"უსუფაშვილი-რესპუბლიკელების” ზესტაფონის მაჟორიტარობის კანდიდატს, თინა ხიდაშელს მაგალითისთვის შვეიცარიის გამოცდილება მოჰყავს და რამდენიმე სამინისტროს გაუქმების წინადადებით გამოდის.
როგორც ხიდაშელი ამბობს გაზრდილი ბიუროკრატია, თავისთავად, ნიშნავს ძალიან დიდ ადმინისტრაციულ ხარჯებს.
”არ მგონია, რომ ჩვენი ხელისუფლება უკეთესად მართავს ქვეყანას, ვიდრე 7 სამინისტრო შვეიცარიას. გაზრდილი ბიუროკრატია თავისთავად ნიშნავს ძალიან დიდ ადმინისტრაციულ ხარჯებს, რომელიც იპარავს ფულს იქედან, რაც რეალურად ქვეყანას ყველაზე უფრო მეტად სჭირდება, ამიტომ მცირე მთავრობა, რომლისთვისაც ჩვენ ვიბრძოდით ბოლო 20 წლის, მათ შორის, ბოლო 4 წლის განმავლობაში, არის ერთ-ერთი ჩვენი მთავარი პრიორიტეტი".
თინა ხიდაშელი მიიჩნევს, რომ ქვეყანაში ცალკე არ უნდა არსებობდეს ევროატლანტიკური ინტეგრაციის სამინისტრო და ის საგარეო საქმეთა სამინისტროს ნაწილი უნდა იყოს.
„ასევე ენერგეტიკისა და გარემოს დაცვის სამინისტროები ცალკე უწყებები არ უნდა იყოს, როდესაც ორი სამინისტრო ბუნებრივად შექმნილია იმისთვის, რომ ერთმანეთთან მუდმივ კონფლიქტსა და ჩხუბში იყვნენ. სახელმწიფოს ამოცანა ეს არ არის. ენერგეტიკა ეკონომიკის განვითარების ერთ-ერთი მნიშვნელოვანი სფეროა და თუ ქვეყანაში ეკონომიკის სამინისტრო გაქვს, მაშინ ეკონომიკის განვითარებაზე პასუხისმგებელი ეკონომიკის სამინისტრო უნდა იყოს. ეს სია გრძელია. მარტო სამინისტროებში არ არის პრობლემა. ჩვენ ხომ თითქმის ყველა სამინისტრო დუბლირებული გვაქვს მერე პრემიერის კანცელარიაში. გვაქვს სამინისტროები და ასევე, გვაქვს საბჭოები, რომელსაც ზუსტად იგივე ფუნქციები აქვს, რაც სამინისტროებს. ასევე, სამინისტროებში გავქვს დეპარტამენტები, თუ უწყებები, რომელსაც ჰქვია, მაგალითად, შიდა აუდიტის სამსახური, გენერალური ინსპექცია (სხვადასხვა უწყებაში სხვადასხვა სახელი გვაქვს), ფინანსური ადმინისტრირების თუ მონიტორინგის სამსახური და ა.შ. გვაქვს სუს-ი, რომელსაც ამ ფუნქციებისთვის ყველა სამინისტროში დანიშნული ჰყავს თავისი „ოდეერები“. მე სულ ვამბობდი, მაშინ „ოდეერებმა“ შეითავსონ ეს ფუნქცია, გავაუქმოთ ეს დეპარტამენტები, ფულიც დაიზოგება და სახელმწიფო უფრო სწრაფად განვითარდება. ასე რომ, სახელმწიფო უწყებებში ბევრი სეგმენტია, რომელიც, უბრალოდ, არ უნდა არსებობდეს”, _ განაცხადა ხიდაშელმა.
