“არ მინდა, რომ ამას ვინმემ პოლიტიკური სარჩული გამოაბას”

გასულ კვირას, ჩოხატაურში, "ივლიტას ბიბლიოთეკაში" "გამარჯვებულ ქალთა" კლუბის პრეზენტაცია გაიმართა. კლუბი, რომელშიც ძუძუს კიბოთი დაავადებული და დაავადებაზე გამარჯვებული ქალბატონები არიან გაერთიანებულები, ჩოხატაურის მუნიციპალიტეტის საკრებულოს საფინანსო-საბიუჯეტო კომისიის თავმჯდომარის, მაია პაიჭაძის ინიციატივითა და საკრებულოს ხელშეწყობით დაფუძნდა.

ამ პრეზენტაციის შესახებ მომზადებული სიუჟეტის ნახვა მაყურებელს, გასულ კვირას, "გურია ნიუსისა" და არასამთავრობო ორგანიზაცია "Post ალიონის" ერთობლივი პროექტის ფარგლებში მომზადებულ გადაცემაში _ "მონოლოგიდან დიალოგამდე" შეეძლო (იხილეთ მე-5 გვერდი).

გადაცემის ბოლო ნაწილში ქალაქ ოზურგეთის მუნიციპალიტეტის საკრებულოს თავმჯდომარემ გელა კობალაძემ და ოზურგეთის მუნიციპალიტეტის საკრებულოს წევრმა ლელა ნაცვალაძემ გენდერული საბჭოს საქმიანობაზე, გახორციელებულ პროექტებზე, მოგვარებულ და მოსაგვარებელ პრობლემებზე ისაუბრეს.

გადაცემის სტუმრებმა საუბარი გენდერული საკონსულტაციო საბჭოს სამწლიანი მუშაობის ანგარიშით დაიწყეს.

ლელა ნაცვალაძემ, რომელიც გენდერის საკონსულტაციო საბჭოს თავმჯდომარეა, აღნიშნა, რომ ყველაზე მთავარი მიღწევა კანონში შეტანილი ცვლილებაა:

_ ჩვენი პროექტი ითვალისწინებდა, რომ, პირველ რიგში, სახელმწიფოს დაენახა, კანონთან მიმართებაში რა დიდი როლი აქვს ქალს საზოგადოებრივ ცხოვრებაში, გადაწყვეტილების მიღების პროცესში. ყველაზე მთავარი, რაც ამ პროექტით მივაღწიეთ, არის ის, რომ კანონში გენდერული თანასწორობის შესახებ შევიდა ცვლილება და სახელმწიფომ ჩათვალა საჭიროდ, გენდერული საკონსულტაციო საბჭოები არსებობდეს საკრებულოებში. ეს გადაწყვეტილება უკვე ძალაში შევიდა და შეიქმნება საბჭოები, რომლებიც საკრებულოს წევრებით დაკომპლექტდება. საბჭოში შევლენ, როგორც ქალები, ასევე მამაკაცები _ თანამდებობის პირები, კომისიის თავმჯდომარეები. ამავდროულად, თუ საკრებულო გადაწყვეტს, შესაძლებელია, საბჭოში იყვნენ მასმედიის და არასამთავრობო ორგანიზაციების წარმომადგენლები და ეს წინ გადადგმული ნაბიჯია, _ აღნიშნა ნაცვალაძემ გადაცემაში სტუმრობისას.

მისივე თქმით, აუცილებელია ამ მიმართულებით მუშაობა გაგრძელდეს და საზოგადოების ცნობიერება ამაღლდეს.

საბჭოს წევრმა, ქალაქ ოზურგეთის საკრებულოს თავმჯდომარემ გელა კობალაძემ თქვა, რომ საბჭოს წევრობის 6 თვის განმავლობაში გენდერის მიმართულებით ბევრი რამ გაიგო და ისწავლა:

_ მე თავიდანვე არ მქონდა ისეთი მიდგომა, რომ ქალი მხოლოდ "კუხნაში" უნდა იყოს. შეიძლება ჩემი კოლეგების უმრავლესობა საწინააღმდეგოს ფიქრობს, მაგრამ მას შემდეგ, რაც ასე ფართოდ გაიშალა გენდერის თემა, შეიძლება ვთქვათ, რომ ადამიანებს თვალები აეხილათ, რომ ქალი მარტო "კუხნაში" არ უნდა იყოს.

მე ძალიან ბევრი რამ ვისწავლე _ გენდერი არ არის მარტო ქალის და მამაკაცის ურთიერთობა. ფართოდ არის ეს ცნება გაშლილი და ხვალ და ზეგ ალბათ კიდევ უფრო გაიშლება, _ აღნიშნა კობალაძემ და დასძინა, რომ ქალაქ ოზურგეთის საკრებულოში გენდერული ბალანსი დაცულია.

ლელა ნაცვალაძე, რომელიც ლევან მამალაძის პარტიას ხელმძღვანელობს გურიაში, ამბობს, რომ გენდერის საკითხებზე მუშაობისას პოლიტიკურ კუთვნილებას მნიშვნელობა არ აქვს და ეს საბჭოს სამწლიანმა მუშაობამაც დაადასტურა. მისივე თქმით, საბჭოში სხვადასხვა პოლიტიკური პარტიების წარმომადგენლები არიან გაერთიანებულები და საზოგადოებისთვის მნიშვნელოვან საკითხებზე წინააღმდეგობების გარეშე თანხმდებიან.

_ არ შემიძლია, არ გამოვყო ქალაქ ოზურგეთისა და ოზურგეთის მუნიციპალიტეტების მიერ თანადაფინანსებით გახორციელებული პროექტი _ "კიბო განაჩენი არ არის", რომელიც ჩვენს სავიზიტო ბარათად იქცა. ჩვენ შევძელით, კიბოთი დაავადებული ადამიანებისთვის ფსიქოლოგიური დახმარება გაგვეწია და ბევრი ქალი გამოვიყვანეთ სახლიდან. ეს არის ორწლიანი პროექტი და სექტემბერში, ამ პროექტის ფარგლებში ქალაქისა და თემების მცხოვრებლები შეძლებენ სკრინინგის პროგრამის გავლას სრულიად უფასოდ. ეს არ არის წინასაარჩევნო კამპანიის ნაწილი და მინდა, რომ თქვენი საშუალებით ეს ყველამ გაიგოს. ეს ღონისძიება წლის დასაწყისში გაიწერა ბიუჯეტში და არ მინდა, რომ ამას ვინმემ პოლიტიკური სარჩული გამოაბას, _ აღნიშნა ლელა ნაცვალაძემ.

გადაცემის სტუმრებმა ვრცლად ისაუბრეს ქალების პოლიტიკაში ჩართვის აუცილებლობაზე, მათ აქტიურობაზე. საკრებულოს თავმჯდომარემ კოლეგა ქალბატონების მუშაობაც მიმოიხილა და აღნიშნა, რომ ქალაქ ოზურგეთის საკრებულო ძალიან დემოკრატიულია, სადაც ყველა საღი და დასაბუთებული არგუმენტი თუ მოსაზრება ყოველთვის გათვალისწინებულია.

ლელა ნაცვალაძის თქმით, პროექტის მიმდინარეობის დროს ბევრი აქტიური ქალბატონი აღმოაჩინეს და მათი ნიჭის რეალიზებაც მოახდინეს.

გადაცემის სრულია ვერსია შეგიძლიათ იხილოთ ნახოთ აქ.