გავრცელებული ინფორმაციით, ლანჩხუთის გამგებელი ზაზა ურუშაძე, რომელიც კუთვნილი შვებულებაში იყო და „ქართული ოცნება-დემოკრატიული საქართველოს“ საარჩევნო შტაბს ედგა სათავეში, მიმდინარე სამუშაო კვირიდან გამგებლის პოსტს დაუბრუნდა.
„13 სექტემბერს გამგეობაში საბუთები მივიტანე, რომელიც გამგებლის მოვალეობის შემსრულებლის, ნუგზარ ცინცაძის სახელზე იყო დაწერილი. უკან დამიბრუნეს, მითხრეს, გამგებელი სამსახურშია გამოსული და მის სახელზე დაწერეო“, _ ამბობს პირად საუბარში ერთ-ერთი ხელმძღვანელი პირი.
საკრებულოს თავმჯდომარე გოგი ხელაძე, რომელიც „ქართული ოცნების“ ადგილობრივი ორგანიზაციის ხელმძღვანელია, ჩვენთან საუბარში არ ადასტურებს, რომ ზაზა ურუშაძემ საარჩევნო შტაბის უფროსობა დატოვა.
„მე ვიცი, რომ ზაზა შტაბის უფროსია, სხვა დეტალები გაარკვიეთ იურიდიულ სამსახურთან“, _ გვითხრა ხელაძემ.
მიუხედავად არაერთი მცდელობისა, გამგეობის იურიდიული სამსახურის უფროსთან, შოთა ჩაგუნავასთან დაკავშირება შეუძლებელი აღმოჩნდა, ხოლო „ქართული ოცნების“ საარჩევნო შტაბის იურისტის, კახა ბოლქვაძის ინფორმაციით, შტაბს კვლავინდებურად ზაზა ურუშაძე უდგას სათავეში და სხვა დეტალებზე მას ინფორმაცია არ აქვს.
„მე, როგორც საარჩევნო შტაბის იურისტს შემიძლია დაგიდასტუროთ, რომ აქ ხელმძღვანელად ისევ ზაზა ურუშაძეა, სხვა დეტალების საქმის კურსში არ ვარ და ვერ გეტყვით ამ დროისთვის ისევ იკავებს თუ არა გამგებლის თანამდებობას, თუმცა ვიმედპოვნებ, რომ ყველა იურიდიული დეტალი მოგვარებული ექნება“ , _ გვითხრა ბოლქვაძემ და მანაც ჩაგუნავასთან გადაგვამისამართა.
დატოვა თუ არა „ოცნების“ საარჩევნო შტაბი ზაზა ურუშაძემ და დაუბრუნდა თუ არა გამგებლის თანამდებობას, ამის გადამოწმება უშუალოდ ურუშაძესთან ვცადეთ, თუმცა, მან ამ ეტაპზე პასუხისგან თავი შეიკავა.
„მოიწერეთ ოფიციალურად და მაშინ გაგცემთ პასუხს“, _ გვირჩია გამგებელმა.
