"გურია ნიუსის" და "Post ალიონის" ერთობლივი პროექტის ფარგლებში მომზადებულ გადაცემაში _ "ა’რჩევანი", მაყურებელს საშუალება ჰქონდა გაეგო, აპირებენ თუ არა ახალგაზრდები არჩევნებზე მისვლას, იციან თუ არა საარჩევნო პროცედურები, როგორ უნდა გადაამოწმონ თავი ამომრჩეველთა სიაში და ვის რა ეკრძალება საარჩევნო კამპანიის დროს.
გადაცემის მეორე ბლოკი "ქართული ოცნება -დემოკრატიული საქართველოს მაჟორიტარი დეპუტატობის კანდიდატის ჩოხატაურისა და ლანჩხუთის საარჩევნო ოლქში თემურ ჭკუასელის ახალგაზრდებთან შეხვედრას დაეთმო, რომელიც "ივლიტას ბიბლიოთეკაში" გაიმართა; მომდევნო ბლოკში მაყურებელს იმ ახალგაზრდების გამოკითხვა გავაცანით, რომლებსაც თემურ ჭკუასელთან შეკითხვები ჰქონდათ, ხოლო ბოლო ბლოკში ახალგაზრდების, და არამარტო მათ შეკითხვებს, თემურ ჭკუასელმა "გურია ნიუსის" სტუდიიდან უპასუხა.
თემურ ჭკუასელის თქმით, ჯერჯერობით, საარჩევნო პროგრამაზე საუბარი არ შეუძლია, რადგან პროგრამის პრეზენტაცია პრემიერმა კვირიკაშვილმა უნდა გამართოს:
_ ყოველ გამოსვლის, მოსახლეობასთან შეხვედრის დროს ვაანონსებ ამას და თქვენთანაც ვიტყვი, რომ რვა ან ცხრა სექტემბერს გაიმართება საარჩევნო პროგრამის პრეზენტაცია _ პრემიერ-მინისტრი გიორგი კვირიკაშვილი საზოგადოებას გააცნობს იმ ძირითად მიმართულებებს, რომელიც მომდევნო ოთხი წლის განმავლობაში გახორციელდება. მე ვიცი, რაღაც დეტალები პროგრამიდან, მაგრამ ამაზე საუბარი პრეზენტაციამდე არ შემიძლია და ამის გამო, შეხვედრების დროს მოსახლეობასაც ვუხდი ბოდიშს.
_ არ ფიქრობთ, რომ ეს ცოტა უხერხულია იმ ფონზე, როცა საარჩევნო კამპანია სამი თვის წინ დაიწყო?
_ გეთანხმებით, მაგრამ მიდის ძალიან სერიოზული მუშაობა, ზუსტდება დეტალები. იმდენად დიდია სურვილი იმისა, "ქართულმა ოცნებამ" წარადგინოს პროგრამა, რომელიც იქნება რეალური, ყველა ადამიანზე ორიენტირებული, რომ დროში ცოტა გაიწელა.
_ "ძალიან სერიოზული მუშაობისთვის" "ქართულ ოცნებას" დიდი დრო ჰქონდა…
_ ზოგადად გეთანხმებით. კვირიკაშვილმა არაერთხელ თქვა, რომ სტრუქტურები უფრო მოქნილნი უნდა გახდნენ და ახლა სწორედ ამაზე მიდის მუშაობა. პრემიერმა მაგალითიც კი მოიყვანა და თქვა, რომ როდესაც ჩინეთში ექვსზოლიანი, 1000-კილომეტრიანი მაგისტრალი ერთ წელიწადში ააშენეს, საქართველოში 60-კილომეტრიანი მაგისტრალის დასრულებას 5 წელი არ უნდა დასჭირდეს.
გიორგი კვირიკაშვილი არის უაღრესად საღად მოაზროვნე ადამიანი. თქვენთან ძალიან ბევრი ინტერვიუ მქონია, მაგრამ, მგონი, პირველად ვაქებ პრემიერ-მინისტრს.
