მთავრობის სხდომაზე, რომელიც 28 ივლისს ჩატარდა, ღორის იდენტიფიკაცია-რეგისტრაციისა და მისი სადგომის რეგისტრაციის წესის შესახებ მთავრობის დადგენილების პროექტი დაამტკიცეს.
პროექტის შესახებ სხდომაზე სოფლის მეურნეობის მაშინდელმა მინისტრმა, ოთარ დანელიამ ისაუბრა. დანელიას თქმით, სურსათის ეროვნულმა სააგენტომ, 2024 წლის პირველ იანვრამდე, უნდა განახორციელოს ღორის იდენტიფიკაცია-რეგისტრაცია და მისი სადგომის რეგისტრაცია საქართველოს სახელმწიფო ბიუჯეტიდან გამოყოფილი ასიგნებების ფარგლებში.
ეს წესი ადგენს ღორის იდენტიფიკაცია-რეგისტრაციის და მისი სადგომის რეგისტრაციის, სადგომის წიგნაკის, მონაცემთა ელექტრონული ბაზის წარმოების წესს, სახელმწიფო კონტროლის გახორციელების პირობებს და შემზღუდავ ღონისძიებებს.
როგორც ცნობილი ხდება, წესი არ ვრცელდება იმ ფიზიკურ პირზე, რომელსაც ჰყავს ერთი ღორი საკუთარი გამოყენებისა და მოხმარებისთვის, ვიდრე არ დაექვემდებარება გადაადგილებას.
ღორის იდენტიფიკაციის მიზანია: ღორის და მისი სადგომის შესახებ ერთიანი საინფორმაციო ბაზის შექმნა და აღრიცხვიანობის რეგულირება; ასევე, ღორის და მისი სადგომის შესახებ სრული ინფორმაციის ფლობა და მიკვლევადობა; ღორის ჯანმრთელობის დაცვა, ეპიდემიოლოგიური მდგომარეობის მართვა და ვეტერინარული კეთილსაიმედოობის უზრუნველყოფა; საზოგადოებრივი ჯანმრთელობის დაცვა და მომხმარებლისათვის სარწმუნო ინფორმაციის მიწოდება ღორისგან მიღებული პროდუქტების წარმოშობისა და უვნებლობის შესახებ; ქვეყნის შიგნით ღორის გადაადგილებასა და ექსპორტ-იმპორტზე ვეტერინარული კონტროლის გახორციელება.
"ჯერ არაფერი გამიგია ამ პროექტის შესახებ და როდესაც გავიგებ, მაშინ შემეძლება პასუხის გაცემას. ისე, როდესაც ძროხების დანომრვა მიდიოდა, ერთი ამბავი ატყდა. იმედია, მსგავსი რამ არ მოხდება", _ გვითხრეს სოფელ ბოხვაურში.
სოფელ წითელმთაში კი ერთ-ერთმა ფერმერმა გვითხრა, რომ როდესაც მსგავსი რამ ხდება, საკითხი მოსახლეობასთან დეტალურად უნდა განიხილებოდეს: "მართალია, მთავრობის სხდომაზე განიხილეს ეს საკითხი, მაგრამ კარგი იქნება, მთავრობის წარმომადგენლები ჩვენთან თუ მოვლენ და მოხდება ამ საკითხის განხილვა".
ოზურგეთის მუნიციპალიტეტის გამგეობის ეკონომიკისა და სოფლის მეურნეობის განვითარების სამსახურის უფროსი გიგა ხარაბაძე: "ეს არის მთელ მსოფლიოში აპრობირებული საკითხი და დადებითად ვაფასებ ამ რეგულაციის ამოქმედებას. სწორედ იმიტომ განადგურდნენ ღორები, რომ არ იყო სანიტარული ნორმები დაცული".
გიგა ხარაბაძე მიიჩნევს, რომ "კარგი იქნება, თუ მოსახლეობა ღორს ეზოს გადაღმა არ გადაუშვებს და სანიტარულ ნორმებს დაიცავს".
მისივე თქმით, "ვიდრე ეს დადგენილება გამოვიდოდა, ოზურგეთის მუნიციპალიტეტის გამგეობამ მოსახლეობაში დაარიგა ბროშურები, რომელშიც წერია, თუ როგორ უნდა ღორების მოვლა-პატრონობა."
