ქალაქ ოზურგეთში, ერთ-ერთ პარკში (ყოფილი პოლიციის შენობის მიმდებარე ტერიტორიაზე), რამდენიმე დღეა, გზის სარემონტო სამუშაოები მიმდინარეობს. მუშებმა პარკი ორ ნაწილად სწრაფ ტემპში ისე გაყვეს, რომ ამ პროექტის შესახებ ოზურგეთელებისთვის გვიან გახდა ცნობილი.
პარკის ორად გაყოფას და ახალი გზის გაყვანას მითქმა-მოთქმა მოჰყვა სოციალურ ქსელში.
"მე და კონსტანტინე წავედით პარკში სასეირნოდ, პარკის ნაცვლად კი დაგვხვდა ტრაქტორი, რომელსაც ჩვენი პარკი გაუჭრია, ხეები და მინდორი გადაუთხრია, ქუჩად გადაუქცევია და ასფალტის დასაგებად გაუმზადებია. გვეწყინა და წამოვედით სახლში", _ წერს ქალაქ ოზურგეთში მცხოვრები გრიგოლ მახარაძე.
იურისტს კახა ჩავლეშვილს მიაჩნია, რომ აქ საგზაო მოძრაობა არაა მთავარი; მთავარია, გადაწყვეტილების მიღების ფორმა:
"აქ ჩანს საზოგადოებრივი აზრისადმი ხელისუფლების გულგრილობა".
კიდევ ერთი იურისტი ტოგო ჭელიძე სოციალურ ქსელში წერს: "საქმე ისაა, არავინ იცის, იქ რა კეთდება, ზოგიერთი "საქმეში ჩახედული" პირის გარდა. არ შეიძლება, რომ ქალაქის მოსახლეობისთვის სიურპრიზი იყოს ქალაქის შუა ცენტრში გადათხრილი პარკი. სანამ საკითხი გადაწყდებოდა, იგი მანამ უნდა გამხდარიყო საზოგადოებრივი განხილვის ობიექტი და მხოლოდ ამის შემდეგ მიღებულიყო გადაწყვეტილება. თორემ ვინ იცის, იქნებ პროექტი მართლაც გენიალურია".
ოზურგეთელი გურამ მიქელაძე ამბობს, რომ "მოძრაობის განტვირთვა უნდა დაიწყოს მოძრაობის მოწესრიგებით, თუკი ეს შესაძლებელია, შუქნიშნით და სათვალთვალო კამერებით (მოძრაობის არმცოდნე და დაუდევარი მძღოლების გასაკონტროლებლად). შემდეგ იწყება ინფრასტრუქტურული ინტერვენციები. გაუგებარია, რატომ გახდა საჭირო მსგავსი ტიპის ჩარევა. ეს ჩემთვის სიურპრიზი არ უნდა ყოფილიყო. გუშინ ჩავიარე და გული დამწყდა".
ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე "გურია ნიუსთან" სატელეფონო საუბარში ამბობს, რომ ეს საკითხი სხდომაზე 2015 წელს გამოიტანეს და მისი შესრულების წინააღმდეგი არავინ ყოფილა:
"საკითხი საკრებულოს სხდომაზე იყო გამოტანილი და მოწონებული. შემდეგ გამოცხადდა ტენდერი. გამარჯვებული კომპანია შეუდგა თავისი მოვალეობების შესრულებას და დაწყებულია სამუშაო", _ ამბობს გელა კობალაძე.
კობალაძისთვის გაუგებარია, რატომ გამოიწვია საზოგადოებაში ამ საკითხმა უარყოფითი განწყობა:
"ეს პროექტი ხორციელდება იმისთვის, რომ უფრო თავისუფლად იმოძრაონ ავტომობილებმა და არ შეიქმნას პრობლემები ქალაქში გადაადგილების კუთხით. პარკი დარჩება თავის ადგილზე და ნებისმიერ ადამიანს შეეძლება იქ დასვენება", _ თქვა გელა კობალაძემ.
ქალაქ ოზურგეთის მუნიციპალიტეტის საკრებულოს დეპუტატი ნათია შარაშენიძე ამბობს, რომ ამ პროექტის გახორციელება ქალაქ ოზურგეთის მერის, ბეგლარ სიორიძის მოფიქრებულია: "მოხდა ისე, რომ გაიჭრა ქალაქში არსებული პარკი და ეს უმნიშვნელოვანესი ინფრასტრუქტურული სამუშაო არ არის შეთანხმებული ქალაქის მოსახლეობასთან (ამ კონკრეტული შემთხვევიდანაც ძალიან კარგად ჩანს ხელისუფლების დამოკიდებულება საზოგადოების მიმართ).