_ თქვენ წინა პრემიერებსაც აქებდით. მათ შორის, ირაკლი ღარიბაშვილს, თუმცა, ახლა, თქვენი საუბრიდან გამოდის, რომ ის ცუდი მმართველი იყო და მის დროს სტრუქტურები მოუქნელად მუშაობდნენ.
_ ღარიბაშვილი კი არ იყო ცუდი მმართველი, მოუქნელად მუშაობდნენ სამინისტროები და მან ვერ მოახერხა მათი მოქნილობაში გადაყვანა. ღარიბაშვილი, რა თქმა უნდა, ძალიან საინტერესო პიროვნებაა, დიდი ხანია, ვიცნობ, დიდი დრო მაქვს მასთან გატარებული, რადგან ის ბიძინა ივანიშვილთან წლების განმავლობაში მუშაობდა. მე კი, ბატონ ბიძინასთანაც საკმაოდ ახლოს ვიყავი, თუმცა, გიორგი კვირიკაშვილის მოსვლამ ბევრი რამ შეცვალა რადიკალურად. ახლანდელი პრემიერი არის უფრო შემრიგებლური ხასიათის, უფრო მიმტევებელი და ცდილობს ჰარმონიაში მოიყვანოს ბევრი რამ საქართველოში.
_ შემრიგებლურ ხასიათში რას გულისხმობთ?
_ აგრესიული არ არის.
_ ირაკლი ღარიბაშვილი აგრესიული იყო?
_ შედარებით აგრესიული იყო.
_ ბატონო თემურ, უშუალოდ თქვენი პროგრამა როგორია და არის თუ არა მასში ახალგაზრდებზე აქცენტი?
_ ახალგაზრდებისთვის, ზოგადად, რაც მთელ საქართველოში არის გათვლილი, იგივე უნდა იყოს აქაც. მუდამ ვამბობ და კიდევ ერთხელ გავიმეორებ, რომ ქვეყანაში რადიკალურად არის ბევრი რამ შესაცვლელი. 2012 წელს მე ვსაუბრობდი გორაბერეჟოულის ტექნიკუმის აღდგენის აუცილებლობაზე, შეიძლება ითქვას, რომ დროს გავუსწარი _ როგორც კი კვირიკაშვილი მოვიდა პრემიერად, ზუსტად იმაზე დაიწყო საუბარი, რომ ჩვენ ფულს ვიხდით უმუშევრობაში და არ ვაფინანსებთ პროფესიებს, რომელიც ბაზარს სჭირდება. აქედან გამომდინარე, პირდაპირ დამიჭირა მხარი, რომ გორაბერეჟოულის ტექნიკუმი უნდა აღდგეს და არა მხოლოდ ის. უფრო მეტიც, როდესაც განათლების მინისტრი იყო ჩოხატაურში ჩამოსული, შევხვდი და ამ საკითხზე ვესაუბრე. მითხრა, რომ ეს საქმე აუცილებლად გაკეთდება.
ამისთვის გავაკეთე ყველაფერი ამ ოთხი წლის განმავლობაში, თუმცა, შენობამ არ გაგვიმართლა. განათლების სამინისტროში ორი ბიზნესმენიც მივიყვანე, რომლებსაც გავუფორმეთ ხელშეკრულება, რომ თუკი გორაბერეჟოულის ტექნიკუმი აღდგებოდა, ამ ბიზნესმენების საწარმოებში გაივლიდნენ სტუდენტები სტაჟირებას და უფრო მეტიც _ ყოველწლიურად 9-დან 13 ადამიანს დაასაქმებდნენ. ეს სისტემა ახლაც აწყობილია, ხელშეკრულება დადებულია.
_ თუ ხელშეკრულება დადებულია, შესრულებას რამ შეუშალა ხელი?
