მე ერთი ჩვეულებრივი ქართველი ქალი ვარ, ტრადიციულ ქართულ ოჯახში აღზრდილი, ქართული წეს-ჩვეულებების დამცველი, ჩვეულებრივი, მოსიყვარულე ოჯახის დიასახლისი, მეუღლე, დედა და რძალი.
მიუხედავად ჩემი ოჯახური მოვალეობებით დატვირთული გრაფიკისა, როგორც მე, ასევე ყველა ქალს, შეუძლია იყოს ოჯახს გარეთაც აქტიური, მებრძოლი, საქმოსანი, პოლიტიკოსი… მაგრამ პირველ რიგში აუცილებელია ოჯახის წევრების თანადგომა, ხელშეწყობა, განსაკუთრებით კი მეუღლისა, რომელსაც ყოველ წუთს, ყოველ წამს ვგრძნობ, ვხედავ და ვაფასებ მის ასეთ საქციელს.
მიმაჩნია, რომ ბავშვობიდან ვიყავი აქტიური, მებრძოლი, სამართლიანი; გამაჩნდა ლიდერობის უნარი.
ქალი _ ფიზიკოსი… ბირთვული ფიზიკის სპეციალობით… ეს უკვე შტრიხია სიძლიერისა…
პედაგოგი _ ბავშვთა სულის ექიმი… სკოლის დირექტორი _ ლიდერი, მენეჯერი…
ოჯახის დედა _ სიძლიერის მაქსიმუმი, თვით სიცოცხლის განაჩენს _ კიბოსაც კი დედაშვილური ფარი დავახვედრე შვილისთვის სიხარულის მისანიჭებლად…
უნივერსიტეტის დამთავრებიდან სკოლაში ვმუშაობ, უკვე, 22 წელია, აქედან 11 წელი _ სკოლის დირექტორად.
2014 წლიდან ვარ ოზურგეთის მუნიციპალიტეტის საკრებულოს წევრი, გენდერულ საკონსულტაციო საბჭოს წევრი. კარგად ვიცი, რა სტკივა, რა აწუხებს ჩემს სოფელს, რომელმაც 26 წლის წინ მიმიღო და გულში ჩამიკრა. ვგრძნობ და ვაფასებ თითოეული თანასოფლელის თანადგომას, სიყვარულს და ჩემი მიზანი ცხოვრებაში ამ სიყვარულის ვალის გადახდაა.
ყოველი დღე ოჯახით იწყება, სახლის საქმეები… შემდეგ კი მოწესრიგება და …
ორშაბათი, 22 აგვისტო
სკოლისკენ მივიჩქარი, ჩემს მეორე ოჯახში. ახლოვდება ახალი სასწავლო წელი. მინდა, ჩემს მოსწავლეებსა და მეგობრებს ახალი სიურპრიზები დავახვედრო. დღეს დასრულდა რესურსოთახის კეთილმოწყობა. მიხარია, ლამაზი გამოვიდა… ახალი ავეჯის შეკვეთაც მივეცი. სასიხარულოა, რომ ჩემი მეგობარი დირექტორების სიხარულის მინიჭების ერთ-ერთი თანამონაწილე მეც ვარ _ ოზურგეთის მუნიციპალიტეტის 2016 წლის ბიუჯეტში საკრებულოს მხარდაჭერით სკოლების კაპიტალური რემონტისთვის თანხა გამოიყო… 9 საჯარო სკოლას ერთით ნაკლები პრობლემა ექნება.
ჩვენს სკოლას ფასადი მოუწესრიგდება, ტენდერი გამოვაცხადეთ. იმედია, გულისხმიერი და პროფესიონალი ადამიანები მიიღებენ მონაწილეობას. სკოლიდან საკრებულოში მივდივარ, ერთ თანასოფლელს დახმარება სჭირდება, საოპერაციოა. საკითხის გარკვევის შემდეგ ბაზრისკენ მივიჩქარი, მეორე დღისთვის ვემზადები…
სამშაბათი, 23 აგვისტო
ეს დღე ღამის 12 საათიდან დაიწყო: მოლოცვები, სურვილები… პირველი ჩემი "ერთას" ხმაა _ "დე, გილოცავ!" ეს საკმარისია, მისი ხმა ჩემი მკურნალი და ცხოვრებისთვის ბრძოლის სტიმულია, შემდეგი ჩემი სიძე, ჩემი გიო… დილაუთენია კი ჩემი სისხლი და ხორცი იწყებს მოლოცვას: დედ-მამა, დები და ძმები, ნათესავები… გული მითბება, სისხლი მიდუღს, ჩემი გადამრჩენები, ჩემზე დღედაღამ მლოცველები, იმედის მომცემნი…
დღეს თხილში "ნადი" მყავს: მეგობრები და მეზობლები მეხმარებიან. დილიდან ფუსფუსია, მიუხედავად წლევანდელი თხილის მოსავლის სიმცირისა, ერთგულება, გვერდში დგომა და სიყვარული ჩემი სიმდიდრეა.
