ოზურგეთის ცენტრში, რუსთაველის ქუჩაზე მდებარე ოთხსართულიანი საცხოვრებელი კორპუსის მობინადრეები გამუდმებით წუხან მოუწესრიგებელი სახურავის გამო, რომელზეც კიდევ უფრო უარყოფითი გავლენა იქონია ჯერ კიდევ წინა ხელისუფლების დროს სახურავზე დაშენებულმა კოშკურის ფორმის დანამატმა.
ამის შესახებ "გურია ნიუსი" ადრეც წერდა.
"საქმე იმაშია, რომ შენობა, რომელიც, დაახლოებით, ასი წლისაა, მის სახურავზე გაკეთებული დანამატის შემდეგ, უფრო პრობლემური გახდა. კოშკურას, თავის მხრივ, ორ მეტრამდე სიგრძის წყალსადენი მილი აქვს. აქედან ჩამონადენი წყალი, თავისთავად უნდა ჩავიდეს ძირითადი შენობის კედელზე ამოყვანილ მილში, რაც არ ხერხდება გაორმაგებული წნევის გამო. შედეგად, წყალი ზემოდან გადმოდის, მიჰყვება კედლის კიდეს და ზემოდან მოყოლებული, დაბლა სართულების ჩათვლით, ყველა ბინაში შედის", _ გვიხსნიან აქ მცხოვრებლები და შველას გვთხოვენ.
აღნიშნული კორპუსის შიდა ეზო ათეული წლის მანძილზე მოუწესრიგებელი იყო და უფრო ნაგავსაყრელს ჰგავდა, ბოლო წლებში კი ეს ყველაფერი მოწესრიგდა, რასაც აღნიშნავენ კიდეც აქ მცხოვრებნი, თუმცა, მოითხოვენ, საქმეს მეტი გულისყურით მოეკიდოს აქ მოსული სახელმწიფო მოხელე თუ სახურავის შემკეთებელი ოსტატი, რომელმაც უნდა იცოდეს, როგორ მიამაგროს მილი კედელს, რა სიმაღლე დაიცვას და მილის დიამეტრი იმ ზომის იყოს, რომ ნაწვიმარი წყალი გაატაროს და ბინაში არ შევიდეს.
ნორა აროშიძე, # 6 კორპუსის მცხოვრები: _ჩვენ არაერთხელ მივმართეთ ქალაქ ოზურგეთის მუნიციპალიტეტის მერიას. მოვიდნენ ერთხელ, მეორედ. დაათვალიერეს და შეგვპირდნენ, რომ გააკეთებდნენ. მერე თქვეს, რომ ტენდერი გამოაცხადეს და სამუშაოებს გამარჯვებული კომპანიის წარმომადგენლები შეასრულებენო. მართლაც მოვიდნენ და კი გააკეთეს რაღაც, მაგრამ ხარისხი? რა აზრი აქვს ტყუილად სახურავზე სიარულს და ხარჯის გაწევას, თუ სამუშაო უმეტესად უხარისხოდ შესრულდება? დააკვირდით "ჟოლობს" _ ჯერ ერთი, მილი ვიწროა, მერე სახურავზე რომ წინა ხელისუფლების დროს კოშკურა დაამატეს და ზედ ორმეტრიანი "ჟოლობი" მიადგეს, ჩვენ ორმაგად დავზარალდით. ეს იგივეა, ორი სახლის სახურავიდან წამოსული წვიმის წყალი ერთ "ჟოლობში" გაეტიოს. გაატარებს კი? არც ატარებს და ადუღებული წყალივით გადმოდის ზევიდან, მიედინება მთელი კედლების გასწვრივ და ყველა ბინაში შედის. ეს საქმეა? გარდა ამისა, სახურავი შეცვალეს, მაგრამ უკვე აშკარად ჩანს, რომ იმ ძველი თუნუქის შეღებვა სჯობდა _ ამ ნაქებ ახალ სახურავშიც ჟონავს წყალი.