_ ამისთვის შენობა უნდა არსებობდეს და სასწავლებელმა უნდა იფუნქციონიროს. 28 ჰექტარზე უკვე ჩაყრილია ვაზის უნიკალური ჯიშები, ეს ბატონმა უჯმაჯურიძემ გააკეთა ჩემი თხოვნით და ისიც იმიტომ, რომ იქ სტუდენტებმა გაიარონ პრაქტიკა. ასევე, ჩემი თხოვნით ააშენა ზურაბ ჩხაიძემ ჩოხატაურში ხილის გადამამუშავებელი ქარხანა. ეს არის ბიზნესმენი, რომელიც სოფელ ასკანაში ახორციელებს უნიკალურ პროექტს, სადაც იქნება ღვინის მარნები, მუზეუმი, სასტუმროები და აქ პერსონალია საჭირო…
_ ბატონო თემურ, ასკანაში ეს გაპიარებული პროექტი შეჩერებულია…
_ მშენებლობა შეჩერებულია ერთი უბრალო მიზეზის გამო_ თუ გზა არ დაიგო, არაფერი არ გამოვა. თუმცა, აქვე მინდა გითხრათ, რომ ასკანის გზის მშენებლობისთვის, ისევე როგორც სურების გზისთვის, თანხა უკვე გამოყოფილია. ასკანაში როგორც კი გზის მშენებლობა დაიწყება, მაშინვე გაგრძელდება იმ პროექტის გახორციელება, სადაც უამრავი მუშა ხელი იქნება საჭირო და მე მაქვს ზურაბ ჩხაიძისგან პირობა, რომ მშენებლობაზე ადგილობრივი, მათ შორის, ჩოხატაურელი მუშახელი იმუშავებს. თუმცა, ადგილობრივების დასაქმების კიდევ ერთი გზაა _ სოფელ ბასილეთიდან ასკანაში გადასასვლელი გზა, რომლის გაკეთებასაც თავის დროზე დავპირდი მოსახლეობას…
_ რძის გადამამუშავებელი ქარხანაც დაგვპირდით…
_ რძის გადამამუშავებელი ქარხანა კერძო ინვესტორს სურდა გაეკეთებინა, ყველაფერზე მოვილაპარაკეთ და შემდეგ გაქრნენ.
_ თაფლის გადამამუშავებელი საწარმო?
_ თაფლის ქარხანა გაკეთდება ხილის გადამამუშავებელ ქარხანასთან.
_ ეს დაპირებები სპეციალურად გადმოიტანეთ მომდევნო ოთხი წლისთვის, რომ ამომრჩეველმა ხმა ისევ მოგცეთ?
_ რა თქმა უნდა, გული მწყდებოდა, რომ ყველა დაპირება ვერ შევასრულეთ. არ მინდა, არაეთიკურად გამომივიდეს, მაგრამ ჩემი პარტიის თხოვნა იყო ხელახლა მეყარა კენჭი და როცა დავთანხმდი, ვთქვი, რომ მეძლევა შანსი, ბოლომდე შევასრულო ჩემი დაპირებები.
_ საკმაოდ ბევრი კონკურენტი გყავთ. ვის მიიჩნევთ მთავარ კონკურენტად?
_ "ქართულ ოცნება" თუ ისე იმუშავებს, როგორც საჭიროა, ამ არჩევნებს აუცილებლად მოვიგებთ. თუმცა, გარშემო არიან ისეთი ადამიანები, რომლებიც უკადრებელს კადრულობენ, იმას, რასაც მე არასდროს ვიკადრებ _ ცოტა ხნის წინ დაწერეს, რომ თითქოს, ლანჩხუთში შეხვედრისას პომიდვრები მესროლეს… მე ნებისმიერ შეურაცხყოფას გავუძლებ, რადგან თმენის მოვალეობა მაქვს, მაგრამ ასეთი განცხადებებით ხალხს აყენებენ შეურაცხყოფას_ როგორ წარმოგიდგენიათ, გურიაში სტუმარს ესროლონ პომიდორი?! აქ საუბარი არაა თემურ ჭკუასელზე…
_ კვერცხები ესროლესო, რომ ეთქვათ, ალბათ, უფრო დამაჯერებელი იქნებოდა, თქვენ განცხადებას თუ გავიხსენებთ, ჩოხატაურს რომ კვერცხების რაოდენობის გაზრდას პირდებოდით… მაშინ ისიც თქვით, ლანჩხუთს საკმარისი აქვსო და ახლა რა ხდება, როცა ლანჩხუთელების გულის მოგებასაც აპირებთ?
