირებით ჯერ კიდევ არ არის, მიმდინარეობს ორგანიზაციული საკითხების გადაწყვეტა”.
