შეფასებისა და გამოცდების ეროვნული ცენტრის ხელმძღვანელის, მაია მიმინოშვილის განცხადებით, გარკვეული პოლიტიკური ჯგუფები არასწორ და გადაუმოწმებელ ინფორმაციას ავრცელებენ.
აღნიშნულის შესახებ მიმინოშვილი სოციალურ ქელში წერს:
"ცოტა ხნის წინ გავეცანი ერთიანი ნაციონალური მოძრაობის წარმომადგენლების განცხადებას აბიტურიენტებთან დაკავშირებით და თავი ვალდებულად ჩავთვალე საზოგადოებისათვის, მკითხველისათვის პატარა განმარტება გამეკეთებინა.
მიმაჩნია, რომ არის საკითხები, რომელთა პოლიტიკური მიზნებისათვის, მითუმეტეს სპეკულაციისათვის გამოყენება დაუშვებელია. ასე ვფიქრობდი ადრე, ასე ვფიქრობ დღეს.
განცხადებაში არასწორი ფაქტებია მოყვანილი და კიდევ უფრო მცდარი შეფასებებია გაკეთებული. ცხადია, აბიტურიენტებს არავინ ურეკავს და არავინ უგზავნის მოკლე ტექსტურ შეტყობინებებს – მხოლოდ მოთხოვნის გაგზავნის შემდეგ მისდით პასუხი სმს-ით. ყველაფერი რამდენჯერმე განვმარტეთ და ბუნებრივია, მოვუბოდიშეთ ახალგაზრდებს. ხვალ საბოლოო შედეგებს გამოვაქვეყნებთ და, იმედია, ამგვარი სპეკულაციებიც დასრულდება.
და კიდევ… ერთიან ეროვნულ გამოცდებს მხოლოდ ერთხელ შეექმნა საფრთხე – 2012 წლის ზაფხულში! მიუხედავად მაშინდელი რეჟიმის მცდელობისა, სისტემა იმ ადამიანებმა გადაარჩინეს, რომლებიც მაშინაც და დღესაც ყველაფერზე წინ საქმის ინტერესებს და სამართლიანობას აყენებენ. 2012 წელს ერთიანი გამოცდები ცენტრის 170-მდე თანამშრომლის ძალისხმევამ და საქმისადმი თავდადებამ გადაარჩინა. საფრთხე კი ნაციონალურმა მოძრაობამ, მაშინდელმა ხელისუფლებამ შექმნა", _ წერს საკუთარი "ფეისბუკის" გვერდზე მაია მიმინოშვილი.
ცნობისთვის, "ერთიანი ნაციონალური მოძრაობის" წარმომადგენლები – სერგო რატიანი და ელენე ხოშტარია ერთიანი ეროვნული გამოცდების ცენტრის მიერ აბიტურიენტებისთვის დაუმუშავებელი ინფორმაციის გაგზავნის ფაქტს დღეს გამოეხმაურნენ.
"ეროვნული გამოცდების შედეგების გამოცხადების პროცესში შემაშფოთებელი ფაქტი მოხდა. გუშინ აბიტურიენტების ნაწილს ერთი საათის განმავლობაში ურეკავდნენ, მათი მოწყობისა და გრანტის ოდენობის შესახებ შედეგებს უგზავნიდნენ. შემდეგ ეს შეწყდა და არანაირი ოფიციალური ინფორმაცია არ დადებულა. ეს რამდენიმე რამეს ნიშნავს. პირველი, ეს არის "ქართული ოცნების" ტიპური მმართველობის წესი, როდესაც აწყობილი სისტემა შეუძლიათ მოშალონ. გარდა ამისა, ეს არის ძალიან ცუდი და აგდებული დამოკიდებულება ადამიანებისადმი. ამან შესაძლოა ინსტიტუტების სანდოობასთან დაკავშირებით პრობლემები გააჩინოს. აწყობილი სისტემა, რომელიც დღევანდელ ხელისუფლებას დახვდა და რომლითაც მთელი ქვეყანა ამაყობს, მოარღვიეს“, _აღნიშნულია სერგო რატიანის და ელენე ხოშტარიას მიერ გავრცელებულ ინფორმაციაში.