_ ლანჩხუთელებმა და ჩოხატაურელებმა, ყველა იმ ადამიანმა, რომელმაც ეს მოისმინა, იციან, რომ იუმორით ვთქვით. რაც შეეხება დანარჩენს, პასუხისმგებლობა იზრდება _ ჩოხატაურელ ამომრჩეველთან სხვა რამეზე მიწევს საუბარი, ლანჩხუთელებთან _ სხვაზე. მე გურიაში ვარ დაბადებული, გაზრდილი და ბევრი სიკეთე მივიღე გურულებისგან. დედულეთი ლანჩხუთია, მამულეთი _ ჩოხატაური. ოთხი წელია, ჩოხატაურელებთან, ავად თუ კარგად, ვარ და ახლა გამოდის, რომ ჩემ ლაღ ბავშვობას ვუბრუნდები ლანჩხუთში. ვუბრუნდები ვალდებულებებით, რომ ის სიკეთე, რაც ბავშვობაში მომცეს, დავუბრუნო. ადვილად, გასაგებად და პრაგმატულად მინდა შევხედოთ სიტუაციას _ კონკურენტებსაც არ ეპარებათ ეჭვი, რომ არჩევნებში პარტია "ქართული ოცნება" გაიმარჯვებს. ჩვენი საარჩევნო ოლქისთვის კი, რა თქმა უნდა უკეთესი იქნება "ქართული ოცნების" წარმომადგენელი იყოს მაჟორიტარი დეპუტატი.
_ ბატონო თემურ, ძალიან ბევრი უკმაყოფილო ამომრჩეველი გყავთ ჩოხატაურში _ სანამ სტუდიაში მოხვიდოდით, გამოკითხვა ჩავატარეთ ახალგაზრდებში და აღმოჩნდა, რომ ერთ-ერთი სულ არ გიცნობდათ… არადა, 4 წელია დეპუტატი ხართ…
_ ჩოხატაურის მაჟორიტარი დეპუტატი რომც არ ვიყო, ისედაც ბევრი იცნობს თემურ ჭკუასელს და ეს ცოტა გასაკვირია. თუმცა, ვიცი, რომ თემურ ჭკუასელი დეპუტატობამდე უფრო საყვარელი იყო, ვიდრე დეპუტატობის დროს. ადამიანებს მოთხოვნილება უჩნდებათ, ყველაფერს და ყველას ვერ მოაწონებ თავს _ მაგალითად, რუსუდან ბერიშვილს, რომელსაც, მგონი, რაღაც ვაწყენინე და თქვენი ეთერით ბოდიშს ვუხდი, თუ რაიმე ისე ვერ გავაკეთე, როგორც მას სურდა.
ბოდიშის მოხდის არ მრცხვენია, იმ ახალგაზრდებს კი, რომლებიც არ მიცნობენ, ვეტყვი, რომ მეძლევა შანსი, ამ ოთხ წელიწადში გავაცნო თავი.
_ ვანზომლეთელმა ახალგაზრდამ გისაყვედურათ, 4 წელი არ გაგხსენებივართ და ხმისთვის მოსვლა რატომ არ შეგრცხვათო…
_ შეიძლება ამას არ უნდა ვამბობდე, მაგრამ მე აქ ჩამოსვლა ვერ მოვახერხე მაშინ, როცა ბიძინა ივანიშვილი იყო ჩამოსული, როცა ირაკლი ღარიბაშვილი იყო _ ეს ის პერიოდი გახლდათ, როცა ჩემი მეუღლე ძალიან ცუდად იყო. ერთი წლის მანძილზე, არა თუ ჩოხატაურისთვის, ჩემი თავისთვისაც არ ვიყავი.