საღამო გამილამაზეს დირექტორებმა, მეზობლებმა და მეგობრებმა, ჩამოვსხედით და … აი, ასე აღვნიშნეთ ჩემი დაბადების დღე…
ოთხშაბათი, 24 აგვისტო
დღე სასიამოვნოდ იწყება. მოსწავლეებისათვის სახელმძღვანელოები და სამუშაო რვეულები მივიღე. ნურავის ექნება ილუზია, სკოლებში წიგნები არ იქნებაო. მზად ვხვდებით სასწავლო პროცესს.
ჩემი გოგონა მირეკავს, დე, მოვედიო. დაღლა მავიწყდება, სახლში გავრბივარ. ჩემი ქეთუნა მესტუმრა. ბედნიერებაა მისი ყურება, ის ხომ ახალ სიცოცხლეს _ შვილს ელოდება. მისი სახე გაცისკროვნებულია დედობის მოლოდინში. ვეფერები… ისევ გავრბივარ… ერთ-ერთ მედიასაშუალებაში ჩაწერაზე მიმეჩქარება. ოზურგეთის გენდერული საკონსულტაციო საბჭოს სამწლიანი მუშაობის შედეგებს ვაჯამებთ მე და ლელა, სადაც პროექტის "კიბო განაჩენი არ არის" შესახებ ვსაუბრობ. პროექტი, რომელიც ასე მნიშვნელოვანია და უშუალოდ ჩემს მიერ იქნა გახორციელებული გენდერულ საკონსულტაციო საბჭოს წევრებისა და მუნიციპალიტეტის დახმარებით, მადლობა მათ ამისათვის.
მერე საკრებულო _ განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის მორიგი სხდომა გაიმართა. სხდომაზე, როგორც ყოველთვის, საინტერესო და აქტუალურ თემებს განვიხილავთ. დღეს მუნიციპალიტეტის მიერ საკურორტო ზონაში ტურისტების მაქსიმალურად ჯანსაღ და სასიამოვნოდ დასვენების მიზნით, ტრანსმისიური დაავადებების გადამტანებთან ბრძოლის ღონისძიებების გატარებაზე ვმსჯელობთ.
ხუთშაბათი, 25 აგვისტო
სკოლაში ვარ. ვაწესრიგებთ აქაურობას მე და ჩემი ერთგული მეგობრები. ბუღალტერი უკვე სკოლაშია… რამდენი რამ გადაიტანა ამ ორ კვირაში _ შვილის ავარია, ძმის გარდაცვალება. მისი თვალები ნაღვლიანია, არ ისმის ომახიანი შეძახილი, თუმცა, ენერგიულად მუშაობს საბუღალტრო საქმეებში. არ ვერევი, ხომ ვიცი, ამ დროს მუშაობა რასაც ნიშნავს… გამაგრდი, მეგობარო!
დღეს სკოლაში ჩემმა მონათლულმა მინახულა, ძალიან გამახარა, რამდენი ხანია, არ მინახავს. მიყვება მის მომავალზე… სულ მალე ოჯახის ბედნიერებას უნდა ეზიაროს… დამილოცნიხარ, საყვარელო!
სკოლის შემდეგ, სოფლის რწმუნებულთან ერთად საბავშვო ბაღის მშენებლობა მოვინახულე. მიხარია, რომ ჩემს სოფელს თანამედროვე სტილის საბავშვო ბაღი ექნება და ჩემი კუდრაჭა გოგო-ბიჭები აქ ეზიარებიან სკოლამდელ განათლებას. შემდეგ უჩხუბისკენ გავემართეთ _ სოფლის პროექტის ფარგლებში ბეტონის გზა იგება. რამდენი ხანია, წვალობს მოსახლეობა _ უგზოობის გამო უჭირდათ სასაფლაოზე ასვლა. ადმინისტრაციულ შენობაში კლუბის რემონტი მიმდინარეობს… პრობლემები ნელ-ნელა გვარდება სოფელში. რაღაცეები კეთდება, ბევრიც გასაკეთებელია… საღამოს გიორგი სალუქვაძის სახელობის მუზეუმის ამბავი მოვიკითხე. ალამაზებენ იქაურობას, დღე და ღამე მუშაობენ. რა ხელი გაქვს, მანანა… აფერუმ შენს მარჯვენას…
პარასკევი, 26 აგვისტო
დირექტორების თათბირია. როგორც ყოველთვის, თათბირი უმაღლეს პროფესიულ დონეზეა. შეკითხვის დასმაც არ გჭირდება _ ყველაფერი გასაგებია. რა კარგი ადამიანები არიან რესურსცენტრში! პროფესიონალები, სკოლების გულშემატკივრები. ეს საქმიანობა და ორგანიზებულობა გადამდებია.
სოფელში მისულს, თანასოფლელი ცრემლიანი თვალებით მეგებება _ შვილი ავად ყავს და დახმარებას მთხოვს… მაშინვე ვრეკავ შესაბამის სტრუქტურებში და დადებით პასუხსაც ვიღებ…
საღამოს პროექტის _ "კიბო განაჩენი არ არის", ბენეფიციარებს ვხვდები. მიხარია, რომ პროექტი შედგა. ჩემი ნინო და იანა… როგორი მებრძოლები და იმედიანები გახდნენ. ახლა თავად მეხმარებიან სხვებთან ურთიერთობაში.