_ გინდათ თქვათ, რომ, თითქმის, საუკუნის თუნუქის სახურავი სჯობდა ახალს?
_ თუ შეღებავდნენ, აჯობებდა. ეს ახალი თუ არის, წყალი არ ჩამოდის თუ რა? შემოდგომა მოვიდა, ზამთარიც მალე მოვა და ვიქნებით კიდევ ასე წინ და უკან სირბილში… მე იმას ვამბობ, თავისი საქმის პროფესიონალმა გულიანად უნდა გააკეთოს საქმე. სახურავზე მეც ავალ, მაგრამ დახურვა კი არ ვიცი…
ლუბა კალანდაძე, #6 კორპუსის მცხოვრები: _ წინა ხელისუფლების დროს მეხუთე სართული რომ დააშენეს, რაღაც კოშკურა, სწორედ ის იქცა ჩვენს სატანჯველად. მერე ახალ ხელისფლებას რამდენჯერ მივმართეთ. მოვიდნენ და გავაკეთეთო, გვითხრეს. როგორც ადრე ჩამოდიოდა წყალი, უარესად ჩამოდის ახლა და ესაა გაკეთებული?! წვიმები რომ დაიწყება და ზამთარიც მალე მოვა, რა ვქნათ? პირველ რიგში, "ჟოლობებია" მოსაწესრიგებელი. ელემენტარულ რაღაცას ვითხოვთ _ ნუ ვიქნებით ნახევრად ღია ცის ქვეშ.
ნანული მეგრელაძე, # 6 კორპუსის მცხოვრები: _ იმ დაშენებულ მეხუთე სართულზე, კოშკურაში არავინ არ ცხოვრობს. თუ საჭირო არ იყო, რად უნდოდათ?! იყოს, მაგრამ ჩვენ რატომ ვზარალდებით არაფრის გამო?! სანამ ვიძახოთ, რომ დაუდევრად, ზერელედ გაკეთებულია და ყველა ბინაში წვიმის დროს წყალი ჩამოდის? ყველაფერი მოსაწესრიგებელია _ სახურავიც, განივი და სიგრძივი ღარებიც. სახურავი უხარისხოა _ იქაც წყალი ჟონავს. ნუთუ ასე შეუძლებელია სახურავის ისე გაკეთება, რომ წვიმის წყალი არ ჩავიდეს?
ეთერ მამულაშვილი, #6 კორპუსის მცხოვრები: _ როგორმე უნდა მოაწესრიგონ ეს "ჟოლობები". ვერ დავიჯერებ, რომ ამის გაკეთება არ შეიძლება. ტენდერი ვინც მოიგო, იმან რა ხარისხით შეასრულა სამუშაო, ჩვენ გვკითხონ. ამოვიდნენ წვიმიან ამინდში და გაათიონ აქ ღამე _ უყურონ, რა ხდება. ჩვენ ჭირვეული ადამიანები არ ვართ, უბრალოდ, ეს არის საქმისადმი ზერელე დამოკიდებულებით გამოწვეული პრობლემა.
ქალაქი მერიაში განმარტავენ, რომ პრობლემის მიზეზი ტენდერში გამარჯვებული ფირმაა, რომელმაც სამუშაოები უხარისხოდ შეასრულა:
"ფირმამ, რომელმაც აღნიშნული კორპუსის რეაბილიტაციასთან დაკავშირებით ტენდერი მოიგო, სამუშაოები უხარისხოდ შეასრულა. შესაბამისად, მას ანაზღაურება არ მიუღია და დისკვალიფიკაცია მივეცით. ხელახალ სარემონტო სამუშაოებზე ტენდერი ახლო მომავალში ხელმეორედ გამოცხადდება და შენობის რეაბილიტაცია სატენდერო პროცესების დასრულებისთანავე დაიწყება", _ აღნიშნავენ ქალაქ ოზურგეთის მერიაში.
"გურია ნიუსი" აქტიურად მიადევნებს თვალს ამ პროცესებს.