_ დანარჩენი სამი წელი?
_ ამაზე მხოლოდ ის შემიძლია გითხრათ, რომ უნდა ჩავსულიყავი და უნდა დაემახსოვრებინათ თემურ ჭკუასელი. თუმცა, ახლა ყველგან დარიგდება გაზეთი, რომელშიც იმ საქმეებზეა საუბარი, რაც მე ჩოხატაურისთვის გავაკეთე _ შესავალ სიტყვაში წერია, რომ მოვდივარ გაკეთებული საქმეებით: აშენებული ქარხნით, სამი სკოლით, თეატრით, გრეიდერით, ბულდოზერით, ამწე კალათით _ ეს ყველაფერი, რაც ჩოხატაურს აქვს, ჩემი გაკეთებულია.
_ თუ ეს ყველაფერი თქვენ გააკეთეთ ადგილობრივი ხელისუფლება რას აკეთებდა?
_ ადგილობრივი ხელისუფლება ადგილებზე ახორციელებდა პროექტებს იმ თანხებით, რასაც აგზავნიდა ცენტრალური ხელისუფლება და "ქართული ოცნება". ჩოხატაურში გაკეთებული საქმეები შეიძლება ორ ნაწილად გავყოთ _ ერთი "ქართული ოცნების" და მეორე _ პირადად თემურ ჭკუასელის გაკეთებული. თუმცა, მე ვაერთიანებ ამას, რადგან მე თვითონ ვარ "ქართული ოცნება" და თუ რამეს ვაკეთებდი, ამ პარტიის დახმარებით ვაკეთებდი, მაგრამ ის ქარხანა, რომელიც გაკეთდა, პირადად ჩემი თხოვნით და ჩემი ძალისხმევით გაკეთდა. მეუხერხულება კიდეც ამაზე ლაპარაკი _ რამდენ ხანს უნდა ვილაპარაკო?!
_ იცით, რამდენი ადამიანია ამ ქარხანაში დასაქმებული?
_ 30 ადამიანამდე, მაგრამ გაფართოვდება, როცა თაფლის ქარხანა აშენდება.
_ ბატონო თემურ, გაზეთით საუბარი სხვაა და პირადად სხვა… "გურია ნიუსს" კვირაში ორჯერ კითხულობენ ვანზომლეთელები და არა მარტო ისინი, მაგრამ ადამიანებს უნდათ უშუალოდ დეპუტატის ნახვა და არა გაზეთის ფურცლებიდან საუბარი…
_ რომელი ჯობს რაიონისთვის _ დეპუტატთან საუბარი თუ გაკეთებული საქმეები? ორივე შეიძლება ვერ მოვახერხო. არ იფიქროთ, რომ საყვედურს არ ვიღებ _ რასაკვირველია, უნდა მომენახა დრო და მივსულიყავი პირდაპირ, მით უმეტეს ძალიან მიყვარს ხალხთან ურთიერთობა. ამასაც გამოვასწორებ, _ აღნიშნა ჭკუასელმა.
დეპუტატის თქმით, ის, რომ მშობიარობაში ფულს არ იხდიან, ის, რომ სამედიცინო მომსახურება იაფია, ის, რომ მშობლებს წიგნების ყიდვა არ უწევთ, ის, რომ მოსწავლეებს ტრანსპორტი ემსახურება, "ქართული ოცნების" დამსახურებაა და იმისთვის, რომ დანარჩენი პრობლემებიც მოგვარდეს, მმართველ გუნდს და მას აუცილებლად უნდა დაუჭიროს მხარი ამომრჩეველმა.
