ტურნირი ჩატარდება ჯგუფური სისტემით, ორ ჯგუფად. თითოეული ჯგუფიდან შემდეგ ეტაპზე გადავლენ პირველ-მეორე ადგილზე გასული გუნდები.
ტურნირი ჩატარდება მინიფეხბურთში არსებული წესების დაცვით _ 5X5-ზე; ერთი ტაიმის ხანგრძლივობა განისაზღვრება 20 წუთით.
ტურნირი ჩატარდება იმედო დუნდუას სახელობის მოედანზე. 18 ივნისს საღამოს 5 საათზე შედგება საზეიმო გახსნის ცერემონიალი, რომელშიც მონაწილეობას მიიღებენ საბავშვო ბაღის აღსაზრდელი პატარა ფეხბურთელები და კულტურის ცენტრთან არსებული ბავშვთა ქორეოგრაფიული ანსამბლი.
ტურნირში იასპარეზებენ: ლანჩხუთის “გურიას”, ფოთის “კოლხეთი 1913,” ოზურგეთის “მერცხალის,” ბათუმის “დინამოს,” ქუთაისის “ტორპედოს,” ხობის “კოლხეთის” და ჩოხატაურის “ბახმაროს” ვეტერან ფეხბურთელთა გუნდები.
ვეტერან ფეხბურთელთა კავშირის თავმჯდომარე კობა მირზოევი “გურია ნიუსთან” საუბარში ამბობს, რომ: “ასეთი სახით ტურნირი წელს პირველად ტარდება. შარშან და შარშანწინ ჩატარდა ბათუმსა და ქობულეთში, მაგრამ ასეთი მასშტაბების არ იყო. წელს გადავწყვიტეთ ტურნირი იმედო დუნდუას ხსოვნისადმი მიგვეძღვნა და ფინალი მისი დაბადების დღისთვის _ 25 ივნისისთვის დაგვემთხვია.
ტურნირის ორგანიზატორია ვეტერან ფეხბურთელთა კავშირი. გვერდით დაგვიდგა ლანჩხუთის მუნიციპალიტეტის საფეხბურთო სკოლის დირექცია. ფინანსური დახმარება გაგვიწია ლანჩხუთის მუნიციპალიტეტის გამგეობის საკრებულომ, კერძოდ, საკრებულოს თავმჯდომარემ რევაზ ჩიტიძემ; “საქართველოს ბანკის” ლანჩხუთის ფილიალი ტურნირისთვის სპეციალურ პრიზებს აწესებს.”
ფინალის შემდეგ გაიმართება დაჯილდოების ცერემონიალი. სხვადასხვა ნომინაციაში გამარჯვებულ საუკეთესო ფეხბურთელს, ბომბარდირს, თავდამსხმელს, მცველს, საუკეთესო ვეტერან ფეხბურთელს, ყველაზე ლამაზი გოლის ავტორს გადაეცემათ სამახსოვრო პრიზები.
სტუმრის რანგში მოწვეულნი არიან შემოქმედელი მიტროპოლიტი მეუფე იოსები, ადგილობრივი ხელისუფლების წარმომადგენლები, იმედო დუნდუას მეგობარი ვეტერანი ფეხბურთელები.
ტურნირის საინფორმაციო პარტნიორია გაზეთი “გურია ნიუსი”.