აღარაფერს ვამბობ იმაზე, რომ ეს საკითხი ქალაქის საკრებულოზე განსახილველად არ გამოტანილა. ერთი კაცის ბიზნესინტერესებს ეწირება მოსახლეობის ინტერესები, უფლებები, პარკი და ნარგავი. აქედან გამომდინარე, გასარკვევია, ხელისუფლებამ რის საფუძველზე დაიწყო სამუშაოები. პირადად მე, დაუშვებლად მიმაჩნია საზოგადოების უგულებელყოფა და საკრებულოს გვერდის ავლით პარკის შუაზე გადაჭრა. ვფიქრობ, რომ სამუშაოები უნდა შეჩერდეს, გამოიკითხოს მოსახლეობა, განიხილოს საზოგადოებამ, საკრებულომ და მხოლოდ ამის შემდეგ განახლდეს, ან შეწყდეს სამუშაოები", _ გვითხრა ნათია შარაშენიძემ.
ქალაქ ოზურგეთის მუნიციპალიტეტის მერი ბეგლარ სიორიძე ნათია შარაშენიძის ბრალდებებს პასუხობს:
"არსებობს საკრებულოს ოქმი და ნამდვილად იყო ეს საკითხი გატანილი საკრებულოს სხდომაზე. საკრებულოს სხდომაზე მყოფ დეპუტატებს აქვთ მხარი დაჭერილი ამ პროექტისთვის", _ გვითხრა ბეგლარ სიორიძემ.
ბეგლარ სიორიძე ამბობს, რომ ქალაქ ოზურგეთის მერიის წარმომადგენელმა შესაბამისი ახსნა-განმარტება გააკეთა სხდომაზე, თუ რა გაკეთდებოდა ყოფილი პოლიციის შენობის მიმდებარე ტერიტორიაზე: "ყველაფერი კეთდება ზუსტად კანონის დაცვით. ქალაქი უნდა დაემსგავსოს ქალაქს. ყველაფერი ისე გაკეთდება, როგორც საჭიროა", _ თქვა ბეგლარ სიორიძემ "გურია ნიუსთან" საუბრის დროს.
ნათია შარაშენიძეს ეთანხმება მისი კოლეგა ლევან მგელაძე:
"ეს საკითხი საკრებულოს სხდომაზე არ გამოტანილა და აქედან გამომდინარე, არც განიხილებოდა. ფრაქცია "ოზურგეთის მომავლისათვის" უკვე ამზადებს წერილს და აუცილებლად უნდა გაეცეს კითხვას პასუხი, რის საფუძველზე დაიწყო გზის მშენებლობა. ჩემთვის მიუღებელია პარკის ორ ნაწილად გაყოფა _ ეს არის სპონტანურად გაკეთებული საქმე", _ გვითხრა ლევან მგელაძემ.
საკრებულოს დეპუტატი "ქართული ოცნებიდან" მედეა მახარობლიძე ამბობს, რომ ქალაქის ცენტრში აღდგენითი სამუშაოები მიმდინარეობს:
"ყოფილი პოლიციის შენობის მიმდებარე ტერიტორიაზე, როგორც ვიცი, აღდგენითი და სარემონტო სამუშაოები ტარდება. სხვას ვერაფერს გეტყვით. გზის გაყოფასთან დაკავშირებით საკრებულოზე საკითხი არ გამოტანილა. ყოველ შემთხვევაში, მე არ მახსოვს", _ გვითხრა მედეა მახარობლიძემ.
საკრებულოს დეპუტატი ლავრენტი ბიგვავა ჩვენთან საუბრისას: "იყო ეს საკითხი გამოტანილი. დეტალებში ვერ გეტყვით. ასევე, მახსოვს, რომ იყო სხვადასხვა მოსაზრება".
საკრებულოს კიდევ ერთი დეპუტატი, ირინა საჯაია "გურია ნიუსთან" სატელეფონო საუბარში ამბობს, რომ 2015 წლის ოქტომბერში იყო პროექტზე საუბარი, რომელიც უნდა გახორციელდეს 2016-2017 წლებში:
"ქალაქ ოზურგეთის მუნიციპალიტეტის მერიის მიერ წარმოდგენილი იყო ქალაქ ოზურგეთის მუნიციპალიტეტის ტერიტორიაზე 2016-2017 წლებში რეგიონული განვითარების პროექტების ფონდიდან გასახორციელებელი და დასაფინანსებელი ინფრასტრუქტურული პროექტების ნუსხა. მათ შორის იყო საუბარი წულაძის ქუჩიდან (სადაც პარკი მდებარეობს) გაბრიელ ეპისკოპოსის ქუჩამდე გზის სარემონტო სამუშაოებზეც".
ჩვენს კითხვაზე, იყო თუ არა საკრებულოს სხდომაზე საუბარი პარკის ორად გაყოფასა და იქ ახალი გზის მშენებლობაზე, საჯაიას კონკრეტული პასუხი არ აქვს:
"კონკრეტულად არ მახსოვს, განიხილებოდა თუ არა ახალი გზის გაყვანა", _ გვითხრა ირინა საჯაიამ.
