“ქართული ოცნების“ დეპუტატობის კანდიდატი ოზურგეთში, არჩილ თალაკვაძე ოზურგეთელ ჟურნალისტებს შეხვდა.
შეხვედრა კითხვა-პასუხის რეჟიმში გაიმართა.
“გურია ნიუსი“ დაინტერესდა “გურიის გაერთიანებული დემოკრატიული მოძრაობის“-ის მიერ გავრცელებული ორი განცხადებით.
პირველში ნათქვამია, რომ “07.08.2016 წელს ოზურგეთის მუნიციპალიტეტის საბიუჯეტო სახსრებით მოწყობილ ღონისძიებაზე _ გომისმთობაზე, ოზურგეთის გამგებელმა და გურიის მხარის გუბერნატორმა დამსწრე საზოგადოებას წარუდგინეს „ქართული ოცნების“ ოზურგეთის მაჟორიტარი დეპუტატობის კანდიდატი, რომელმაც ამავე ღონისძიებაზე ისაუბრა "ქართული ოცნებისა" და თავისი სამომავლო გეგმების შესახებ.
“ რაც გავრცელდა გომისმთის შეხვედრასთან დაკავშირებით, არის სიცრუე. უწყებათაშორისო კომისიაში ეს იყო განხილული და ყველა კითხვას გაეცა ამომწურავი პასუხი. ძალიან გთხოვთ, ამ ადამიანებს მოთხოვოთ, კიდევ ერთი ბრიფინგი ჩაატარონ და როგორ დასრულდა ამ საკითხზე მუშაობა მედიის წარმომადგენლებს წარუდგინონ.
მე კანონმდებლობა მავალდებულებს, როგორც კი დავრეგისტრირდები კანდიდატად ცესკოში, დავტოვო თანამდებობა და ასეც მოვიქცევი. კანონმდებლობის მიხედვით, არ მეკრძალება საარჩევნო კამპანიაში ჩართულობა. როდესაც ამის საჭიროება იყო, მე ავიღე შვებულება და როდესაც არ მქონდა შვებულება, არც ვმონაწილეობდი საარჩევნო კამპანიაში.
სამწუხაროა, რომ “სამართლიანი არჩევნების“ მიერ ჩატარებულ გამოკითხვაში და შესწავლაში მედიასაშუალების წარმომადგენლებმა უპასუხეს, რომ მათ არ ახსოვდათ, რა სტატუსით ვიყავი წარდგენილი ღონისძიებაზე. მე ვიყავი წარდგენილი, როგორც მთავრობის წარმომადგენელი და არა დეპუტატობის კანდიდატი", _ თქვა არჩილ თალაკვაძემ.
რაც შეეხება ოპოზიციური პარტიის მეორე განცხადებას, აქ ნათქვამია, რომ სოფელ ლიხაურში მდებარე თხილის ქარხანაში მოხდა ორი შეხვედრა, სადაც არჩილ თალაკვაძე იმყოფებოდა გურიის ხელისუფლებასთან ერთად. “გურიის გაერთიანებული დემოკრატიული მოძრაობის“ მიერ გავრცელებულ განცხადებაში წერია, რომ როგორც გუბერნატორის, ისე მაჟორიტარი კანდიდატის საკუთარ გვერდებზე გამოქვეყნებული ვიდეო და ფოტო მასალიდან ჩანს, ორივე გვერდზე გავრცელებული მასალა გადაღებულია ერთი და იგივე ტექნიკური საშუალებებით, კერძოდ, გურიის გუბერნატორის ადმინისტრაციის ვიდეოკამერით ადმინისტრაციის ოპერატორის მიერ.
მიუხედავად ამისა, ორივე მხარე ცდილობდა მათი ერთობლივი ვიზიტისა და წინასაარჩევნო აგიტაციის შესახებ ფაქტი ფართო საზოგადოებისათვის ცნობილი არ გამხდარიყო.
“ეს არის სიცრუე #2 და ვნახოთ რამდენზე ავალთ. მე არანაირი აგიტაცია არ გამიწევია. რაც შეეხება შეხვედრას, შევხვდი თხილის ქარხნის თანამშრომლებს და ჩემი ტექნიკური საშუალებით არის გადარებული.
სამწუხაროდ, ჩემი ოპონენტები დაკავებული არიან ჩემი კამპანიის დაკვირვებით და უსაფუძვლო საჩივრები წერით. მათ შეუძლიათ ასე გააგრძელონ და შედეგებსაც ვიხილავთ 8 ოქტომბერს", _ თქვა არჩილ თალაკვაძემ.
