სწორედ ოპერაციების სირთულიდან გამომდინარე, მამედ-ზადეს ჰოსპიტალიზაციის პროცესი დაახლოებით ორი კვირის მანძილზე უნდა გაგრძელებულიყო, თუმცა, მოულოდნელად სასჯელაღსრულების სამინისტრომ გადაწყვიტა, რომ კლინიკაში გატარებული 6 დღიანი პერიოდის შემდგომ პატიმარი საპყრობილეში დაებრუნებინათ. მამედ-ზადეს ადვოკატის თედო კობახიძის თქმით, ციხის ბადრაგები საავადმყოფოს პერსონალისაგან და პატიმრის მკურნალი ექიმის, თეიმურაზ ბეშკენაძის მხრიდან წინააღმდეგობას გადააწყდნენ.
ტატიშვილის კლინიკის პერსონალი მსჯავრდებულის გაწერის შემდგომ გართულებებზე პასუხისმგებლობის აღებას სასჯელაღსრულების სამინისტროს წარმომადგენლებს სთხოვდნენ, წინააღმდეგ შემთხვევაში კი მამედ ზადეს კლინიკიდან გაწერაზე უარს აცხადებდნენ.
“გურია ნიუსს” პატიმრის გაწერის შესახებ ინფორმაცია ტატიშვილის კლინიკაში დაუდასტურეს, თუმცა, სხვა ინფორმაციისთვის ექიმ თეიმურაზ ბეშკენაძესთან გადაგვამისამართეს. სამწუხაროდ, ჩვენი არა ერთი მცდელობისა ექიმთან დაკავშირება ვერ მოვახერხეთ.
მამედ – ზადეს დედა, ია ქაჯაია კი შეშფოთებულია და ჩვენთან საუბრისას ამბობს, რომ მისი შვილის ჯანმრთელობის მდგომარეობის შესახებ არაფერი იცის:
“ილგარს დრენაჟები ჰქონდა ჩადგმული, იგი კიდევ საჭიროებდა რამდენიმე დღე საავადმყოფოში გაჩერებას, რასაც მისი პირადი ექიმიც ადასტურებდა და ეუბნებოდა ბადრაგებს, თუმცა, ჩემი ნებართვისა და ექიმის კონსულტაციის გარეშე, ჩემი შვილი მაინც დააბრუნეს ციხეში. თეიმურაზ ბეშკენაძემ მათ განუცხადა, რომ თუ ავადმყოფს კლინიკიდან წაიყვანდნენ, იგი ყოველგვარ პასუხისმგებლობას იხსნიდა”.
ია ქაჯაია შიშობს, რომ ციხის პირობებში მისი შვილის მდგომარეობა დამძიმდება, რაზედაც ერთადერთი პასუხისმგებელი სასჯელაღსრულების სამინისტრო იქნება.
“გურია ნიუსი” სასჯელაღსრულების სამინისტროს სამედიცინო დეპარტამენტს დაუკავშირდა ინფორმაციის მოსაპოვებლად, თუმცა იქ , რატომღაც, გაგვიცხადეს, რომ ერთ მარტივ კითხვაზე პასუხის მისაღებად განცხადება უნდა დაგვეწერა და ამ განცხადების პასუხის მოლოდინში 10 დღე უნდა დაგვეცადა. იქვე აღნიშნეს, რომ თუ მამედ-ზადეს მდგომარეობა გართულდებოდა, მას აუცილებლად დააბრუნებდნენ კლინიკაში.