შაბათი, 27 აგვისტო
შეხვედრა ახალგაზრდა პედაგოგთა კავშირის ოფისში. სკოლის პრობლემებზე და ახალ გამოწვევებზე ვმსჯელობთ დირექტორები პარტნიორ ორგანიზაციასთან, რომელიც მუდამ მზად არის დახმარების ხელი გამოგვიწოდოს.
სალონში გამოვიარე. დავისვენე, მიყვარს აქაური შინაურული გარემო, მოვწესრიგდი… ქალი ხომ სულ ფორმაში უნდა იყოს…
საარჩევნო მარათონი დაწყებულია… უბნის უფროსებს ვხვდები. კვირის დავალებები შეასრულეს. საჭიროა სწორად, გასაგებად მიტანა ამომრჩევლებთან ყველა იმ სიკეთისა, რაც გაკეთდა და მჯერა, ჩემი გონიერი თანასოფლელები სწორ არჩევანს გააკეთებენ… ვახარისხებ სოფლის პრობლემებს პრიორიტეტების მიხედვით, რომელიც ასე აწუხებს ჩემს ამომრჩევლებს…
ვფიქრობ და ვამბობ _ "ნურავინ დაამადლებს თავს და საქმეს სამშობლოს… ხელისუფლებაც და დიდებაც, პრივილეგიებიც, ისეთივე წარმავალია, როგორც სხვა ყველაფერი ცისა და ქვეშე. მხოლოდ, თუ კაცი ხარ, ისე იშრომე, ისე იცხოვრე, რომ გარდაცვალების შემდეგ შენი ჯაფა ღვაწლად შეაფასონ თაობებმა!" _ ეს არის ჩემი დევიზი ცხოვრებაში და ამ პრინციპით ჩავები საკრებულოს საქმიანობაშიც. რამდენი ადმიანია, რამდენი გაჭირვებული, ჩემი იმედი რომ აქვს და მე კი რა უღონოდქმნილი ვარ ხანდახან… არ ვიცი, რა გამომდის ან როგორ გამოვიყურები სადეპუტატო სკამზე შორიდან… ალბათ, რიგით ჩინოვნიკს ვგავარ… შორიდან ხომ ხშირად მრუდედ ირეკლება რეალობა…
რომ იცოდეთ , როგორ მტკივა, როცა ადამიანს ვერ ვეხმარები… ყველა გაჭირვებულს მინდა დავეხმარო, სული და გული გავუთბო… დროთა განმავლობაში ეგება ყველას გაგწვდეთ და მოგხედოთ… მინდა, ვიყვირო ხოლმე, რომ მართლა გულის გულში განვიცდი ყველას გასაჭირს… თუ ვინმეს იმედები გაგიცრუეთ, შემინდეთ, გთხოვთ… ჩემთვის ეს უმძიმესი ჯვარია და ვინძლო, თქვენი დიდსულოვანი მიტევებით და თანადგომით, ბოლომდე ღირსეულად მიმატანინოს უფალმა!
ფიქრებმა გამიტაცა, ალბათ, იმიტომ, რომ ხვალ…
კვირა, 28 აგვისტო
მარიამობაა… დედა ღვთისა შეეწიოს სრულიად საქართველოს!
სახლში ვარ, ჩემს ნავსაყუდელში, ჩემს პატარა სახელმწიფოში, სადაც სიმშვიდე, სიყვარული, ურთიერთპატივისცემა, ურთიერთგაგება, მოთმენა, პატიება, უფროს-უმცროსობა, სტუმარმასპინძლობა, ერთმანეთის აზრის პატივისცემა, მოყვასის სიყვარული სუფევს, სწორედ ეს მავსებს და მაძლევს სტიმულს ყოველი მომდევნო კვირა შინაარსიანად დავგეგმო და ჩემს წინაშე წამოჭრილი ყოველი პრობლემა, თხოვნა თუ დაკისრებული მოვალეობა შევასრულო კეთილსინდისიერად.
მოსაღამოვდა. ეს კვირაც დამთავრდა. სოფლის ყოველდღიური, დამქანცველი დღის შემდეგ მივუსხედით მეზობლები სავსე მაგიდას. ასე აღვნიშნეთ ეს ლამაზი დღე. მივესიყვარულეთ, მოვეფერეთ ერთმანეთს და
ფიქრით და იმედით შევუდექი ახალ კვირას …
შემდეგი კვირის "ბლოგ–პოსტს" ჩემს კოლეგას, ოზურგეთის მუნიციპალიტეტის საკრებულოს დეპუტატს როზეტა სკამკოჩაიშვილს ვაბარებ.
ლალი სიჭინავა,
ოზურგეთის მუნიციპალიტეტის საკრებულოს დეპუტატი,
ოზურგეთის მუნიციპალიტეტის საკრებულოსთან არსებული გენდერული საკონსულტაციო საბჭოს თავმჯდომარის მოადგილე,
სოფელ ცხემლისხიდის საჯარო სკოლის დირექტორი
